ସତ୍ୟଶିଖା(ଭୁବନେଶ୍ୱର) ୧୮.୧୨.୨୦୨୧: ସୁମିତ-ତପସ୍ୱିନୀ ବିବାଦ ମାମଲାରେ ସୁମିତ ପରିବାର ଲୋକଙ୍କୁ ଭେଟିଲା ପୋଲିସ । ସୁମିତଙ୍କ ବାପାଙ୍କ ସହ ପୋଲିସ ଆଲୋଚନା କରିଛି । ବ୍ରହ୍ମପୁର ଏସଡିପିଓ ଏବଂ ବୈଦନାଥପୁର ଥାନା ଅଧିକାରୀ ସୁମିତଙ୍କ ଘରେ ପହଂଚି ସେ କେଉଁଠି ଅଛନ୍ତି ବୋଲି ପ୍ରଶ୍ନ କରିଥିଲେ । କୋର୍ଟଙ୍କ ନିର୍ଦ୍ଦେଶ ଅନୁସାରେ ଏପର୍ଯ୍ୟନ୍ତ କାହିଁକି ଭଡା ଘର ଖୋଜାଯାଇନାହିଁ ବୋଲି ସୁମିତଙ୍କ ବାପାଙ୍କୁ ପଚାରିଥିଲେ ।
ସେପଟେ ବ୍ରହ୍ମପୁରରେ ପୁଣି ତପସ୍ୱିନୀ ଶାଶୁ ଘର ଆଗରେ ଧାରଣାରେ ବସିଲେ । ନ୍ୟାୟ ନ ମିଳିବା ଯାଏଁ ଧାରଣା ଜାରି ରହିବା ବୋଲି କହିଛନ୍ତି ତପସ୍ୱିନୀ । ଗତମାସରେ ଶାଶୁ ଘର ଆଗରେ ଧାରଣାରେ ବସିଥିଲେ ତପସ୍ୱିନୀ । କହିଲେ, ଦେହ ଖରାପ କଥା ମିଛ କହୁଛନ୍ତି ସ୍ୱାମୀ । ସ୍କୁଟି ଧରି ସାହିରେ ବୁଲୁଛନ୍ତି ସ୍ୱାମୀ ବୋଲି କହିଛନ୍ତି ତପସ୍ୱିନୀ । ପୂର୍ବରୁ ସେ କହିଥିଲେ, ସୁମିତ ତାଙ୍କୁ କୋର୍ଟରେ ବିବାହ କରିଥିଲେ ।
ଏପରିକି ସେ ଶାଶୁଘରେ ୬ ମାସ ରହିଥିଲେ । କିନ୍ତୁ ପରେ ବୈଦିକ ରୀତିରେ ବିବାହ କରିବାକୁ କହି ଶଶୁର ଘର ଲୋକେ ତାଙ୍କୁ ବାପା ଘରକୁ ପଠାଇଦେଇଥିଲେ । କିନ୍ତୁ ବିବାହ ନକରିବାରୁ ତପସ୍ୱିନୀ ଧାରଣାରେ ବସିଥିଲେ । ୧୧ ଦିନ ଧାରଣା ଦେବା ପରେ ବ୍ରହ୍ମପୁର ଜେଏମଏଫସି କୋର୍ଟ ସୁମିତ ଓ ତପସ୍ୱିନୀଙ୍କୁ ୭ ଦିନ ପାଇଁ ଏକାସାଙ୍ଗରେ ରହିବାକୁ ନିର୍ଦ୍ଦେଶ ଦେଇଥିଲେ । ଉଭୟ ୭ ଦିନ ରହିବା ପରେ କୋର୍ଟରେ ମାମଲାର ଶୁଣାଣି ହୋଇଥିଲା ।
କୋର୍ଟ ତପସ୍ୱିନୀଙ୍କ ଭରଣ ପୋଷଣ ସୁମିତ କରିବେ ବୋଲି କହିଥିଲେ । ଏହା ପରଦିନ ୧୦ ତାରିଖରେ ସୁମିତ କୋଉଁଆଡେ ଚାଲିଯାଇଥିବା ଅଭିଯୋଗ ଆଣିଥିଲେ ପତ୍ନୀ । ଗତକାଲି ସୁମିତ ଏକ ଅଡିଓ ଜାରି କରି କହିଥିଲେ, ତାଙ୍କୁ ଓ ପରିବାର ଲୋକଙ୍କୁ ବଦନାମ ନ କରିନ୍ତୁ ତପସ୍ୱିନୀ । ସେ ତପସ୍ୱିନୀଙ୍କ ସହ ରହିବାକୁ ଚାହାନ୍ତି ନାହିଁ ।
