କାଠମାଣ୍ଡୁ: ଦେଶର ନୂଆ ମାନଚିତ୍ର ଉପରେ ମୋହର ମାରିବା ପାଇଁ ନେପାଳ ସରକାର ସଂସଦର ସ୍ୱତନ୍ତ୍ର ଅଧିବେଶନ ଡାକିଛନ୍ତି। ଏହି ନୂଆ ମ୍ୟାପରେ ଭାରତର କିଛି ଅଂଶ ରହିଛି। ଭାରତ ସରକାର ଉକ୍ତ ଅଞ୍ଚଳରେ ନିର୍ମାଣ କାମ ଆରମ୍ଭ କରିଥିବାରୁ ଏହାକୁ ନେପାଳ ବିରୋଧ କରିଥିଲା।
ଏବେ ନୂଆ ମ୍ୟାପରେ ଉକ୍ତ ଅଞ୍ଚଳକୁ ନିଜର ଦର୍ଶାଇ ଏହାକୁ ପାରିତ କରିବାକୁ ଲକ୍ଷ୍ୟ ରଖିଛି। ନେପାଳ ସଂସଦର ମୁଖପାତ୍ର ରୋଜନାଥ ପାଣ୍ଡେ କହିଛନ୍ତି, ମ୍ୟାପ ସଂଶୋଧନ ନେଇ ଆସିଥିବା ବିଲ ଉପରେ ଗୃହରେ ଆଲୋଚନା କରିବାକୁ ନିଷ୍ପତ୍ତି ହୋଇଛି। ଆଲୋଚନା ପରେ ଏହାର ଉପରେ ଭୋଟିଂ ହେବ।
ଆହୁରି ପଢ଼ନ୍ତୁ
ଆଜି ହିଁ ଏହା ଉପରେ ଭୋଟିଂ କରିବାକୁ ଲକ୍ଷ୍ୟ ରଖାଯାଇଛି। ନେପାଳରେ କ୍ଷମତାସୀନ ସରକାର ଏହି ବିଲ ଆଣିଥିବା ବେଳେ ଏହାକୁ ବିରୋଧୀ ନେପାଳୀ କଂଗ୍ରେସ ବିରୋଧ କରୁଥିଲା। ତେବେ ପରବର୍ତ୍ତୀ ଅବସ୍ଥାରେ ନେପାଳୀ କଂଗ୍ରେସ ବି ଏହାକୁ ସମର୍ଥନ କରିବ ବୋଲି ଘୋଷଣା କରିଛି। ଫଳରେ ଏହା ପାସ୍ ହେବା ଏକ ପ୍ରକାରର ନିଶ୍ଚିତ ହୋଇଯାଇଛି।
ଗତ ମାସରେ ନୂଆ ମ୍ୟାପକୁ ନେପାଳ ସରକାର ସାର୍ବଜନୀନ କରିଥିଲେ। ଏଥିରେ ଉତ୍ତରାଖଣ୍ଡର ଲିପୁଲେଖ ପାସକୁ ନେପାଳ ନିଜର ବୋଲି ଦର୍ଶାଇଛି। ସେହିପରି ୧୮୧୬ ବ୍ରିଟିଶ ଚୁକ୍ତି ଅନୁଯାୟୀ, ଉତ୍ତରାଖଣ୍ଡରେ ଥିବା ଲିପୁଲେଖ ପାସ ନେପାଳର ବୋଲି ସେଠାକାର ସରକାର ଦାବି କରିଛନ୍ତି। ଏହି ଅଞ୍ଚଳରେ ଭାରତ ଓ ନେପାଳ ପ୍ରାୟ ୧୮ଶହ କିମି ସୀମା ଶେୟାର କରିଛନ୍ତି। ସେହିପରି ୧୯୬୨ ଚାଇନା ଯୁଦ୍ଧ ପରଠାରୁ ଭାରତ ସରକାର ଲିମପିୟାଧୁରା ଓ କଲାପାନୀ ସୀମାନ୍ତକୁ ଜଗି ରହିଛି।
ମେ’ ୮ରେ କୈଳାସ ମାନସୋରଭରକୁ ସଂଯୋଗ କରୁଥିବା ଲିପୁଲେଖ ପାସରେ ଭାରତ ସରକାର ରାସ୍ତା କାମ ଆରମ୍ଭ କରିଥିଲେ। ହେଲେ ଏହାକୁ ନେପାଳ ବିରୋଧ କରିଥିଲା। ଏହାଦ୍ୱାରା ନେପାଳର ସୁରକ୍ଷା ପ୍ରତି ବିପଦ ସୃଷ୍ଟି ହେବ ବୋଲି କାଠମାଣ୍ଡୁ ପକ୍ଷରୁ କୁହାଯାଇଛି।
