ସତ୍ୟଶିଖା (ଭୁବନେଶ୍ୱର) ୨୫.୦୩.୨୦୨୨: ଚଳିତ ଆର୍ଥିକ ବର୍ଷରେ ବଢ଼ିବନି ବିଦ୍ୟୁତ ଦର । ୨୦୨୨-୨୩ ଆର୍ଥିକ ବର୍ଷ ପାଇଁ ବିଜୁଳି ଦର ବଢିବ ନାହିଁ । ଏହାସହ ଗ୍ରାମାଞ୍ଚଳ ଗ୍ରାହକଙ୍କ ପାଇଁ ୧୦ ପଇସା ରିହାତି ବ୍ୟବସ୍ଥା କରାଯାଇଛି । ଏନେଇ ସାମ୍ବାଦିକ ସମ୍ମିଳନୀରେ ସୂଚନା ଦେଇଛନ୍ତି OERCର ସଚିବ ପ୍ରିୟବ୍ରତ ପଟ୍ଟନାୟକ । OERCର ସଚିବ କହିଛନ୍ତି ଯେ, ବିଦ୍ୟୁତ ଦର ନେଇ ଓଇଆରସିରେ ଶୁଣାଣୀ ହୋଇଛି ।ଚଳିତ ଆର୍ଥିକବର୍ଷରେ ବିଦ୍ୟୁତ ଦର ବୃଦ୍ଧି ନକରିବା ଲାଗି ନିଷ୍ପତ୍ତି ନିଆଯାଇଛି । ରିଟେଲ ବିଦ୍ୟୁତ ଶୁଳ୍କକୁ ଅପରିବର୍ତ୍ତିତ ରଖାଯାଇଛି । ଗ୍ରାମାଞ୍ଚଳ ଉପଭୋକ୍ତାଙ୍କୁ ୟୁନିଟ ପିଛା ୧୦ ପଇସା ରିହାତି ମିଳିବ । କୃଷିକ୍ଷେତ୍ର ପାଇଁ ଉଠା ଜଳସେଚନ ପଏଣ୍ଟ ପାଇଁ ୨ ଟଙ୍କା ରିହାତି ବ୍ୟବସ୍ଥା ହୋଇଛି । ସେହିପରି କେନ୍ଦ୍ର ଓ ରାଜ୍ୟ ସରକାର ବିଦ୍ୟୁତ ଚାଳିତ ଯାନ ଚଳାଚଳକୁ ଗୁରୁତ୍ୱ ଦେଉଛନ୍ତି । ଏଥିପାଇଁ ୫ ଟଙ୍କା ୫୦ ପଇସା ଟାରିଫ୍ ଧାର୍ୟ୍ୟ କରାଯାଇଛି ।
ପୂର୍ବବର୍ଷ ଭଳି ୦ ରୁ ୫୦ ୟୁନିଟ୍ ଯାଏଁ ଦର ୩ ଟଙ୍କା ରହିବ । ୫୦ରୁ ୨୦୦ ୟୁନିଟ ଯାଏଁ ଦର ୪ ଟଙ୍କା ୮୦ ପଇସା, ୨୦୦ରୁ ୪୦ପ ୟୁନିଟ ଯାଏ ବିଜୁଳି ଦର ୫ ଟଙ୍କା ୮୦ ପଇସା ରହିବ । ସେହିପରି ୪୦୦ ୟୁନିଟରୁ ଅଧିକ ବିଜୁଳି ବ୍ୟବହାର କଲେ ୟୁନିଟ ପିଛା ଦର ୬ ଟଙ୍କା ୨୦ ପଇସା ରହିବ । ସେହିପରି ଡିଜିଟାଲ ପେମେଣ୍ଟକୁ ଗୁରୁତ୍ୱ ଦିଆଯାଇଛି । ଉପଭୋକ୍ତାମାନେ ନିଜ ମାସିକ ବିଜୁଳି ବିଲ୍ ଡିଜିଟାଲ ମୋଡରେ ପେମେଣ୍ଟ କଲେ ୩ ପ୍ରତିଶତ ରିହାତି ମିଳିବ ।
