ସତ୍ୟଶିଖା(ନୂଆଦିଲ୍ଲୀ )୦୯.୦୨.୨୦୨୨ :ଦେଶରେ ବେକାରି ସମସ୍ୟା ବୃଦ୍ଧି ପାଇବାରେ ଲାଗିଛି। ଚାକିରି ମିଳୁ ନଥିବାରୁ ଲକ୍ଷାଧିକ ଶିକ୍ଷିତ ଛାତ୍ରଛାତ୍ରୀ ବେକାର ହୋଇ ବୁଲୁଛନ୍ତି। ନିଯୁକ୍ତି ଲାଗି ଏତେତେଣେ ଘୂରି ବୁଲୁଛନ୍ତି। କିନ୍ତୁ କେନ୍ଦ୍ର ସରକାରଙ୍କ ବିଭିନ୍ନ ବିଭାଗରେ ଲକ୍ଷାଧିକ ପଦବି ଖାଲି ପଡ଼ିଥିଲେ ହେଁ ପୂରଣ କରିବା ଦିଗରେ ପଦକ୍ଷେପ ନିଆଯାଉନାହିଁ। ଏଥିପାଇଁ ଦେଶରେ ବେକାରି ସମସ୍ୟା ଦିନକୁ ଦିନ ଉତ୍କଟ ହେବାରେ ଲାଗିଛି। ରେଳ ବିଭାଗକୁ ଉଦାହରଣ ଭାବେ ନିଆଗଲେ, ଏଥିରେ ୨ଲକ୍ଷ ୬୫ ହଜାରରୁ ଊର୍ଧ୍ବ ପଦବି ଏବେ ଖାଲି ପଡ଼ିଛି। ବରିଷ୍ଠରୁ କନିଷ୍ଠ ପର୍ଯ୍ୟନ୍ତ, ସବୁ ବର୍ଗରେ ଗେଜେଟେଡ୍ ଓ ନନ୍ ଗେଜେଟେଡ୍ ପଦବିରେ କେହି ନାହାନ୍ତି। ଯେଉଁଥିପାଇଁ କାର୍ଯ୍ୟ ପ୍ରଭାବିତ ହେବା ସହ ଲୋକଙ୍କୁ ଠିକ୍ ସମୟରେ ଉପଯୁକ୍ତ ସେବା ମିଳିପାରୁ ନାହିଁ।
