ସତ୍ୟଶିଖା ( ଭୁବନେଶ୍ୱର ) ୧ .୦୯ .୨୦୨ ୦ : ଆଜିଠୁ ଜେଇଇ ମେନ୍ ପରୀକ୍ଷା ଆରମ୍ଭ । ସେପ୍ଟେମ୍ବର ୬ ତାରିଖ ପର୍ଯ୍ୟନ୍ତ ଚାଲିବାକୁ ଥିବା ଏହି ପରୀକ୍ଷା ପାଇଁ ସାରା ଦେଶରେ ୬୬୦ ପରୀକ୍ଷା କେନ୍ଦ୍ର ହୋଇଛି । ୯ଲକ୍ଷ ୫୩ହଜାର ୪୭୩ଜଣ ଛାତ୍ରଛାତ୍ରୀ ପରୀକ୍ଷା ଦେବେ । ଛାତ୍ରଛାତ୍ରୀଙ୍କ ସୁରକ୍ଷାକୁ ଦୃଷ୍ଟିରେ ରଖି ଗତଥର ଅପେକ୍ଷା ଏଥର ପରୀକ୍ଷା କେନ୍ଦ୍ର ସଂଖ୍ୟା ବଢ଼ାଇ ଦିଆଯାଇଛି । ପ୍ରତି ସିଫ୍ଟରେ ୮୫ହଜାର ଛାତ୍ରଛାତ୍ରୀ ପରୀକ୍ଷା ଦେବେ । ସକାଳ ୯ଟାରୁ ୧୨ଟା ପର୍ଯ୍ୟନ୍ତ ପ୍ରଥମ ଓ ଅପରାହ୍ନ ୩ଟାରୁ ୬ଟା ମଧ୍ୟରେ ଦ୍ୱିତୀୟ ସିଫ୍ଟ ପରୀକ୍ଷା କରାଯିବ ।
ଓଡିଶାର ୭ ଟି ସହରର ୨୬ଟି କେନ୍ଦ୍ରରେ ୩୮ହଜାର ୨୩୬ଜଣ ଛାତ୍ରଛାତ୍ରୀ ଜେଇଇ ମେନ୍ ପରୀକ୍ଷା ଦେବେ । ଭୁବନେଶ୍ୱର ସହରରେ ସର୍ବାଧିକ ୬ଟି ପରୀକ୍ଷା କେନ୍ଦ୍ରରେ ୧୬ହଜାର ଛାତ୍ରଛାତ୍ରୀ ପରୀକ୍ଷା ଦେବାକୁ ଥିବା ବେଳେ ବ୍ରହ୍ମପୁର, କଟକ, ସମ୍ବଲପୁର, ରାଉରକେଲା, ବାଲେଶ୍ୱର, ଢେଙ୍କାନାଳ ସହରରେ ବାକି ୨୦ଟି କେନ୍ଦ୍ର ହୋଇଛି । ନିର୍ଦ୍ଧାରିତ ସମୟ ସୁଦ୍ଧା ପରୀକ୍ଷାର୍ଥୀ ପରୀକ୍ଷା କେନ୍ଦ୍ରରେ ପହଞ୍ଚିବେ । ଗେଟ୍ ବନ୍ଦ ହେବା ପରେ ପ୍ରବେଶ ଲାଗି ଅନୁମତି ମିଳିବ ନାହିଁ । ପରୀକ୍ଷା ସରିବା ପୂର୍ବରୁ କେହି ହଲ ଛାଡ଼ି ଯିବେନି । ଆଡମିଟ୍ କାର୍ଡ ସହ ସେଲ୍ଫ ଡିକ୍ଲାରେସନ କାଗଜ, ବଲ୍ ପଏଣ୍ଟ ପେନ, ନିଜସ୍ୱ ପାଣି ବୋତଲ ଓ ହ୍ୟାଣ୍ଡ ସାନିଟାଇଜର ଆଣି ଆସିବେ ।
ସରକାରଙ୍କ ଦ୍ଵାରା ପ୍ରଦତ୍ତ ଯେକୌଣସି ପରିଚୟପତ୍ର ସାଙ୍ଗରେ ଆଣି ଆସିବେ। ଇଲେକ୍ଟ୍ରୋନିକ୍ସ ଯନ୍ତ୍ର, ମୋବାଇଲ ଆଦି ସାମଗ୍ରୀ ଆଣିବା ଉପରେ କଟକଣା ଲାଗୁ ହୋଇଛି । ଜୋତା, ମୋଜା, ଲମ୍ବା ହାତ ଥିବା ସାର୍ଟ ପିନ୍ଧିବେ ନାହିଁ । କୋଭିଡ୍ -୧୯ କଟକଣା କଡ଼ାକଡ଼ି ପାଳନ ହେବ । ପ୍ରତ୍ୟେକ ସିଫ୍ଟ ପରେ ପରୀକ୍ଷା କେନ୍ଦ୍ରକୁ ଭଲ ଭାବେ ବିଶୋଧନ କରାଯିବ । ଛାତ୍ରଛାତ୍ରୀ ପରୀକ୍ଷା ଦେବାକୁ ଥିବା ମନିଟର, କି-ବୋର୍ଡ, ମାଉସ୍ , ଡେସ୍କ, ଚେୟାର, ବେଞ୍ଚ, ଡୋର୍ ହାଣ୍ଡେଲ, ଲିଫ୍ଟ ବଟନ ଆଦି ଭଲ ଭାବେ ସାନିଟାଇଜ ହେବ ।
ପ୍ରତି ପରୀକ୍ଷାର୍ଥୀଙ୍କ ମଧ୍ୟରେ ଦୁଇଟି ସିଟ୍ ବ୍ୟବଧାନ ରହିବ । ପରୀକ୍ଷା କେନ୍ଦ୍ରର ପ୍ରବେଶ ଓ ପ୍ରସ୍ଥାନ ପଥରେ ହ୍ୟାଣ୍ଡ ସାନିଟାଇଜର ରଖାଯିବ । ପରୀକ୍ଷାର୍ଥୀଙ୍କୁ ସହାୟତା ଯୋଗାଇଦେବା ଲାଗି ରାଜ୍ୟ ସରକାରଙ୍କ ପକ୍ଷରୁ ରାଜ୍ୟରେ ୩୦ଟି ନୋଡାଲ ସେଣ୍ଟର ଖୋଲିଛି । ପରୀକ୍ଷାର୍ଥୀଙ୍କ ଯାତାୟାତ, ରହିବା, ଖାଇବା ପାଇଁ ରାଜ୍ୟ ସରକାର ସାହାଯ୍ୟ ଯୋଗାଇ ଦେଇଛନ୍ତି ।
