ଲକଡାଉନରେ ଗ୍ରୋସରୀ ପାଇଁ ଯାଇଥିଲେ, ପତ୍ନୀଙ୍କୁ ଧରି ଘରକୁ ଫେରିଲେ

ଗାଜିଆବାଦ: ଶୀର୍ଷକ ପଢ଼ି ଆପଣ ନିଶ୍ଚିତ ଆଶ୍ଚର୍ଯ୍ୟ ହେଉଥିଲେ। ଲକଡାଉନ ବେଳେ କେବଳ ଲୋକମାନେ ଜରୁରୀ ଗ୍ରୋସରୀ ଓ ସାମଗ୍ରୀ ପାଇଁ ବାହାରକୁ ଯାଉଛନ୍ତି। ହେଲେ ଗ୍ରୋସରୀ ପାଇଁ ଯାଇଥିବା ଜଣେ ୨୬ ବର୍ଷୀୟ ଯୁବକ କେମିତି ବଜାରରୁ ପତ୍ନୀଙ୍କୁ ଧରି ଫେରିଲେ, ତା’କୁ ନେଇ ଚାରିଆଡ଼େ ଚର୍ଚ୍ଚା।

ଉତ୍ତର ପ୍ରଦେଶର ଗାଜିଆବାଦରେ ଘଟିଛି ଏମିତି ଘଟଣା। ପୁଅ ଗ୍ରୋସରୀ ପାଇଁ ଯାଇ ବୋହୂ ଆଣି ଫେରିଥିବାରୁ ମା’ ଏଥିରେ ଆଶ୍ଚର୍ଯ୍ୟ ହୋଇଛନ୍ତି। ଏପରି କି ସେ ପୁଅ ବୋହୂଙ୍କୁ ଘରେ ପଶିବାକୁ ମଧ୍ୟ ଅନୁମତି ଦେଇନାହାନ୍ତି। ଗାଜିଆବାଦର ଶାହିବାବଦ ଅଞ୍ଚଳରେ ଘଟିଥିବା ଏହି ଘଟଣା ସମ୍ପର୍କରେ ଯୁବକଙ୍କ ମା’ କହିଛନ୍ତି, “ମୁଁ ମୋ ପୁଅକୁ ଗ୍ରୋସରୀ ପାଇଁ ବଜାରକୁ ପଠାଇଥିଲି। କିନ୍ତୁ ସେ ଫେରିବା ବେଳକୁ ତା’ ସ୍ତ୍ରୀକୁ ଧରି ଫେରିଛି। ଏହି ବାହାଘରକୁ ମୁଁ ଗ୍ରହଣ କରିବି ନାହିଁ। ସେମାନେ ବାହାରେ ରୁହନ୍ତୁ।”

ଦୁଇ ମାସ ତଳେ ହରିଦ୍ୱାରରେ ଥିବା ଆର୍ଯ୍ୟ ସମାଜ ମନ୍ଦିରରେ ଏହି ବାହାଘର ହୋଇଥିଲା। ନୂଆ କରି ବିବାହ କରିଥିବା ଦମ୍ପତି ଲକଡାଉନ ଖୋଲିଲେ ସେମାନଙ୍କ ବାହାଘର ପ୍ରମାଣପତ୍ର ପାଇବେ ବୋଲି ଆଶା ରଖିଛନ୍ତି। ମନ୍ଦିରରେ ବାହା ହୋଇଥିବା

୨୬ ବର୍ଷୀୟ ଗୁଡୁ କହିଛନ୍ତି, ବାହାଘର ସମୟରେ ଆମ ପାଖରେ କୌଣସି ସାକ୍ଷୀ ନଥିବାରୁ ଆମେ ବିବାହ ପ୍ରମାଣପତ୍ର ପାଇ ନଥିଲୁ। ମୁଁ ପୁଣିଥରେ ହରିଦ୍ୱାର ଯିବାକୁ ନିଷ୍ପତ୍ତି ନେଇଥିଲି।

କିନ୍ତୁ ଲକଡାଉନ ଯୋଗୁ ଏହା ସମ୍ଭବପର ହୋଇନାହିଁ। ଗୁଡ଼ୁଙ୍କ ପତ୍ନୀ ସବିତା ବାହାଘର ପରେ ଦିଲ୍ଲୀରେ ଥିବା ଏକ ଭଡ଼ା ଘରେ ରହିଥିଲେ। ଲକଡାଉନ ଯୋଗୁ ଘର ମାଲିକ ବାରମ୍ବାର ଏହାକୁ ଖାଲି କରିବାକୁ କହୁଥିଲେ।

ତେଣୁ ସେ ବାଧ୍ୟ ହୋଇ ସବିତାଙ୍କୁ ତାଙ୍କ ମା’ଙ୍କ ଘରକୁ ଆଣିଛନ୍ତି। ତେବେ ମା’ ଉଭୟଙ୍କୁ ଗ୍ରହଣ କରିନାହାନ୍ତି। ପୁଲିସ ଏବେ ଉଭୟଙ୍କୁ ଭଡ଼ା ଘରେ ରହିବାକୁ କହିଛି।