ସତ୍ୟଶିଖା (ବାଲେଶ୍ୱର) ୧୦/୧୧/୨୦୨୦ : ରାଜ୍ୟର ୨ଟି ଉପ-ନିର୍ବାଚନର ଭୋଟ୍ ଗଣତିର ଅନ୍ତିମ ପର୍ଯ୍ୟାୟ ପହଞ୍ଚିଛି । ବର୍ତ୍ତମାନ ସୁଦ୍ଧା ୨ଟି ନିର୍ବାଚନ ମଣ୍ଡଳୀ ତିର୍ତ୍ତୋଲ ଏବଂ ବାଲେଶ୍ୱରରେ ବିଜେଡି ଆଗରେ ରହିଛି । ବାଲେଶ୍ୱରରେ ବିଜେଡି-ବିଜେପି ୧୦ ହଜାର ଭୋଟ୍ ବ୍ୟବଧାନରେ ଆଗପଛ ରହିଛି । ତିର୍ତ୍ତୋଲରେ ବିଜେଡିର ବିଜୟ ଏକ ପ୍ରକାର ନିଶ୍ଚିତ ହୋଇସାରିଛି ।
ଅନ୍ୟପଟେ ବାଲେଶ୍ୱର ଉପ-ନିର୍ବାଚନରେ ସ୍ବାଧୀନ ପ୍ରାର୍ଥୀ ବେଣୁଧର ବାରିକଙ୍କୁ ନେଇ ଚର୍ଚ୍ଚା ଚାଲିଥିଲା । ବିବାଦୀୟ ଅଭିନେତ୍ରୀ ରାଣୀ ପଣ୍ଡା, ଯାତ୍ରା କଳାକଳା ଦାମ ପଣ୍ଡା, ଯାଜପୁର କିନ୍ନର ସଂଘ ଏବଂ ଅଭିନେତ୍ରୀ ରାନୀ ସାହୁ ବେଣୁଧରଙ୍କ ପାଇଁ ପ୍ରଚାର କରିଥିଲେ । ପ୍ରଥମ ଦିନରୁ ବାଲେଶ୍ୱରରେ ବେଣୁଧରଙ୍କ କ୍ରେଜ୍ ରହିଥିଲା ।
ହେଲେ ବେଣୁଙ୍କ ପ୍ରତି ଯେଉଁଭଳି ସମର୍ଥନ ଥିଲା, ତାହା ଭୋଟ୍ରେ ପରିଣତ ହୋଇନଥିବା ତାଙ୍କ ସମର୍ଥକମାନେ ମତ ପ୍ରକାଶ କରିଛନ୍ତି । ୨୦ ରାଉଣ୍ଡ ଗଣତି ସୁଦ୍ଧା ବେଣୁ ୮୩୪ ଖଣ୍ଡ ଭୋଟ୍ ପାଇଛନ୍ତି । ଅନ୍ୟପଟେ କର୍ମୀମାନେ ବିଜେଡି କ୍ୟାମ୍ପରେ ବିଜୟ ଉତ୍ସବ ପାଳନ କରିବାରେ ଲାଗିଲେଣି ।
ବେଣୁ କାହିଁକି ଏତେ କମ୍ ଭୋଟ ପାଇଲେ? କଣ ରହିଛି କାରଣ ? ଏ ନେଇ ବେଣୁଧରଙ୍କ ପ୍ରତିକ୍ରିୟା ମିଳି ପାରି ନାହିଁ । ତାଙ୍କର ଅର୍ଥବଳ କି ଟଙ୍କା ବଳ କିଛି ନ ଥାଇ ବି ସେ ହେଭିଓ୍ବେଟ୍ ପ୍ରାର୍ଥୀଙ୍କ ବିରୋଧରେ ବେଣୁଧର ପ୍ରତିଦ୍ବନ୍ଦିତା କରୁଥିଲେ । ଏ ନେଇ ସ୍ଥାନୀୟ ଲୋକେ ତାଙ୍କୁ ପ୍ରଶଂସା କରିଛନ୍ତି । ତାଙ୍କ ସମର୍ଥକ କହିଛନ୍ତି, ବେଣୁଧର ବିଜୟ କରିଛନ୍ତି । ସେ ନିର୍ବାଚନରେ ବିଜୟ ନ କରି ପାରିଥାଆନ୍ତି ହେଲେ ସମସ୍ତଙ୍କ ହୃଦୟକୁ ନିଶ୍ଚିତ ଜିତିଛନ୍ତି ।
