ସତ୍ୟଶିଖା(ଭୁବନେଶ୍ୱର )୨୮.୧୦ .୨୦୨୧: ଆଗକୁ ପଂଚାୟତ ନିର୍ବାଚନ । ଆଗାମୀ ନିର୍ବାଚନ ପାଇଁ ଦଳ କିଭଳି ରଣନୀତି ପ୍ରସ୍ତୁତ କରିବ ତାହା ଅନୁଧ୍ୟାନ କରିବା ସହ ବ୍ଲୁପ୍ରିଂଟ ପ୍ରସ୍ତୁତି ପାଇଁ ଓଡ଼ିଶା ଗସ୍ତରେ ଆସିଛନ୍ତି ଏ.ଚେଲ୍ଲାକୁମାର । ଚେଲ୍ଲାକୁମାରଙ୍କ ତିନିଦିନିଆ ଓଡ଼ିଶା ଗସ୍ତକୁ ନେଇ କଂଗ୍ରେସ ଭବନ ଚଳଚଂଚଳ ହୋଇଯାଇଛି ।
ମିଳିଥିବା ସୂଚନାନୁଯାୟୀ, ଆଜି ସକାଳ ୯ଟାରେ ଚେଲ୍ଲାକୁମାର ବିଜୁ ପଟ୍ଟନାୟକ ବିମାନ ବନ୍ଦରରେ ପହଁଚିଥିଲେ । ଚେଲ୍ଲାକୁମାରଙ୍କ ସହ କଂଗ୍ରେସର ବରିଷ୍ଠ ନେତା ତଥା ମୁଖପାତ୍ର ରଣଦୀପ ସୁର୍ଯ୍ୟେୱାଲା ମଧ୍ୟ ଆସିଛନ୍ତି । ଭୁବନେଶ୍ୱର ବିମାନବନ୍ଦରରେ ପିସିସି ସଭାପତି ନିରଞ୍ଜନ ପଟ୍ଟନାୟକ, କଂଗ୍ରେସ ବିଧାୟକ ଦଳ ନେତା ନରସିଂହ ମିଶ୍ର, ବରିଷ୍ଠ କଂଗ୍ରେସ ନେତା ଗଣେଶ୍ୱର ବେହେରା, କଟକ ଜିଲ୍ଲା କଂଗ୍ରେସ ସଭାପତି ମାନସ ଚୌଧୁରୀ ପ୍ରମୁଖ ସେମାନଙ୍କୁ ସ୍ୱାଗତ କରିଥିଲେ ।
ବିମାନବନ୍ଦରରୁ ସେମାନେ ହେଲିକପ୍ଟର ଯୋଗେ କଂଟାବାଞ୍ôଜ ଯାଇଛନ୍ତି । ସେଠାରୁ କାରରେ ଝରଣି ଯାଇ ସ୍ୱର୍ଗତ ମମିତା ମେହେରଙ୍କ ପରିବାର ବର୍ଗଙ୍କୁ ଭେଟିବେ । ଝରଣିରୁ ବାହାରି ସେ ଭୁବନେଶ୍ୱରରେ ପହଁଚିବା ପରେ ଅପରାହ୍ନ ସାଢେ଼ ୪ଟାରେ କଂଗ୍ରେସ ଭବନ ଯିବେ । କଂଗ୍ରେସ ଭବନରେ ଏକ ସାମ୍ବାଦିକ ସମ୍ମିଳନୀରେ ଗଣମାଧ୍ୟମକୁ ସମ୍ବୋଧିତ କରିବେ । ପରେ ହୋଟେଲ ସ୍ୱସ୍ତି ଗ୍ରାଣ୍ଡରେ ଏ.ଚେଲ୍ଲାକୁମାର ରାତ୍ରିଯାପନ କରିବେ ।
ଅକ୍ଟୋବର ୨୯ ସକାଳେ ଚେଲ୍ଲାକୁମାର ଢେଙ୍କାନାଳ ଗସ୍ତ କରି ଜିଲ୍ଲା, ବ୍ଲକ ଓ ଗ୍ରାମଂପଚାୟତସ୍ତରୀୟ ନେତାଙ୍କ ସହ ଆଲୋଚନା କରିବେ । ଶନିବାର ଦିନ ଚେଲ୍ଲାକୁମାରଙ୍କ କଟକ ଗସ୍ତର କାର୍ଯ୍ୟକ୍ରମ ରହିଛି । କଟକରେ ଜିଲ୍ଲା କଂଗ୍ରେସର ପଦାଧିକାରୀ, ବ୍ଲକ ଓ ପଂଚାୟତସ୍ତରୀୟ ନେତାଙ୍କ ସହ ଚେଲ୍ଲାକୁମାର ଆଲୋଚନା କରିବେ ବୋଲି ଜଣାପଡିଛି ।
