ସତ୍ୟଶିଖା ( ପୁରୀ ) ୦୪/୧୨ /୨୦୨୧: ଆସନ୍ତାକାଲି ମଧ୍ୟାହ୍ନରେ ପୁରୀ ଉପକୂଳ ଛୁଇଁବ ବାତ୍ୟା । ପୁରୀରୁ ୪୩୦ କିମି ଦୂରରେ ବାତ୍ୟା ରହିଛି । ବାତ୍ୟାକୁ ଦୃଷ୍ଟିରେ ରଖି ପ୍ରସ୍ତୁତ ପୁରୀ ପ୍ରଶାସନ। ବାତ୍ୟା ପୂର୍ବରୁ ପୁରୀ କୃଷ୍ଣପ୍ରସାଦ ବ୍ଲକର ୩୦୦ ଲୋକଙ୍କୁ ସ୍ଥାନାନ୍ତର କରାଯାଇଛି । ନୂଆପଡା ପଞ୍ଚାୟତ ଜଙ୍ଗଲସାହିର ୨୦୦ ଲୋକ ଏବଂ ବଜ୍ରକୋଟର ୮୦ ଲୋକଙ୍କୁ ନିକଟସ୍ଥ ସ୍କୁଲ, କଲେଜ ଓ ବାତ୍ୟା ଆଶ୍ରୟସ୍ଥଳୀରେ ରଖାଯାଇଛି । ସ୍ଥାନାନ୍ତରିତ ହୋଇଥିବା ଲୋକଙ୍କ ପାଇଁ ଶୁଖିଲା ଖାଦ୍ୟର ବ୍ୟବସ୍ଥା କରିଛି ପ୍ରଶାସନ।
ସେପଟେ ବ୍ରହ୍ମଗିରି ବ୍ଲକର ୧୭୭ ଜଣଙ୍କୁ ମଧ୍ୟ ସ୍ଥାନାନ୍ତରିତ କରାଯାଇଛି । ଆମ୍ବପଡା ଏବଂ ପଲଙ୍କ ପଞ୍ଚାୟତର ୧୭୭ ଜଣ ଲୋକଙ୍କୁ ସ୍ଥାନାନ୍ତର କରାଯାଇଥିବା ସୂଚନା ଦେଇଛନ୍ତି ବ୍ରହ୍ମଗିରି ବିଡିଓ । ସେହିପରି ବାତ୍ୟା ବିଶାଖାପଟନମଠୁ ୨୫୦ କିମି ଦୂରରେ ରହିଛି । ପାରାଦୀପରୁ ୫୧୦, ଗୋପାଳପୁରରୁ୩୬୦ କିମି ଦୂରରେ ବାତ୍ୟା । ୬ ଘଣ୍ଟା ହେଲା ଘଣ୍ଟା ପ୍ରତି ୬ କିମି ବେଗରେ ଗତି କରୁଛି ବାତ୍ୟା ଜୱାଦ୍ ।
ପୁରୀ, ଗଞ୍ଜାମ, ଗଜପତି, ଜଗତସିଂହପୁରରେ ଅତି ପ୍ରବଳ ବର୍ଷା ସମ୍ଭାବନା । କେନ୍ଦ୍ରାପଡା, କଟକ, ଖୋର୍ଦ୍ଧା, ନୟାଗଡରେ ବି ପ୍ରବଳ ବର୍ଷା । ମତ୍ସ୍ୟଜୀବୀଙ୍କୁ ସମୁଦ୍ର ଭିତରକୁ ବାରଣ କରାଯାଇଛି ।
