ସତ୍ୟଶିଖା ୩୧.୦୮.୨୦୨ ୦ : ଭାରତ ରତ୍ନ ପୁରସ୍କାରରେ ସମ୍ମାନିତ ହୋଇଥିବା ପୂର୍ବତନ ରାଷ୍ଟ୍ରପତି ପ୍ରଣବ ମୁଖାର୍ଜୀଙ୍କ ଆଜି ଦେହାନ୍ତ ହୋଇଛି । 84 ବର୍ଷ ବୟସରେ ତାଙ୍କର ପରଲୋକ ଘଟିଛି । 10 ଅଗଷ୍ଟ 2020 ରୁ ରାଜଧାନୀ ଦିଲ୍ଲୀର ଆର୍ମି ରିସର୍ଚ୍ଚ ଏବଂ ରେଫରାଲ ହସ୍ପିଟାଲରେ ସେ ଚିକିତ୍ସିତ ହେଉଥିଲେ । ମସ୍ତିଷ୍କ ଅସ୍ତ୍ରୋପଚାର ପରେ ତାଙ୍କର ଫୁସଫୁସ ସଂକ୍ରମଣ ବ୍ୟାପି ଯାଇଥିଲା । ସେ ଭେଣ୍ଟିଲେଟରରେ ଥିଲେ । ମୁଖାର୍ଜୀଙ୍କ ଦେହାନ୍ତ ଖବର ତାଙ୍କ ପୁଅ ଅଭିଜିତ୍ ମୁଖାର୍ଜୀ ଟ୍ୱିଟ୍ କରି ସୂଚନା ଦେଇଛନ୍ତି । ଏହି ଟୁଇଟ୍ ପରେ ରାଷ୍ଟ୍ରପତି, ପ୍ରଧାନମନ୍ତ୍ରୀ, ଗୃହମନ୍ତ୍ରୀଙ୍କ ସମେତ ଦେଶର ଅନେକ ନେତା ସମବେଦନା ଜଣାଇବା ସହ ଶ୍ରଦ୍ଧାଞ୍ଜଳି ଅର୍ପଣ କରିଛନ୍ତି ।
ପ୍ରଣବ ମୁଖାର୍ଜୀଙ୍କ ନିଧନରେ ରାଷ୍ଟ୍ରପତି ରାମନାଥ କୋବିନ୍ଦ ଟ୍ଵିଟ୍ କରି ଶ୍ରଦ୍ଧାଞ୍ଜଳୀ ଦେଇଛନ୍ତି । ରାମନାଥ କୋବିନ୍ଦ ଟ୍ଵିଟ୍ କରି ଲେଖିଛନ୍ତି ପ୍ରଣବ ମୁଖାର୍ଜୀଙ୍କ ନିଧନ ଖବର ଶୁଣି ଦୁଃଖିତ । ତାଙ୍କର ଚାଲିଯିବା ଏକ ଯୁଗର ଅନ୍ତ ଘଟିଛି । ପ୍ରଣବ ଦେଶର ସେବା କରିଛନ୍ତି । ଆଜି ତାଙ୍କର ପରଲୋକରେ ପୂରା ଦେଶ ମର୍ମାହତ।ସେ କହିଛନ୍ତି ଅସାଧାରଣ ବିବେକର ଧନୀ, ଭାରତ ରତ୍ନ ଶ୍ରୀ ମୁଖାର୍ଜୀଙ୍କ ବ୍ୟକ୍ତିତ୍ଵରେ ପରମ୍ପରା ଓ ଆଧୁନିକତାର ଅଭିନବ ସଙ୍ଗମ ଥିଲା । ୫ ଦଶନ୍ଧିର ନିଜର ସାର୍ବଜନୀନ ଜୀବନରେ ଉଚ୍ଚ ପଦରେ ଆସିନ ରହିବା ପରେ ବି ସେ ତୃଣମୂଳସ୍ତରେ ଜଡିତ ଥିଲେ । ନିଜର ସୌମ୍ୟ ଓ ମେଳାପି ସ୍ଵଭାବ କାରଣରୁ ରାଜନୈତିକ କ୍ଷେତ୍ରରେ ସେ ସର୍ବପ୍ରିୟ ଥିଲେ ।
ସେହିପରି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ପ୍ରଣବ ମୁଖାର୍ଜୀଙ୍କ ବିୟୋଗରେ ଶୋକ ବ୍ୟକ୍ତ କରିଛନ୍ତି । ପ୍ରଧାନମନ୍ତ୍ରୀ ଲେଖିଛନ୍ତି ଯେ, ପ୍ରଣବ ମୁଖାର୍ଜୀଙ୍କ ନିଧନରେ ପୂରା ଦେଶ ଦୁଃଖି । ସେ ଜଣେ ଷ୍ଟେଟ୍ସମ୍ୟାନ ଥିଲେ । ସେ ରାଜନୈତିକ କ୍ଷେତ୍ର ଓ ସାମାଜିକ କ୍ଷେତ୍ରର ସବୁ ବର୍ଗର ସେବା କରିଛନ୍ତି । ପ୍ରଣବ ମୁଖାର୍ଜୀ ନିଜର ରାଜନୈତିକ କ୍ୟାରିୟରରେ ଆର୍ଥିକ ଓ ସାମରିକ କ୍ଷେତ୍ରରେ ଯୋଗଦାନ ଦେଇଛନ୍ତି । ସେ ଜଣେ ଭଲ ସାଂସଦ ଥିଲେ, ଯିଏ ପୁରା ପ୍ରସ୍ତୁତି ସହ ଉତ୍ତର ରଖୁଥିଲେ ।
