ସତ୍ୟଶିଖା ( ନୂଆଦିଲ୍ଲୀ ) ୦୭ .୦୮ .୨୦୨୦ : ଦେଶରେ ଥିବା ଅସାଧୁ କର୍ମଚାରୀଙ୍କ ପାଇଁ ଆଜି ଲୋକଙ୍କ ପାଖରେ ବିକାଶ ପହଞ୍ଚିପାରୁ ନଥିବା ଅଭିଯୋଗ ହେଉଛି । ତେବେ ଦେଶରୁ ଦୁର୍ନୀତି ହଟାଇବା ପାଇଁ ସରକାର ସବୁପ୍ରକାର ପଦକ୍ଷେପ ନେବାକୁ ପ୍ରସ୍ତୁତ ହେଉଛନ୍ତି । ଦୁର୍ନୀତିଖୋର ତଥା ଅଳସୁଆ ଅଧିକାରୀଙ୍କୁ ବିତାଡ଼ିତ କରି ଦୁର୍ନୀତିମୁକ୍ତ ସମାଜ ପ୍ରତିଷ୍ଠା କରିବାକୁ ସରକାର ଅଣ୍ଟାଭିଡ଼ିଥିବା ଶୁଣିବାକୁ ମିଳିଛି । ଦୁର୍ନୀତିଖୋର ଅଧିକାରୀ ଯେଉଁମାନଙ୍କ ବୟସ 50 ବର୍ଷରୁ ଅଧିକ ସେମାନଙ୍କୁ ବାଧ୍ୟତାମୂଳକ ଅବସର ଦେବାକୁ ସରକାର ଯୋଜନା କରିଛନ୍ତି ।
ସିସିସି (ପେନସନ) ନିୟମ-1972 ଅନୁସାରେ ଏ, ବି ଓ ସି କ୍ୟାଟେଗୋରି ଅଧିକାରୀଙ୍କୁ ଅବସର ଦିଆଯିବ । କରୋନା ମହାମାରୀ ପାଇଁ ଏହି ପ୍ରକ୍ରିୟାରେ ବିଳମ୍ବ ହେଉଛି । କେନ୍ଦ୍ର ସରକାର ଏହି ବିଷୟ ଉପରେ ଧ୍ୟାନ ଦେବାକୁ ଏକ ଟିମ୍ ଗଠନ କରିଛନ୍ତି । ତେବେ ଏହି ଟିମ୍ରେ ଥିବା ଦୁଇ ବରିଷ୍ଠ ଆଏଏସ୍ ଅଫିସରଙ୍କ ମଧ୍ୟରେ ଜଣେ ଜଣାଶୁଣା ନାଁ ଥିବା କୁହାଯାଉଛି । ତେବେ ଏହି ନିୟମ ଅନୁସାରେ ଯେଉଁମାନେ 30 ବର୍ଷ ଚାକିରୀରେ ଥିବେ ଓ ସେମାନଙ୍କ ବୟସ 50ରୁ ଉର୍ଦ୍ଧ୍ୱ ସେମାନଙ୍କୁ ଚାକୀରିରୁ ଅବ୍ୟାହତ ନେବାକୁ କୁହାଯିବ । ଏପରିକି ଯେଉଁ ଅଧିକାରୀଙ୍କ ବିରୋଧରେ ଦୁର୍ନୀତି ଅଭିଯୋଗ ତଥା ଉପସ୍ଥାନ କମ୍ ଥିବ ସେମାନଙ୍କୁ ବାଧ୍ୟତାମୂଳକ ଅବସର ଦିଆଯିବ ।
ଯଦି ସେମାନଙ୍କ ବିରୋଧରେ ଥିବା ଅଭିଯୋଗ ସତ୍ୟ ସାବ୍ୟସ୍ତ ହୁଏ ତେବେ ସେମାନଙ୍କୁ ତିନି ମାସର ଦରମା ସହ ଚାକିରୀରୁ ଅବ୍ୟାହତ ଦିଆଯିବ । ତେବେ କେଉଁ ଅଧିକାରୀଙ୍କୁ ବାଧ୍ୟତାମୂଳକ ଭାବେ ଅବସର ଦିଆଯିବ ସେନେଇ ଗଠିତ ଟିମ୍ ନିଷ୍ପତ୍ତି ଗ୍ରହଣ କରିବ । ପ୍ରତି ତିନି ମାସରେ ଏଭଳି ଅଧିକାରୀଙ୍କ ଲିଷ୍ଟ ପ୍ରଦାନ କରିବ ଟିମ୍ । କେନ୍ଦ୍ର ସରକାରଙ୍କ ବ୍ୟତୀତ ରାଜ୍ୟ ସରକାରମାନେ ମଧ୍ୟ ଏଭଳି ପଦକ୍ଷେପ ଗ୍ରହଣ କରିପାରିବେ । ଗତବର୍ଷ ଉତ୍ତରପ୍ରଦେଶ ସରକାର 600 ଦୁର୍ନୀତଖୋର ଅଧିକାରୀଙ୍କୁ ଅବସର ଦେବାକୁ ନିଷ୍ପତ୍ତି ନେଇଥିଲେ ।
କେନ୍ଦ୍ର ଅର୍ଥ ମନ୍ତ୍ରାଳୟ ନିଜର 27 ବରିଷ୍ଠ ଅଧିକାରୀଙ୍କୁ ଅବସର ଦେଇଥିଲା । କେନ୍ଦ୍ର ରାସ୍ତାରେ ଏବେ ଦିଲ୍ଲୀ, ହରିୟାଣା, ଉତ୍ତରପ୍ରଦେଶ, ଆସାମ ଓ ତ୍ରୀପୁରା ଚାଲିବା ଆରମ୍ଭ କରିଛନ୍ତି । କିଛି ଦୁର୍ନୀତିଖୋର ଅଧିକାରୀଙ୍କ ପାଇଁ ପୂର୍ବ କିଛି ବର୍ଷ ହେବ ସରକାର ଘୋଷଣା କରିଥିବା ଯୋଜନାର ସଫଳ ରୂପାୟନ ହୋଇପାରୁନି । ଏଥିପାଇଁ ଏକ ସ୍ୱତନ୍ତ୍ର ଟିମ୍ ଗଠନ ହୋଇଛି । ଅନିଲ ବାଇଜଲ ଯିଏକି ଦିଲ୍ଲୀର 21 ତମ ଉପ ରାଜ୍ୟପାଳ ସେ ଏଭଳି ପ୍ରକ୍ରିୟା ଆରମ୍ଭ କରିସାରିଥିବା ଜଣାପଡ଼ିଛି ।
