ସତ୍ୟଶିଖା ( ମାଲକାନଗିରି ) ୧୮ .୦୮.୨୦୨୦ : ଲଗାଣ ବର୍ଷା ଯୋଗୁଁ ମାଲକାନଗିରି ଜିଲ୍ଲା ଅନ୍ତର୍ଗତ ପଡିଆ ବ୍ଳକରେ ବ୍ୟାପକ କ୍ଷୟକ୍ଷତି ହୋଇଥିବା ଦେଖିବାକୁ ମିଳିଛି । ଯୋଗାଯୋଗ ସମ୍ପୂର୍ଣ୍ଣ ବିଚ୍ଛିନ୍ନ ହୋଇଥିବା ବେଳେ ଜଳ ଘେରରେ ଲୋକେ । କିଛି ସ୍ଥାନରେ ବାସଗୃହ ହରାଇ ଲୋକେ ଚିନ୍ତାରେ । ଆଜି ସକାଳେ ଶାବେରୀ ନଦୀର ବନ୍ୟା ପାଣି ପଡିଆ ପଞ୍ଚାୟତ ଅନ୍ତର୍ଗତ ବଜାଗୁଡା ଗ୍ରାମକୁ ମାଡ଼ି ଆସିବାରୁ ଏହି ଗ୍ରାମର ଦୁଲା ବାଡ଼ସୀ, ନନ୍ଦା ବାଡ଼ସୀ, ଗଙ୍ଗା ବାଡ଼ସୀ ଓ ପଦିଏ ବାଡ଼ସୀଙ୍କ ପରିବାର ଜଳ ଘେରରେ ରହିଯାଇଥିଲେ ।
ଏହି ଚାରି ପରିବାରର ୧୨ ଜଣ ସଦସ୍ୟ ଜଳ ଘେରରେ ଫସି ରହିଥିବା ସୂଚନା ପାଇ ଅଗ୍ନିଶମ ଅଧିକାରୀ ବିରେନ୍ଦ୍ର ସିଂ ତାଙ୍କ ଟିମ୍ ସହ ଜଳ ଘେରରୁ ଏମାନଙ୍କୁ ଉଦ୍ଧାର କରିଥିଲେ । ଏଥିସହ ତେଲାମଗୁଡା ଓ ଏରବନପଲ୍ଲୀ ଅଞ୍ଚଳରେ ୮ ଟି ଗଛ ପଡି ରାସ୍ତା ଅବରୋଧ ହୋଇଥିବା ବେଳେ ଅପରାହ୍ଣରେ ଗ୍ରାମବାସୀଙ୍କ ସହଯୋଗରେ ଏଗୁଡ଼ିକୁ ସଫା କରାଯାଇଛି । ଏହା ବ୍ୟତୀତ ପଡିଆ ବ୍ଲକ୍ ନିଲିଗୁଡା ରାଜସ୍ୱ ବିଭାଗ ଅଧୀନରେ ମୁରଲୀଧର ୱାନ୍ଜାମୀ, ଯୋଗୀ କାରାମ ଓ ଶୁକଦେବ କବାସୀ ସମେତ ୧୧ ଜଣ ଲୋକ ବାସ ହରାଇଛନ୍ତି ।
ଏହାସହ ଶିମିଳିବାଞ୍ଛା ପଞ୍ଚାୟତରେ ୫ଟି, ଗିରିକାନପଲ୍ଲୀରେ ୪ ଟି ଓ ପଡିଆରେ ପ୍ରାୟ ୧୦ଟି ଘରକୁ ମିଶାଇ ପ୍ରାୟ ୪୦ ରୁ ଉର୍ଦ୍ଧ୍ୱ ଘର ଭାଙ୍ଗି ପଡ଼ିଥିବା ଜଣାପଡିଛି । ଅନ୍ୟପଟେ ପ୍ରବଳ ବର୍ଷା ମଧ୍ୟରେ ଆଜି ଗିରିକାନପଲ୍ଲୀ ପଞ୍ଚାୟତରେ କିଛି ଦାଦନ ଶ୍ରମିକଙ୍କୁ ଶୁଖିଲା ଖାଦ୍ୟ ପ୍ରଦାନ କରାଯିବା ସହ ସ୍ଥାନୀୟ ଲୋକଙ୍କୁ ସତର୍କ ହୋଇ ରହିବାକୁ କୁହାଯାଇଥିବା ପଞ୍ଚାୟତ ଅଧିକାରୀ ଏନ୍ ରୁଷି ରାଓ ଓ ପ୍ରେମାନ୍ସୁ ସରକାର କହିଛନ୍ତି ।
