ସତ୍ୟଶିକ୍ଷା ୨୬.୦୯.୨୦୨୦ : ଶନିବାର ଦିନ ଚଳଚ୍ଚିତ୍ର ନିର୍ମାତା କରଣ ଜୋହର ଏକ ବିବୃତିରେ କହିଛନ୍ତି ଯେ, ସେ କୌଣସି ନିଶାଦ୍ରବ୍ୟ ସେବନ କରନ୍ତି ନାହିଁ କି, ଏହାର ବ୍ୟବହାରକୁ ପ୍ରସାର ଓ ଉତ୍ସାହ ଦିଅନ୍ତି ନାହିଁ । ସୁଶାନ୍ତ ସିଂହ ରାଜପୁତ ମୃତ୍ୟୁ ମାମଲାର ନିଶାଦ୍ରବ୍ୟ ସମ୍ପୃକ୍ତି ଘଟଣାରେ ‘ଏନ୍ସିବି’ ଯେଉଁ ବ୍ୟକ୍ତିଦ୍ବୟଙ୍କୁ ପଚରାଉଚୁରା କରିଥିଲା ସେମାନେ ତାଙ୍କର ଘନିଷ୍ଠ ସହଯୋଗୀ ବୋଲି ପ୍ରସାରିତ ଖବରକୁ ମଧ୍ୟ ସେ ଅଗ୍ରାହ୍ୟ କରିଛନ୍ତି ।
ଗତବର୍ଷ ଜୁଲାଇରେ ଜୋହରଙ୍କ ବାସଭବନରେ ‘ଡ୍ରଗ୍ ପାର୍ଟି’ ଆୟୋଜନ ହୋଇଥିଲା ବୋଲି ରାଜନେତା ମଞ୍ଜିନ୍ଦର୍ ସିଂହ ସିର୍ସା ପୁନର୍ବାର ଦାବି କରିବାରୁ ବଲିଉଡ୍ର ଡ୍ରଗ୍ ଲିଙ୍କ୍ରେ ଜୋହରଙ୍କ ନାଁ ଉଠିଛି । କିନ୍ତୁ, ସେ ଏହାକୁ ମିଥ୍ୟା ଏବଂ ଭିତ୍ତିହୀନ ବୋଲି କହି ଅଗ୍ରାହ୍ୟ କରି ଦେଇଛନ୍ତି ।
ଇନ୍ଷ୍ଟାଗ୍ରାମ୍ରେ ସେ ଦେଇଥିବା ଏକ ବିବୃତିରେ ଲେଖିଛନ୍ତି, ସାମ୍ପ୍ରତିକ ବିଦ୍ୱେଷ ପରାୟଣ ଅଭିଯାନ ଦୃଷ୍ଟିରୁ ମୁଁ ପୁଣି ଥରେ କହୁଛି ଯେ, ଏହି ଅଭିଯୋଗ ସବୁ ସମ୍ପୂର୍ଣ୍ଣ ଭିତ୍ତିହୀନ ଓ ମିଥ୍ୟା। ପାର୍ଟିରେ ନିଶାଦ୍ରବ୍ୟ ସେବନ ହୋଇ ନ ଥିଲା। ସଂଶୟ ନ ରଖିବାକୁ ମୁଁ ପୁଣି ଥରେ କହୁଛି ଯେ, ମୁଁ ନିଶାଦ୍ରବ୍ୟ ସେବନ କରେନାହିଁ କି, ଏହାର ବ୍ୟବହାରକୁ ପ୍ରସାର ଓ ଉତ୍ସାହ ଦିଏନାହିଁ ।
ସେ ଆହୁରି ମଧ୍ୟ ଉଲ୍ଲେଖ କରିଛନ୍ତି ଯେ, କେତେକ ଗଣମାଧ୍ୟମ/ନିଉଜ୍ ଚାନେଲ୍ ଖବର ପ୍ରସାରଣ କରୁଛନ୍ତି ଯେ, କ୍ଷିତିଜ ପ୍ରସାଦ ଓ ଅନୁଭବ ଚୋପ୍ରା ମୋର ସହଯୋଗୀ/ଘନିଷ୍ଠ ସହଯୋଗୀ। ମୁଁ ସ୍ପଷ୍ଟ କରିଦେବାକୁ ଚାହେଁ ଯେ, ମୁଁ ଏହି ବ୍ୟକ୍ତିବିଶେଷମାନଙ୍କୁ ଚିହ୍ନି ନାହିଁ କି, ଦୁଇ ଜଣଙ୍କ ମଧ୍ୟରୁ କେହି ମୋର ସହଯୋଗୀ/ଘନିଷ୍ଠ ସହଯୋଗୀ ନୁହନ୍ତି । ଲୋକେ ସେମାନଙ୍କ ବ୍ୟକ୍ତିଗତ ଜୀବନରେ କ’ଣ କରୁଛନ୍ତି ସେଥିଲାଗି ମୋତେ କିଂବା ଧର୍ମ ପ୍ରଡକ୍ସନ୍କୁ ଦାୟୀ କରାଯାଇ ପାରିବ ନାହିଁ । ଏହି ଅଭିଯୋଗ ସବୁର ଧର୍ମ ପ୍ରଡକ୍ସନ୍ ସହ ସମ୍ପୃକ୍ତି ନାହିଁ ।
ରାଜପୁତଙ୍କ ମୃତ୍ୟୁ ଘଟଣାରେ ‘ଏନ୍ସିବି’ ଚଳଚ୍ଚିତ୍ର କାର୍ଯ୍ୟନିର୍ବାହୀ ପ୍ରଯୋଜକ କ୍ଷିତିଜ ପ୍ରସାଦ ଏବଂ ସହକାରୀ ନିର୍ଦେଶକ ଅନୁଭବ ଚୋପ୍ରାଙ୍କୁ ପଚରା ଉଚୁରା କରିଥିବା ପ୍ରସଙ୍ଗରେ ଜୋହର ଏ ଭଳି ସ୍ପଷ୍ଟିକରଣ ଦେଇଛନ୍ତି । ସେ ଲଖିଛନ୍ତି, ଚୋପ୍ରା ଧର୍ମ ପ୍ରଡକ୍ସନ୍ର କର୍ମଚାରୀ ନ ଥିଲେ। ନଭେମ୍ବର ୨୦୧୧ ରୁ ଜାନୁଆରି ୨୦୧୨ ପର୍ଯ୍ୟନ୍ତ ମାତ୍ର ଦୁଇ ମାସ ପାଇଁ ଜଣେ ଦ୍ୱିତୀୟ ସହକାରୀ ନିର୍ଦେଶକ ଭାବେ ସେ ଆମକୁ ସହଯୋଗ କରିଥିଲେ । ପୁଣି ଥରେ ୨୦୧୩ ଜାନୁଆରିରେ ଏକ ସଂକ୍ଷିପ୍ତ ସିନେମାରେ ସହକାରୀ ନିର୍ଦେଶକ ଥିଲେ ।
ଚୋପ୍ରା ଧର୍ମ ପ୍ରଡକ୍ସନ୍ର ଅନ୍ୟ ଏକ ସଂସ୍ଥା ଧର୍ମଟିକ୍ ଏଣ୍ଟର୍ଟେନ୍ମେଣ୍ଟ୍ରେ ନଭେମ୍ବର ୨୦୧୯ରେ ଏକ ପ୍ରକଳ୍ପ ନିମନ୍ତେ ଚୁକ୍ତି ଭିତ୍ତିରେ ଯୋଗ ଦେଇଥିଲେ, କିନ୍ତୁ ତାହା ସାକାର ହୋଇ ନ ଥିଲା ।
