ଗ୍ରୀଷ୍ମ ଛୁଟି ହେବ ହାଇସ୍କୁଲରେ

ସତ୍ୟଶିଖା (ଭୁବନେଶ୍ୱର) ୧୮/୧୨/୨୦୨୦ : କରୋନା‌ ପାଇଁ ୨୦୨୦ରେ ଛାତ୍ରଛାତ୍ରୀଙ୍କ ପାଠପଢ଼ା ପ୍ରଭାବିତ ହୋଇଛି । ଶିକ୍ଷାବର୍ଷ ଅଧା ସରି ଯାଇଥିଲେ ମଧ୍ୟ ଏବର୍ଷ କ୍ଲାସରୁମ୍‌ ଶିକ୍ଷା ଆଗେଇ ପାରିନାହିଁ । କେବେଠାରୁ ଆରମ୍ଭ ହେବ, ସେନେଇ ସମସ୍ତେ ଦ୍ବନ୍ଦ୍ବରେ । କେନ୍ଦ୍ର କିମ୍ବା ରାଜ୍ୟ ସରକାର କେହି ଏ ବିଷୟରେ ସ୍ପଷ୍ଟ କରିପାରୁ ନାହାନ୍ତି । ସମସ୍ତଙ୍କ ମୁହଁରେ ଏକପ୍ରକାର ତାଲା ।

ଏଭଳି ସମୟରେ ୨୦୨୧ରେ ‌କିଭଳି ପାଠପଢ଼ା ହେବ ?, ଛୁଟି ସମୟରେ ବି କ୍ଲାସ ହେବ କି ? ଗ୍ରୀଷ୍ମ ଛୁଟି, ଦଶହରା ଛୁଟି ଆଦି ବାତିଲ୍‌ କରାଯିବ କି ? ଛାତ୍ରଛାତ୍ରୀ, ଅଭିଭାବକ, ଶିକ୍ଷକ ଶିକ୍ଷୟିତ୍ରୀଙ୍କ ମଧ୍ୟରେ ଏମିତି ଅନେକ ଆଶଙ୍କା ପ୍ରକାଶ ପାଉଥିବା ବେଳେ ମାଧ୍ୟମିକ ଶିକ୍ଷା ନିର୍ଦେଶାଳୟ ପକ୍ଷରୁ ୨୦୨୧ ମସିହା ଲାଗି ଛୁଟି ତାଲିକା‌ ପ୍ରକାଶ କରାଯାଇଛି । ୨୦୨୧ରେ ମାଧ୍ୟମିକ ବିଦ୍ୟାଳୟଗୁଡ଼ିକ ପାଇଁ ୮୨ଦିନ ସ୍କୁଲ ଛୁଟି ରହିବ । ୩୮ ଦିନ (ମେ’ ୬ରୁ ଜୁନ୍‌ ୧୮ ଯାଏ) ଗ୍ରୀଷ୍ମ ଛୁଟି ରହିବ । ୮୨ ଦିନ ଛୁଟି ମଧ୍ୟରୁ ୯ ଦିନ ସ୍କୁଲରେ ଉତ୍ସବ ପାଳନ କରାଯିବ । ଯେପରିକି ସରସ୍ବତୀ ପୂଜା, ନେତାଜୀ ଜୟନ୍ତୀ, ସାଧାରଣତନ୍ତ୍ର ଦିବସ, ଉତ୍କଳ ଦିବସ, ସ୍ୱାଧୀନତା ଦିବସ, ଗୁରୁ ଦିବସ, ଗଣେଶ ପୂଜା, ଗାନ୍ଧୀ ଜୟନ୍ତୀ ଓ ଶିଶୁ ଦିବସ । ଉକ୍ତ ଦିନଗୁଡ଼ିକ ସ୍କୁଲ ଖୋଲା ରହିବ ଏବଂ ଶିକ୍ଷକ/ ଶିକ୍ଷୟିତ୍ରୀ ବିଦ୍ୟାଳୟକୁ ଆସିବେ ।୨୦୨୧ରେ ଗ୍ରୀଷ୍ମ ଛୁଟି ବ୍ୟତୀତ ଚଳିତବର୍ଷ ୯ ଦିନ ପୂଜା ଛୁଟି ରହିବ । ଅକ୍ଟୋବର ୧୧ରୁ ୨୦ତାରିଖ ଯାଏ ପୂଜା ଛୁଟି, ଡିସେମ୍ବର ୨୩ରୁ ୩୧ ତାରିଖ ପର୍ଯ୍ୟନ୍ତ ବଡ଼ଦିନ ଛୁଟି ହେବ ବୋଲି ସୂଚନା ଦିଆଯାଇଛି । ଅନ୍ୟ ଛୁଟି ଦିନଗୁଡ଼ିକ ଗୋଟିଏ ଦିନ ଲେଖାଏଁ ରହିଛି । ଦୁଇଟି ସ୍ଥାନୀୟ ଛୁଟି(‌ଲୋକାଲ ହଲିଡେ’) ରହିଛି । ଆବଶ୍ୟକତାକୁ ଦୃଷ୍ଟିରେ ରଖି ସ୍କୁଲ କର୍ତୃପକ୍ଷମାନେ ଜାନୁଆରି ୨୦ ସୁଦ୍ଧା ସ୍ଥାନୀୟ ଛୁଟି ତାଲିକା ବ୍ଲକ ଶିକ୍ଷା ଅଧିକାରୀ(ବିଇଓ)ଙ୍କ ନିକଟରେ ଦାଖଲ କରିବେ । ଦୋଳ ପୂର୍ଣ୍ଣିମା, ସ୍ୱାଧୀନତା ଦିବସ, ଝୁଲଣ ପୂର୍ଣ୍ଣିମା, ଗୁରୁ ଦିବସ ଓ ଶିଶୁ ଦିବସ ରବିବାର ପଡ଼ୁଥିବାରୁ ଉକ୍ତ ଦିନଗୁଡ଼ିକୁ ଛୁଟି ତାଲିକାରେ ସ୍ଥାନିତ କରାଯାଇ ନାହିଁ ।