ପୂର୍ବଭଳି ପରୀକ୍ଷା ଦେବେ ଛାତ୍ରଛାତ୍ରୀ CBSE ବୋର୍ଡ ପରୀକ୍ଷା

ସତ୍ୟଶିଖା (ନୂଆଦିଲ୍ଲୀ) ୦୩/୧୨/୨୦୨୦ : ଅନଲାଇନ୍‌ରେ ହେବନାହିଁ ସିବିଏସଇର ବୋର୍ଡ ପରୀକ୍ଷା । ୨୦୨୧ରେ ହେବାକୁ ଥିବା ପରୀକ୍ଷା ଲିଖିତ ଭାବେ ଦେବେ ଛାତ୍ରଛାତ୍ରୀ । ସିବିଏସଇ ଅଧିକାରୀ ଏ ନେଇ ସ୍ପଷ୍ଟ କରିବା ସହ କରିଛନ୍ତି ଯେ, ବୋର୍ଡ ପରୀକ୍ଷା ଅନଲାଇନ୍‌ରେ କରିବା ନେଇ କୌଣସି ପ୍ରସ୍ତାବ ନାହିଁ । ବୋର୍ଡ ପରୀକ୍ଷା ଗତ ବର୍ଷ ଭଳି ସାମାନ୍ୟ ଲିଖିତ ଭାବେ କରାଯିବ । ମାତ୍ର ଏପର୍ଯ୍ୟନ୍ତ ପରୀକ୍ଷା ତାରିଖ ଧାର୍ଯ୍ୟ ହୋଇନାହିଁ । ସିବିଏସଇ ଅଧିକାରୀ କହିଛନ୍ତି ଯେ, ୨୦୨୧ରେ ବୋର୍ଡ ପରୀକ୍ଷା ଅନଲାଇନ୍‌ରେ ନୁହେଁ ବରଂ ସାମାନ୍ୟ ଲିଖିତ ଭାବେ ହେବ ।ଶିକ୍ଷା ମନ୍ତ୍ରଣାଳୟ ଅନୁଯାୟୀ, ଛାତ୍ରଛାତ୍ରୀଙ୍କ ବିକାଶ ଏବଂ ଉଜ୍ବଳ ଭବିଷ୍ୟତ ପାଇଁ ପରୀକ୍ଷା ଆୟୋଜନ କରିବା ଅତ୍ୟନ୍ତ ଜରୁରୀ । ଚଳିତ ବର୍ଷ ପରୀକ୍ଷା ଆୟୋଜନକୁ ନେଇ ଛାତ୍ରଛାତ୍ରୀ, ଅଭିଭାବକ ଏବଂ ଶିକ୍ଷକଙ୍କ ମଧ୍ୟରେ ନାନାଦି ଚର୍ଚ୍ଚା ହେଉଥିଲା । କୋଭିଡ୍ କଟକଣା ଯୋଗୁଁ ଏପର୍ଯ୍ୟନ୍ତ ସାରାଦେଶରେ ସ୍କୁଲ, କଲେଜ ସମ୍ପୂର୍ଣ୍ଣ ଭାବେ ଖୋଲାଯାଇନାହିଁ । ବୋର୍ଡ ପରୀକ୍ଷାର ପଞ୍ଜୀକରଣଠାରୁ ଶ୍ରେଣୀ ପରିଚାଳନା ପର୍ଯ୍ୟନ୍ତ ସମସ୍ତ କାର୍ଯ୍ୟ ଭର୍ଚୁଆଲ ଅଥବା ଅନଲାଇନ୍‌ରେ ସଞ୍ଚାଳିତ ହେଉଛି ।ଏହା ପୂର୍ବରୁ କେନ୍ଦ୍ର ଶିକ୍ଷା ମନ୍ତ୍ରୀ ଡ. ରମେଶ ପୋଖରିଆଲ ନିଶଙ୍କ କହିଥିଲେ ଯେ, ଲଗାତର ସ୍କୁଲ, କଲେଜଠାରୁ ଦୂରରେ ରହୁଥିବା ଛାତ୍ରଛାତ୍ରୀଙ୍କ ପାଇଁ ଅନଲାଇନ୍‌ରେ ପାଠ ପଢିବା ଏକ ବଡ ଚ୍ୟାଲେଞ୍ଜ । ମାତ୍ର ଏହି ଚ୍ୟାଲେଞ୍ଜକୁ ମାତ୍ ଦେବା ପାଇଁ ଛାତ୍ରଛାତ୍ରୀଙ୍କୁ ସବୁବେଳେ ପ୍ରସ୍ତୁତ ରହିବା ଉଚିତ୍ ବୋଲି ସେ କହିଥିଲେ ।