ରାଜ୍ୟ ସ୍ତରୀୟ ବ୍ୟାଙ୍କର୍ସ କମିଟି ବୈଠକ

ସତ୍ୟଶିଖା (ଭୁବନେଶ୍ୱର) ୨୯/୧୨/୨୦୨୦ : ଋଣ ଜମା ଅନୁପାତରେ ରାଜ୍ୟର ନଅଟି ଜିଲ୍ଲା ୪୦ ପ୍ରତିଶତରୁ ନିମ୍ନ ସ୍ତରରେ ରହିଥିବା ନେଇ ଅର୍ଥମନ୍ତ୍ରୀ ନିରଞ୍ଜନ ପୁଜାରୀ ଉଦ୍‌ବେଗ ପ୍ରକାଶ କରିଛନ୍ତି । ଏଥିରେ ଉନ୍ନତି ଆଣିବା ଲାଗି ପ୍ରୟାସ କରିବାକୁ ସେ ବ୍ୟାଙ୍କଗୁଡ଼ିକୁ କହିଛନ୍ତି । ଅନୁଗୁଳ, ଦେବଗଡ଼, ଗଜପତି, ଗଞ୍ଜାମ, ଜଗତସିଂହପୁର, କେନ୍ଦ୍ରାପଡ଼ା କେନ୍ଦୁଝର, ମାଲକାନଗିରି ଓ ପୁରୀରେ ଋଣ ଜମା ଅନୁପାତ ୪୦%ରୁ କମ୍ ରହିଛି । ଆଜି ଭର୍ଚୁଆଲ୍ ମାଧ୍ୟମରେ ଅନୁଷ୍ଠିତ ହୋଇଥିବା ରାଜ୍ୟ ସ୍ତରୀୟ ବ୍ୟାଙ୍କର୍ସ କମିଟି ବୈଠକରେ ଯୋଗ ଦେଇ କୃଷି, ଲଘୁ, କ୍ଷୁଦ୍ର ଓ ମଧ୍ୟମ ଉଦ୍ୟୋଗ (ଏମ୍ଏସ୍‌ଏମ୍‌ଇ) ଓ ସ୍ବୟଂ ସହାୟକ ଗୋଷ୍ଠୀ (ଏସ୍‌ଏଚ୍‌ଜି)କୁ ଅଧିକ ଋଣ ଦେବାକୁ ଶ୍ର ପୂଜାରୀ ବ୍ୟାଙ୍କଗୁଡ଼ିକୁ ଆହ୍ବାନ ଦେଇଛନ୍ତି । ଚଳିତ ମାସ ୨୨‌ରେ ଏନେଇ ସମସ୍ତ ଜିଲ୍ଲାପାଳ ଓ ବ୍ୟାଙ୍କଗୁଡ଼ିକୁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଯେଉଁ ଆହ୍ବାନ ଦେଇଥିଲେ ତାହାକୁ ଶ୍ରୀ ପୂଜାରୀ ମନେ ପକାଇ ଦେଇଛନ୍ତି । ରାଜ୍ୟର ବାର୍ଷିକ ଋଣ ଯୋଜନାରେ ଏସ୍‌ଏଚ୍‌ଜି ୬୫%, ଏମ୍ଏସ୍‌ଏମ୍ଇ ୬୦% ଓ କୃ‌ଷି ଏବଂ ଆନୁଷଙ୍ଗିକ କ୍ଷେତ୍ର ୪୬ ପ୍ରତିଶତ ସଫଳତା ପାଇଛନ୍ତି । ଋଣ ଯୋଜନା ଲକ୍ଷ୍ୟ ହାସଲ ଲାଗି ସମସ୍ତ ଉଦ୍ୟମ ହେଲେ ରାଜ୍ୟର ସାମଗ୍ରିକ ବିକାଶ ହୋଇପାରିବ ବୋଲି ସେ କହିଛନ୍ତି ।୨୦୨୦-୨୧ ଆର୍ଥିକ ବର୍ଷ ପାଇଁ ୯୦,୩୯୫.୬୯ କୋଟି ଟଙ୍କାର ବାର୍ଷିକ ଋଣ ପ୍ରଦାନ ଲକ୍ଷ୍ୟ ଧାର୍ଯ୍ୟ କରାଯାଇଛି । ସେଥି ମଧ୍ୟରୁ ନଭେମ୍ବର ୩୦ ସୁଦ୍ଧା ୪୧,୨୨୭.୯୬ କୋଟି ଟଙ୍କା ପ୍ରଦାନ କରାଯାଇଛି ଯାହା ମୂଳ ଲକ୍ଷ୍ୟର ୪୫.୬୧ ପ୍ରତିଶତ ସହ ସମାନ । ମତ୍ସ୍ୟଚାଷ ଓ ଦୁଗ୍ଧ ଉତ୍ପାଦନ କ୍ଷେତ୍ରରେ ଅନେକ ସମ୍ଭାବନା ରହିଥିଲେ ମଧ୍ୟ ‌ସେହି କ୍ଷେତ୍ରଗୁଡ଼ିକର ଉନ୍ନତି ହୋଇପାରୁନାହିଁ । ଷ୍ଟାଣ୍ଡ୍‌ଅପ୍‌ ଇଣ୍ଡିଆ ମାର୍ଗଦର୍ଶିକା ଅନୁସାରେ ପ୍ରତିଟି ସିଡ୍ୟୁଲଡ୍‌ ବ୍ୟାଙ୍କ ଅନୁସୂଚିତ ଜନଜାତି/ ଅନୁସୂଚିତ ଜାତିର ଜଣେ ଜଣେ ମହିଳାଙ୍କୁ ଋଣ ଯୋଗାଇ ଦେବାକୁ ଅର୍ଥ ବିଭାଗର ପ୍ରମୁଖ ସଚିବ ଏ କେ ମୀନା କହିଛନ୍ତି । କୃଷି କ୍ଷେତ୍ରରେ ହିତାଧିକାରୀ ଓ ଭାଗଚାଷୀମାନଙ୍କୁ ଚିହ୍ନଟ କରି ଋଣ ଯୋଗାଇ ଦେବା, ମୁଖ୍ୟମନ୍ତ୍ରୀ କୃଷି ଉଦ୍ୟୋଗ ଯୋଜନା ଓ ବଳାରାମ ଯୋଜନାରେ ଚାଷୀମାନଙ୍କୁ ଋଣ ସହାୟତା ଯୋଗାଇ ଦେବା , ମୁଦ୍ରା ଯୋଜନାରେ ଅଧିକ ହିତାଧିକାରୀଙ୍କୁ ସାମିଲ କରିବା ଏବଂ ଏମ୍ଏସ୍‌ଏମ୍ଇ କ୍ଷେତ୍ରରେ ଦକ୍ଷିଣ ଓଡ଼ିଶାରେ ଥିବା ଜିଲ୍ଲାଗୁଡ଼ିକ ପ୍ରତି ବିଶେଷ ଧ୍ୟାନ ଦେବାକୁ ବୈଠକରେ ବ୍ୟାଙ୍କଗୁଡ଼ିକୁ କୁହାଯାଇଛି । କୃଷି, ଏସ୍‌ଏଚ୍‌ଜି ଓ ଏମ୍ଏସ୍‌ଏମ୍‌ଇ କ୍ଷେତ୍ରରେ ଗୁରୁତ୍ବପୂର୍ଣ୍ଣ ଭୂମିକା ନିର୍ବାହ କରୁଥିବା ବ୍ୟାଙ୍କଗୁଡ଼ିକୁ ରାଜ୍ୟ ସରକାର ପୁରସ୍କୃତ କରିବେ ବୋଲି ବୈଠକରେ କୁହାଯାଇଛି ।