ସତ୍ୟଶିଖା(ଭୁବନେଶ୍ୱର )୦୨.୧୧ .୨୦୨୧: ଆଜିଠୁ ଆରମ୍ଭ ହେବ ‘ହର ଘର ଦସ୍ତକ’ କାର୍ଯ୍ୟକ୍ରମ । ଏହି ଅଭିଯାନ ଅଧୀନରେ ସ୍ୱାସ୍ଥ୍ୟସେବା କର୍ମଚାରୀମାନେ ଯୋଗ୍ୟ ପ୍ରାର୍ଥୀଙ୍କୁ ଟୀକାକରଣ କରିବା ପାଇଁ ଘର ଦ୍ୱାରକୁ ଯିବେ। ଗତ କିଛି ଦିନ ଧରି ଟୀକାକରଣ ଅଭିଯାନ ଖରାପ ପ୍ରଦର୍ଶନ କରୁଥିବା ଜିଲ୍ଲାମାନଙ୍କରେ ସମ୍ପୂର୍ଣ୍ଣ ଟୀକାକରଣ ଦିଗରେ ଲକ୍ଷ୍ୟ ରଖାଯାଇଛି । ଗତ ସପ୍ତାହରେ ରାଜ୍ୟ ସରକାରଙ୍କ ସହ କୋଭିଡ -୧୯ ସମୀକ୍ଷା ବୈଠକ ପରେ କେନ୍ଦ୍ର ସ୍ୱାସ୍ଥ୍ୟମନ୍ତ୍ରୀ ମାନସୁଖ ମାଣ୍ଡବିଅ ଟୀକାକରଣକୁ ବ୍ୟାପକ କରିବା ପାଇଁ \’ହର ଘର ଦସ୍ତକ\’ ଅଭିଯାନ ଆରମ୍ଭ କରିବାକୁ ସୂଚନା ଦେଇଥିଲେ।
କରୋନା ମହାମାରୀ ରୋକିବା ପାଇଁ ଟିକାକରଣ ଏକମାତ୍ର ଉପାୟ ବୋଲି କୁହାଯାଉଛି । ଏପରିସ୍ଥଳେ ଗ୍ରାମାଞ୍ଚଳରେ ବହୁ – ଲୋକ ଏଯାଏ ଆଦୌ ଟିକା ନେଇ ନ ଥିବା ଦେଖାଯାଇଛି । ସେପଟେ ଦ୍ବିତୀୟ ଡୋଜ୍ ଟିକା ନେଇ ନ ଥିବା ଲୋକଙ୍କ ସଂଖ୍ୟା ମଧ୍ୟ ଧୀରେ ଧୀରେ ବଢ଼ିବାରେ ଲାଗିଛି । ବର୍ତ୍ତମାନ ସୁଦ୍ଧା ରାଜ୍ୟରେ ୩୦ ଲକ୍ଷ ହିତାଧିକାରୀ ଦ୍ଵିତୀୟ ଡୋଜ୍ ଟିକା ନେଇ ନାହାନ୍ତି । ଏହାକୁ ଦୃଷ୍ଟିରେ ରଖ୍ ମଙ୍ଗଳବାରଠାରୁ ରାଜ୍ୟରେ ଟିକା ନେଇ ନ ଥିବା ବ୍ୟକ୍ତିଙ୍କୁ ଖୋଜା ଅଭିଯାନ ଆରମ୍ଭ ହେବ ।
ଏ ନେଇ ସୋମବାର ପରିବାର କଲ୍ୟାଣ ନିର୍ଦ୍ଦେଶକ ତଥା ଟିକାକରଣ ରାଜ୍ୟ ନୋଡାଲ ଅଫିସର ଡା . ବିଜୟ ପାଣିଗ୍ରାହୀ ସୂଚନା ଦେଇଛନ୍ତି । ସେ କହିଛନ୍ତି , ଆଶାକର୍ମୀମାନେ ଗାଁ ଗାଁରେ କୋଭିଡ୍ ଟିକା ନେଇ ନ ଥିବା ବ୍ୟକ୍ତିଙ୍କୁ ଖୋଜିବେ । ଏହାପରେ ଟିକା ନେଇ ନ ଥିବା ବ୍ୟକ୍ତିଙ୍କର ଏକ ତାଲିକା ପ୍ରକାଶ ପାଇବ । ଡିସେମ୍ବର ଶେଷ ସୁଦ୍ଧା ପ୍ରଥମ ଡୋଜ୍ ଟିକାକରଣ ସରିବ । ଏଥିପାଇଁ ଟିକା କେନ୍ଦ୍ର ତାଲିକା ବୃଦ୍ଧି କରାଯିବ । ଯେଉଁ ଗାଁରେ ଅଧିକ ଲୋକ ଟିକା ନେଇ ନାହାନ୍ତି ସେଠାରେ ଟିକାକରଣ କେନ୍ଦ୍ର ଖୋଲାଯିବ ବୋଲି ପରିବାର କଲ୍ୟାଣ ନିର୍ଦ୍ଦେଶକ କହିଛନ୍ତି ।
