ସତ୍ୟଶିଖା(ଭୁବନେଶ୍ୱର ) ୨୯.୧୨.୨୦୨୧: ଆସନ୍ତା ଜାନୁଆରୀ ୩ ତାରିଖରୁ ପିଲାଙ୍କୁ ଟିକାକରଣ କରାଯିବ । ସାରା ଦେଶରେ ୧୫ରୁ ୧୮ ବର୍ଷର ପିଲାଙ୍କୁ ଟିକାକରଣ କରାଯିବ । ଏନେଇ ରାଜ୍ୟରେ ସ୍ୱତନ୍ତ୍ର ଟିକାକରଣ କେନ୍ଦ୍ର ଖୋଲିବାକୁ ଜିଲ୍ଲା ପ୍ରଶାସନକୁ ନିର୍ଦ୍ଦେଶ ଦିଆଯାଇଛି । ଯେଉଁ କେନ୍ଦ୍ରରେ କେବଳ ୧୫ରୁ ୧୮ ବର୍ଷ ପିଲାଙ୍କୁ ଟିକା ଦିଆଯିବ । ଏନେଇ ପରିବାର କଲ୍ୟାଣ ନିର୍ଦ୍ଦେଶକ ବିଜୟ ପାଣିଗ୍ରାହୀ ସୂଚନା ଦେଇଛନ୍ତି ।
ସକାଳ ୮ଟାରୁ ଦିନ ୧ଟା ପର୍ଯ୍ୟନ୍ତ ପିଲାଙ୍କୁ ଟିକା ଦିଆଯିବ । ଅପରାହ୍ନରେ ଅନ୍ୟମାନଙ୍କୁ ଟିକା ଦିଆଯିବ । ୨୦୦୭ ପୂର୍ବରୁ ଜନ୍ମଗ୍ରହଣ କରିଥିବା ପିଲାଙ୍କୁ କେବଳ ଟିକା ଦିଆଯିବ । ତେବେ ଯେଉଁ ପିଲାଙ୍କର ଅନ୍ୟ କୌଣସି ପ୍ରମାଣପତ୍ର ନଥିବ ସେମାନେ ସ୍କୁଲ ଆଇ କାର୍ଡ ଦେଖାଇ ପଞ୍ଜୀକରଣ କରିବା ସହ ଟିକା ନେଇପାରିବେ ।
ଆସନ୍ତା ଜାନୁଆରୀ ପହିଲାରୁ ଅନଲାଇନରେ ୧୫ ରୁ ୧୮ ବର୍ଷ ବୟସ୍କ ପିଲା ପଞ୍ଜୀକରଣ କରିପାରିବେ । ସେହିପରି ଆସନ୍ତା ୩ ତାରିଖରେ ଅନସାଇଟରେ ପଞ୍ଜୀକରଣ କରି ଟିକା ନେଇପାରିବେ । ୧୫ରୁ ୧୮ ବର୍ଷ ପିଲାଙ୍କୁ କୋଭାକ୍ସିନର ଦୁଇଟି ଡୋଜ ଟିକା ଦିଆଯିବ । ପ୍ରଥମ ଡୋଜ ନେବାର ୨୮ ଦିନ ପରେ ଦ୍ବିତୀୟ ଡୋଜ ଟିକା ଦିଆଯିବ । ଏହାବାଦ ସ୍କୁଲରେ ସ୍ୱତନ୍ତ୍ର ଟିକା କେନ୍ଦ୍ର ଖୋଲିବ କି ନାହିଁ ତାହାର ନିଷ୍ପତ୍ତି ଜିଲ୍ଲା ପ୍ରଶାସନ ନେବ ବୋଲି ବିଜୟ ମହାପାତ୍ର କହିଛନ୍ତି ।
