ସତ୍ୟଶିଖା ୫ .୦୯.୨୦୨୦ : ସାରା ଦେଶରେ କରୋନା ମହାମରୀ ପାଇଁ ଅନେକ କାର୍ଯ୍ୟ ବାଧାପ୍ରାପ୍ତ ହୋଇଛି । ଅନେକ ଲୋକ ନିଜର ଜୀବନ ଜୀବିକା ହରାଇଛନ୍ତି । ହେଲେ ଦେଶର ଖରିଫ କୃଷି କାର୍ଯ୍ୟରେ ଏହା କୌଣସି ବାଧା ସୃଷ୍ଟି କରିନାହିଁ ବୋଲି କେନ୍ଦ୍ର କୃଷି ମନ୍ତ୍ରୀ ନରେନ୍ଦ୍ର ସିଂ ତୋମର ସୂଚନା ଦେଇଛନ୍ତି । ଦେଶରେ ଚଳିତବର୍ଷ ମୌସୁମୀ ଜନିତ ଭଲ ବର୍ଷା ହେବାରୁ ଚାଷ କାର୍ଯ୍ୟ ବୃଦ୍ଧି ହୋଇଛି । ବର୍ତ୍ତମାନର ଖରିଫ ଋତୁରେ ପ୍ରାୟ 1095 ଲକ୍ଷ ହେକ୍ଟରରୁ ଅଧିକ ଜମିରେ ରେକର୍ଡ ସଂଖ୍ୟକ ଚାଷ ହୋଇଛି । ବର୍ତ୍ତମାନ ସୁଦ୍ଧା ଡାଲି, କଠିନ ଶସ୍ୟ, ତେଲ ଜାତୀୟ ଶସ୍ୟର ଚାଷ ପ୍ରକ୍ରିୟା ପ୍ରାୟ ଶେଷ ହୋଇଥିବାବେଳେ କେତେକ ସ୍ଥାନରେ ଧାନ ଚାଷ କାର୍ଯ୍ୟ ଜାରି ରହିଛି ।
କରୋନାର କୌଣସି ପ୍ରଭାବ ଚାଷ ଉପରେ ପଡ଼ିନାହିଁ । ଚାଷୀଙ୍କୁ ଉପଯୁକ୍ତ ସମୟରେ ବିହନ, କୀଟନାଶକ, ସାର, ଯନ୍ତ୍ରପାତି ଏବଂ ଋଣ ପରି ସୁବିଧା କରାଯାଇ ଥିବାରୁ ଏହା ସମ୍ଭବ ହୋଇ ପାରିଛି । ଉଭୟ କେନ୍ଦ୍ର ଏବଂ ରାଜ୍ୟ ସରକାରଙ୍କ ଦ୍ୱାରା କୃଷି କାର୍ଯ୍ୟ ପାଇଁ ଅନେକ ସୁବିଧା କରାଯାଇଛି । ଚାଷୀଙ୍କ ପରିଶ୍ରମ ଏବଂ ସେମାନଙ୍କର ନିଷ୍ଠା ପାଇଁ ଏହା ସମ୍ଭବ ହୋଇ ପାରିଛି । ଗତ ବର୍ଷର ସମାନ ଅବଧିରେ ଧାନ ଚାଷ 365 ଲକ୍ଷ ହେକ୍ଟର କରାଯାଇଥିବା ବେଳେ ଚଳିତବର୍ଷ ଏହା 396 ଲକ୍ଷ ହେକ୍ଟରକୁ ବୃଦ୍ଧି ହୋଇଛି । ସେହିପରି ଗତ ବର୍ଷ ଡାଲି 130 ଲକ୍ଷ ହେକ୍ଟର କରାଯାଇଥିବା ବେଳେ ଚଳିତ ବର୍ଷ ଏହା 136 ଲକ୍ଷ ହେକ୍ଟରକୁ ବୃଦ୍ଧି ହୋଇଛି ।
