ଝଲସିଲା ପୁରୀ ବାଇପାସ୍‌ ରାସ୍ତା

ସତ୍ୟଶିଖା (ଭୁବନେଶ୍ୱର) ୦୪/୦୨/୨୦୨୧ : ବହୁପ୍ରତୀକ୍ଷିତ ଭୁବନେଶ୍ୱର-ପୁରୀ ବାଇପାସ୍‌ ରାସ୍ତା ଶେଷରେ ଆଲୋକିତ ହୋଇଛି । ପର୍ଯ୍ୟଟନ ବିଭାଗ ପକ୍ଷରୁ ବିଏମ୍‌ସି ସହାୟତାରେ ୨.୮୫ କୋଟି ଟଙ୍କାରେ ସପ୍ତସତୀ ମନ୍ଦିର ନିକଟରୁ ଲିଙ୍ଗିପୁର ପର୍ଯ୍ୟନ୍ତ ୧୨ କିଲୋମିଟର ରାସ୍ତାରେ ହୋଇଥିବା ଆଲୋକୀକରଣ ପ୍ରକଳ୍ପକୁ ବୁଧବାର ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଲୋକାର୍ପିତ କରିଛନ୍ତି ।

ସନ୍ଧ୍ୟାରେ ଟଙ୍କପାଣି ରୋଡ୍‌ ନିକଟସ୍ଥ ସାଇ ମନ୍ଦିର ଛକରେ ସୁଇଚ୍‌ ଟିପି ଏହି ପ୍ରକଳ୍ପକୁ ଲୋକାର୍ପଣ କରିବା ଅବସରରେ ମୁଖ୍ୟମନ୍ତ୍ରୀ କହିଛନ୍ତି ଯେ, ଏଲ୍‌ଇଡି ଲାଇଟ୍‌ ଲାଗିଥିବାରୁ ବିଦ୍ୟୁତ ଖର୍ଚ୍ଚ କମ୍‌ ହେବ । ଏହି ରାସ୍ତା ଆଲୋକିତ ହେବା ଦ୍ୱାରା ଗାଡ଼ିଚାଳକ ଓ ପଥଚାରୀଙ୍କ ଯାତାୟାତ ଅଧିକ ନିରାପଦ ହେବ, ସଡ଼କ ଦୁର୍ଘଟଣା କମିବା ସହିତ ଚୋରି ଓ ଲୁଟ୍‌ପାଟ୍ ଭଳି ଆପରାଧିକ କାର୍ଯ୍ୟକଳାପ କମିବ ।

କାର୍ଯ୍ୟକ୍ରମରେ ନଗର ଉନ୍ନୟନ ମନ୍ତ୍ରୀ ପ୍ରତାପ ଜେନା ଅତିଥି ଭାବେ ଯୋଗଦେଇ କହିଥିଲେ ଯେ ଏହି ରାସ୍ତା ପୂର୍ବରୁ ନ ଥିଲା । ମୁଖ୍ୟମନ୍ତ୍ରୀଙ୍କ ଉଦ୍ୟମରୁ ଭୁବନେଶ୍ୱର ସହର ଭିତରର ଭିଡ଼ କମାଇବା ପାଇଁ ଏହି ବାଇପାସ୍‌ ନିର୍ମାଣ ହୋଇଥିଲା । ରାସ୍ତାର ଉଭୟ ପାର୍ଶ୍ବରେ ଗଢ଼ି ଉଠିଥିବା ଜନବସତିକୁ ପିଇବା ପାଣି, ରାସ୍ତା, ସ୍ବେରେଜ୍‌ ଓ ଡ୍ରେନ୍ ସୁବିଧା ଯୋଗାଇବାକୁ ମୁଖ୍ୟମନ୍ତ୍ରୀ ନିର୍ଦ୍ଦେଶ ଦେଇଛନ୍ତି । ଏହା ନିଶ୍ଚିତ କାର୍ଯ୍ୟକାରୀ ହେବ ।

ସାମାଜିକ ସୁରକ୍ଷା ଓ ଭିନ୍ନକ୍ଷମ ସଶକ୍ତୀକରଣ ମନ୍ତ୍ରୀ ଅଶୋକ ଚନ୍ଦ୍ର ପଣ୍ଡା କହିଥିଲେ ଯେ ଏହି ଅଞ୍ଚଳର ଐତିହ୍ୟ ମହାନ । ମହାତ୍ମା ଗାନ୍ଧୀଙ୍କ ଓଡ଼ିଶା ଗସ୍ତର ଶହେ ବର୍ଷ ପୂର୍ତ୍ତି ଆମେ ପାଳନ କରୁଛୁ । ସମସ୍ତେ ଜାଣିବା ଦରକାର ଯେ ଗାନ୍ଧୀଜୀ ଦ୍ଵିତୀୟଥର ପାଇଁ ଯେତେବେଳେ ଓଡ଼ିଶା ଗସ୍ତରେ ଆସିଥିଲେ, ସେତେବେଳେ ଏହି ଅଞ୍ଚଳ ଦେଇ ଆସିଥିଲେ । ସତ୍ୟଭାମାପୁର, ସରଦେଇପୁର ଡାକବଙ୍ଗଳା ମଧ୍ୟ ଦେଇ ପଦଯାତ୍ରା କରିଥିଲେ । ଆଜି ଏହି ରାସ୍ତାର ଆଲୋକୀକରଣ ହେବା ଅତ୍ୟନ୍ତ ଖୁସିର କଥା । ମୁଖ୍ୟମନ୍ତ୍ରୀ ଓ ବିଜେଡିର କିଛି ସାଂସଦଙ୍କ ଉଦ୍ୟମରେ ଏହି ପ୍ରକଳ୍ପ ସଫଳ ହୋଇପାରିଛି । କିନ୍ତୁ ନିକଟରେ ଆମ ସଂସଦୀୟ କ୍ଷେତ୍ରରୁ ମୁଁ ଯେଉଁ ସହଯୋଗ ଆଶା କରିଥିଲି, ତାହା ମିଳିନାହିଁ । ଭୁବନେଶ୍ୱର (ମଧ୍ୟ) ବିଧାୟକ ଅନନ୍ତ ନାରାୟଣ ଜେନା କହିଲେ ଯେ ଭୁବନେଶ୍ୱରରେ ଯେତେ ସ୍ଥାନରେ ଆଲୋକୀକରଣ ବ୍ୟବସ୍ଥା କରାଯାଇଛି, ଏହା ସବୁଠୁ ବଡ଼ । ବହୁ ବାଧା ସତ୍ତ୍ବେ ଏହି ଆଲୋକୀକରଣ ପ୍ରକ୍ରିୟା ହୋଇପାରିଥିବାରୁ ଭୁବନେଶ୍ୱର ଉତ୍ତର ବିଧାୟକ ସୁଶାନ୍ତ ରାଉତ ମୁଖ୍ୟମନ୍ତ୍ରୀଙ୍କୁ ଧନ୍ୟବାଦ ଦେଇଥିଲେ । ନଗର ଉନ୍ନୟନ ବିଭାଗର ପ୍ରମୁଖ ସଚିବ ଜି.ମାଥିଭାଥନନ୍ ମଧ୍ୟ ଉପସ୍ଥିତ ଥିଲେ । କାର୍ଯ୍ୟକ୍ରମ ଆରମ୍ଭରେ ବିଏମ୍‌ସି ପ୍ରଶାସକ ସଂଗ୍ରାମଜିତ ନାୟକ ସ୍ବାଗତ ଭାଷଣ ଦେଇଥିବା ବେଳେ କମିସନର ପ୍ରେମଚନ୍ଦ୍ର ଚୌଧରୀ ଧନ୍ୟବାଦ ଦେଇଥିଲେ । ଛକଛକରେ ଚିତ୍ତାକର୍ଷକ ସାଂସ୍କୃତିକ କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା ।

ସୂଚନାଯୋଗ୍ୟ ଯେ ଏହି ରାସ୍ତାରେ ୩୮୭ଟି ଖୁଣ୍ଟରେ ୧୨୦ ୱାଟ୍‌ ବିଶିଷ୍ଟ ୭୭୪ଟି ଏଲ୍‌ଇଡି ଲାଇଟ୍‌ ଲାଗିଥିବା ବେଳେ ଲିଙ୍ଗିପୁର, କେଶୁରା ଓ ପାଣ୍ଡରା ଛକଠାରେ ୩ଟି ହାଇମାଷ୍ଟ୍‌ ଲାଇଟ୍‌ ଲାଗିଛି । ବିଏମ୍‌ସି ପକ୍ଷରୁ କୁହାଯାଇଛି ଯେ ରାଜଧାନୀରେ ଏବେ ପ୍ରାୟ ୪୦ ହଜାର ଏଲ୍‌ଇଡି ଷ୍ଟ୍ରିଟ୍‌ ଲାଇଟ୍‌ ଲାଗିଥିବା ବେଳେ ସହରର ୬୭ଟି ୱାର୍ଡରେ ବିଭିନ୍ନ ଅଞ୍ଚଳରେ ଆହୁରି ଷ୍ଟ୍ରିଟ୍‌ ଲାଇଟ୍‌ ଲାଗିବ । ପ୍ରତି ୱାର୍ଡରେ ଆଲୋକୀକରଣ ପାଇଁ ୧୦ଲକ୍ଷ ଟଙ୍କା ଲେଖାଏଁ ଖର୍ଚ୍ଚ ହେବ । ଏଥିପାଇଁ ୬.୭କୋଟି ଟଙ୍କା ମଞ୍ଜୁର ହୋଇଛି ।