ସତ୍ୟଶିଖା(ଭୁବନେଶ୍ୱର ) ୦୪.୦୧.୨୦୨୨ : ରାଜ୍ୟର ବିଭିନ୍ନ ସ୍ଥାନରେ ଏବେ ପାରଦ ଖସିବାରେ ଲାଗିଛି । ଏହାର ପ୍ରଭାବରେ ଶୀତ ଲହରୀ ସାରା ରାଜ୍ୟରେ ଜାରି ରହିଛି । ଗତ ୨୪ ଘଣ୍ଟାରେ ମଧ୍ୟ ଅଧିକାଂଶ ସ୍ଥାନର ତାପମାତ୍ରା ୧ରୁ ୩ ଡିଗ୍ରୀ ପର୍ଯ୍ୟନ୍ତ କମିଛି । ତେବେ ୭ ତାରିଖ ପରଠୁ ପୁଣି ତାପମାତ୍ରା ବଢ଼ିବା ସହ ଶୀତର ପ୍ରକୋପ କମିବ ବୋଲି ଭୁବନେଶ୍ୱର ସ୍ଥିତ ଆଞ୍ଚଳିକ ପାଣିପାଗ କେନ୍ଦ୍ରର ନିର୍ଦ୍ଦେଶକ ଏଚ୍ଆର୍ ବିଶ୍ୱାସ କହିଛନ୍ତି । ପାଣିପାଗ ବିଭାଗର ପୂର୍ବନୁମାନ ମୁତାବକ ଗତ ୨୪ ଘଣ୍ଟାରେ ରାଜ୍ୟର ସବୁ ଜିଲ୍ଲାରେ ପାଗ ପ୍ରାୟତଃ ଶୁଖିଲା ରହିଛି । ତେବେ ଦକ୍ଷିଣ ଆଭ୍ୟନ୍ତରୀଣ ଓଡ଼ିଶାର କିଛି ଜିଲ୍ଲାରେ କୁହୁଡ଼ି ଦେଖିବାକୁ ମିଳିଥିଲା । ଗଜପତି, ସୋନପୁର, କନ୍ଧମାଳ ଓ ବଲାଙ୍ଗିରର କିଛି ସ୍ଥାନରେ ଘନ କୁହୁଡ଼ି ଦେଖିବାକୁ ମିଳିଥିବା ବେଳେ ମାଲକାନଗିରିର କିଛି ସ୍ଥାନରେ ମଧ୍ୟମ ଧରଣର କୁହୁଡ଼ି ଦେଖିବାକୁ ମିଳିଥିଲା ।
ତାପମାତ୍ରା କଥା ଦେଖିଲେ ଟିଟିଲାଗଡ଼ ଠାରେ ଗତ ୨୪ ଘଣ୍ଟାରେ ସର୍ବନିମ୍ନ ୯.୩ ଡିଗ୍ରୀ ତାପମାତ୍ରା ରେକର୍ଡ ହୋଇଥିବା ବେଳେ ସୁନ୍ଦରଗଡ଼ର କିରେଇ ଠାରେ ୭.୫ ଡିଗ୍ରୀ ରେକର୍ଡ ହୋଇଛି । ସେହିଭଳି କେନ୍ଦୁଝରରେ ୯.୫ ଡିଗ୍ରୀ, ଫୁଲବାଣୀରେ ୧୦.୦ ଡିଗ୍ରୀ ଏବଂ ଦାରିଙ୍ଗବାଡ଼ିର ପାହାଡ଼ିଆ ଅଞ୍ଚଳରେ ତାପମାତ୍ରା ୭.୦ ଡିଗ୍ରୀ ରେକର୍ଡ ହୋଇଛି । ରାଜଧାନୀ ଭୁବନେଶ୍ୱରରେ ତାପମାତ୍ରା ରହିଥିଲା ୧୨.୯ ଡିଗ୍ରୀ; ଯାହାକି ସ୍ୱାଭାବିକ ଠାରୁ ୨ ଡିଗ୍ରୀ କମ୍ । ଗତ ୨୪ ଘଣ୍ଟାରେ ତାପମାତ୍ରାରେ ହୋଇଥିବା ପରିବର୍ତ୍ତନକୁ ଦେଖିଲେ କୋରାପୁଟ ଠାରେ ୩ ଡିଗ୍ରୀ, ସୋନପୁର ଠାରେ ୨.୯ ଡିଗ୍ରୀ, ବୌଦ୍ଧ ଠାରେ ୨.୫ ଡିଗ୍ରୀ, ଗଜପତି, ଅନୁଗୁଳ ଏବଂ ସୁନ୍ଦରଗଡ଼ରେ ୨ ଡିଗ୍ରୀ ଲେଖାଏଁ ତାପମାତ୍ରା ହ୍ରାସ ପାଇଛି । ଭୁବନେଶ୍ୱରରେ ମଧ୍ୟ ୧.୧ ଡିଗ୍ରୀ ତଳକୁ ଆସିଛି ତାପମାତ୍ରା ।
ମାଲକାନଗିରି ଓ ଛତ୍ରପୁର ଠାରେ ସର୍ବାଧିକ ୨୭ ଡିଗ୍ରୀ ତାପମାତ୍ରା ରେକର୍ଡ ହୋଇଛି । ପାଣିପାଗ ବିଭାଗର ସୂଚନା ଅନୁଯାୟୀ ଆଗାମୀ ୫ ଦିନ ରାଜ୍ୟରେ ମୁଖ୍ୟତଃ ପାଗ ଶୁଖିଲା ରହିବ । ତେବେ ଆଗାମୀ ଦୁଇଦିନରେ ଦକ୍ଷିଣ ଆଭ୍ୟନ୍ତରୀଣ ଓଡ଼ିଶାର କିଛି ଜିଲ୍ଲାରେ ଘନରୁ ମଧ୍ୟମ ଧରଣର କୁହୁଡ଼ି ଦୃଶ୍ୟମାନ ହୋଇପାରେ । ସର୍ବନିମ୍ନ ତାପମାତ୍ରାରେ ବିଶେଷ ପରିବର୍ତ୍ତନ ହେବାର ସମ୍ଭାବନା ପ୍ରାୟତଃ ନାହିଁ । ତେବେ କିଛି କିଛି ସ୍ଥାନରେ ତାପମାତ୍ରା ୨ରୁ ୩ ଡିଗ୍ରୀ ତଳକୁ ଖସିପାରେ । ମଙ୍ଗଳବାର ଭୁବନେଶ୍ୱରର ତାପମାତ୍ରା ୧୨ଡିଗ୍ରୀ ପାଖାପାଖି ରହିବା ନେଇ ଆକଳନ କରାଯାଇଛି । ଅନ୍ୟପଟେ ୭ ତାରିଖ ପରଠୁ ତାପମାତ୍ରା ପୁଣି ୨ରୁ ୩ ଡିଗ୍ରୀ ପର୍ଯ୍ୟନ୍ତ ବଢ଼ିବାର ସମ୍ଭାବନା ରହିଛି ।
