ଦେଶବ୍ୟାପୀ ବ୍ୟାଙ୍କ ଧର୍ମଘଟର ଦ୍ଵିତୀୟ ଦିନ : ଘରୋଇକରଣ ବିରୁଦ୍ଧରେ ୧୦ଲକ୍ଷ କର୍ମଚାରୀ ସାମିଲ, ବ୍ୟାଙ୍କ ସେବା ଗୁରୁତର ପ୍ରଭାବିତ
ସତ୍ୟଶିଖା ୧୬.୦୩.୨୦୨୧ : ବ୍ୟାଙ୍କଗୁଡିକର ଘରୋଇକରଣକୁ ନେଇ ଦେଶବ୍ୟାପୀ ବ୍ୟାଙ୍କ କର୍ମଚାରୀମାନଙ୍କ ଆନ୍ଦୋଳନ ମଙ୍ଗଳବାର ମଧ୍ୟ ଜାରି ରହିଛି । ଗତକାଲି ଅର୍ଥାତ ସୋମବାର ଭଳି ବିଭିନ୍ନ ବ୍ୟାଙ୍କ ସାମ୍ନାରେ ଆନ୍ଦୋଳନ ଜାରି ରଖିଛନ୍ତି ବ୍ୟାଙ୍କ କର୍ମଚାରୀ । ସରକାରୀ ବ୍ୟାଙ୍କଗୁଡିକୁ କେନ୍ଦ୍ର ସରକାର ଘରୋଇକରଣ କରୁଥିବାରୁ ଏହାର ପ୍ରତିବାଦରେ ୨ ଦିନିଆ ହରତାଳ ଘୋଷଣା କରିଥିଲେ ୯ଟି ବ୍ୟାଙ୍କର କର୍ମଚାରୀ ଏବଂ ଅଧିକାରୀଙ୍କ ସମେତ ୟୁନାଇଟେଡ୍ ଫୋରମ୍ ଅଫ୍ ବ୍ୟାଙ୍କ ୟୁନିଅନ ।
ଚଳିତ ବର୍ଷ ବଜେଟ ଉପସ୍ଥାପନ ବେଳେ ଅର୍ଥମନ୍ତ୍ରୀ ନିର୍ମଳା ସୀତାରମଣ ଘୋଷଣା କରିଥିଲେ ଯେ, କେନ୍ଦ୍ର ସରକାର ଚଳିତ ବର୍ଷ ୨ଟି ସରକାରୀ ବ୍ୟାଙ୍କ ଏବଂ ଗୋଟିଏ ଇନ୍ସ୍ୟୁରାନ୍ସ କମ୍ପାନୀକୁ ଘରୋଇକରଣ କରିବାକୁ ଯାଉଛନ୍ତି । ହରତାଳର ପ୍ରଥମ ଦିନରେ ଦେଶବ୍ୟାପୀ ବ୍ୟାଙ୍କ ସେବା ପ୍ରଭାବିତ ହୋଇଥିଲା । ଚେକ୍ କାରବାର, ଟଙ୍କା ଜମା ଏବଂ ଟଙ୍କା ଉଠାଣ ଭଳି ଗୁରୁତ୍ବପୂର୍ଣ୍ଣ କାର୍ଯ୍ୟ ପ୍ରଭାବିତ ହୋଇଥିଲା । ଏହି ୨ ଦିନିଆ ହରତାଳରେ ପ୍ରାୟ ୧୦ ଲକ୍ଷ ବ୍ୟାଙ୍କ କର୍ମଚାରୀ ଏବଂ ଅଧିକାରୀ ସାମିଲ ହୋଇଥିଲେ ।
