ସତ୍ୟଶିଖା(କଟକ) ୧୧/୧୨/୨୦୨୦ : ଚଳାଇ ପାରିଲେନି । ଶେଷରେ ଏହାକୁ ଅନ୍ୟ ନାଁରେ ରୂପାନ୍ତରିତ କରିଦେଲା ସ୍ଵାସ୍ଥ ବିଭାଗ । ଏସ୍ସିବି ପରିସରରେ ରହିଥିବା ପୂର୍ବଭାରତର ପ୍ରଥମ ଆଂଚଳିକ ମେରୁଦଣ୍ଡ ଆଘାତ କେନ୍ଦ୍ର (ଆରଏସ୍ଆଇସି)ର ନାଁ ବଦଳିଯିବ । ଏହାକୁ ପିଏମ୍ଆର(ଫିଜିକାଲ ମେଡିସିନ୍ ଏଣ୍ଡ ରିହାବିଲିଟେସନ୍) କେନ୍ଦ୍ର ଭାବେ ରୂପାନ୍ତରିତ କରାଯିବ । କେବଳ ସେତିକି ନୁହେଁ, ଆରଏସ୍ଆଇସି ଅଧୀନରେ ଚିକିତ୍ସିତ ହେଉଥିବା ରୋଗୀଙ୍କୁ ନିଦାନ ଓ ବିଜୁ ସ୍ଵାସ୍ଥ କଲ୍ୟାଣ ଯୋଜନାର ସୁଫଳ ମିଳୁ ନଥିବାରୁ ଏହାର ସମାଧାନ ପାଇଁ ମଧ୍ୟ ଗୁରୁତ୍ୱପୂର୍ଣ୍ଣ ନିଷ୍ପତ୍ତି ନିଆଯାଇଛି । ଏଣିକି ଅସ୍ଥିଶଲ୍ୟ ବିଭାଗ ଅଧୀନରେ ରୋଗୀ ଏହି ଯୋଜନାରେ ସାମିଲ ହେବା ସହିତ ସରକାରଙ୍କ ମାଗଣା ସୁବିଧାର ଲାଭ ପାଇପାରିବେ । ସପ୍ତାହକୁ ଦୁଇଦିନ ଓଟି ସହ ଭିତ୍ତିଭୂମିର ବିକାଶ ପାଇଁ ଅନେକ ଗୁରୁତ୍ୱପୂର୍ଣ୍ଣ ନିଷ୍ପତ୍ତି ଭୁବନେଶ୍ୱରରେ ଅନୁଷ୍ଠିତ ଉଚ୍ଚସ୍ତରୀୟ ବୈଠକରେ ନିଷ୍ପତ୍ତି ନିଆଯାଇଛି ।
ସୂଚନା ଅନୁସାରେ, ଏନ୍ଏମ୍ସି ଗାଇଡ୍ଲାଇନ୍ ଅନୁସାରେ ୨୦୨୨ ସୁଦ୍ଧା ସବୁ ମେଡିକାଲ କଲେଜରେ ପିଏମ୍ଆର(ଫିଜିକାଲ ମେଡିସିନ୍ ଏଣ୍ଡ ରିହାବିଲିଟେସନ୍) ବିଭାଗ ଖୋଲିବାକୁ ପଡିବ । ସେଥିପାଇଁ ଏସ୍ସିବି ଆଂଚଳିକ ମେରୁଦଣ୍ଡ ଆଘାତ କେନ୍ଦ୍ରକୁ ଏଭଳି ନୂଆ ରୂପ ଦେବାକୁ ସ୍ଵାସ୍ଥ ବିଭାଗ ପକ୍ଷରୁ ଯୋଜନା କରାଯାଇଛି । ତେବେ ଏନ୍ଏମ୍ସି ଗାଇଡ୍ଲାଇନ୍ ଅନୁସାରେ ଏହି ବିଭାଗ ଖୋଲିବା ପାଇଁ ଜଣେ ପ୍ରଫେସର, ଜଣେ ସହଯୋଗୀ ପ୍ରଫେସର, ୨ଜଣ ସହକାରୀ ପ୍ରଫେସର ଓ ୨ଜଣ ଏସ୍ଆର ରହିବା କଥା । କିନ୍ତୁ ସ୍ଵାସ୍ଥ ବିଭାଗ ବୈଠକରେ ନିଆଯାଇଥିବା ନିଷ୍ପତ୍ତି ଅନୁସାରେ ୩ଜଣ ମେଡିକାଲ ଅଫିସର, ଜଣେ ଫିଜିଓଥେରାପିଷ୍ଟ, ୭ଜଣ ଷ୍ଟାଫ୍ନର୍ସ, ଜଣେ ସି.ଆର୍ମ ଅପରେଟର ଓ ୨ଜଣ ୱାର୍ଡ ଆଟେଣ୍ଡାଣ୍ଟ୍ ପଦ ପୂରଣ କରାଯିବ । ସବୁଠାରୁ ଗୁରୁତ୍ୱପୂର୍ଣ୍ଣ ହେଲା, ମେଡିକାଲ ଅଫିସର ପଦରେ ଆସିଷ୍ଟାଣ୍ଟ ପ୍ରଫେସରଙ୍କୁ ନିଯୁକ୍ତ କରାଯିବ । ଏଥିସହ ସପ୍ତାହକୁ ୨ଦିନ ଓଟି, ଆଂଚଳିକ ମେରୁଦଣ୍ଡ ଆଘାତ କେନ୍ଦ୍ରରେ ଲିଫ୍ଟ ନଥିବାରୁ ଲିଫ୍ଟ ବ୍ୟବସ୍ଥା କରାଯିବା ଓ ୭ଜଣ ସୁରକ୍ଷାକର୍ମୀଙ୍କୁ ନିୟୋଜିତ କରାଯିବା ପାଇଁ ମଧ୍ୟ ବୈଠକରେ ନିଷ୍ପତ୍ତି ନିଆଯାଇଛି । ଏହି ବୈଠକରେ ଓଏସ୍ଏମ୍ସିର ଏମ୍ଡି, ଡିଏମ୍ଇଟି, ଅତିରିକ୍ତ ଡିଏମ୍ଇଟି, ଏସ୍ସିବିର ଡିନ୍ ଓ ପ୍ରନ୍ସିପାଲ, ଅଧୀକ୍ଷକ ଓ ଆରଏସ୍ଆଇସିର ନିର୍ଦ୍ଦେଶକ ପ୍ରମୁଖ ଉପସ୍ଥିତ ରହିଥିଲେ ।
ସୂଚନାଯୋଗ୍ୟ, ଏସ୍ସିବି ଆଂଚଳିକ ମେରୁଦଣ୍ଡ ଆଘାତ କେନ୍ଦ୍ର ହେଉଛି ପୂର୍ବ ଭାରତର ପ୍ରଥମ କେନ୍ଦ୍ର । ହେଲେ ଏଭଳି ଏକ ଉତ୍କୃଷ୍ଟ ମାନର ଭିତ୍ତିଭୂମି ଥିବା କେନ୍ଦ୍ରକୁ ଜାଣିଶୁଣି ପଙ୍ଗୁ କରି ଦିଆଗଲାଣି । ୧୧ବର୍ଷ ହେଲା କାମଚଳା ଅଧିକାରୀଙ୍କ କାନ୍ଧରେ ରହିଛି ଏହି କେନ୍ଦ୍ରର ଭାର । ଓପିଡିକୁ ବାଦ୍ ଦେଲେ ଏହି କେନ୍ଦ୍ରରେ ପାଖାପାଖି ୨୦/୨୫ଜଣ ରୋଗୀ ଚିକିତ୍ସା ହେବାର ବ୍ୟବସ୍ଥା ରହିଛି । କିନ୍ତୁ ସ୍ଥାୟୀ ନିର୍ଦ୍ଦେଶକ ନଥିବାରୁ ଏସ୍ସିବି ଅର୍ଥୋପେଡିକ୍ ବିଭାଗୀୟ ମୁଖ୍ୟ ପ୍ରଫେସର ଏହାର ଦାୟିତ୍ୱରେ ରହିଛନ୍ତି । ଅନ୍ୟପଟେ ଦୀର୍ଘବର୍ଷ ଧରି ଏପ୍ରକାର ଅବ୍ୟବସ୍ଥା ଲାଗି ରହିଥିବାରୁ ପରିଚାଳନା କମିଟି ବୈଠକ ବି ବସିପାରୁ ନାହିଁ । ଏପରିକି ନାନା ଅବ୍ୟବସ୍ଥା, କର୍ମଚାରୀଙ୍କ ଦରମା ଅସଂଗତି ଓ ବିଭିନ୍ନ ପ୍ରସଙ୍ଗକୁ ନେଇ ପ୍ରଶାସନିକ ନିଷ୍ପତ୍ତି ଅଟକି ରହିଥିବାରୁ ଏହି କେନ୍ଦ୍ର ଲୋକଙ୍କୁ ଯଥୋଚିତ୍ ସେବା ଯୋଗାଇ ପାରୁନି । ତିନିବର୍ଷ ପରେ ଗତ ଜୁଲାଇ ମାସରେ ବନ୍ଦ୍ ଓଟି ଖୋଲିଥିଲା ଓ ଆଜି ସୁଦ୍ଧା ୨ଟି ଅସ୍ତ୍ରୋପଚାର କରାଯାଇଛି ।
