ସତ୍ୟଶିଖା(ଭୁବନେଶ୍ୱର )୧୫.୦୯ .୨୦୨୧: ରାଜଧାନୀରେ ପଶ୍ଚିମବଙ୍ଗ ନିଶାବେପାରୀଙ୍କ ଆଡ୍ଡା ଜମୁଛି । ବସ୍ତି ଅଞ୍ଚଳରେ ଭଡ଼ାରେ ରହି ନିଶା ବେପାର ଚଳାଇଛନ୍ତି । ନିଜକୁ ଶ୍ରମିକ ପରିଚୟ ଦେଇ କୋଟିକୋଟି ଟଙ୍କା କାରବାର କରୁଛନ୍ତି । ଏମିତିକି ଚାଲିଚଳନରୁ ସାଧାରଣ ଲୋକ ଭଳି ଦିଶୁଛନ୍ତି । କିନ୍ତୁ ଅନ୍ଧାର ରାତିରେ ଏମାନେ ଅସଲ ଚରିତ୍ରକୁ ଆସିଯାଉଛନ୍ତି । ଏଭଳି ୨ଜଣ ନିଶାବେପାରୀଙ୍କୁ କ୍ରାଇମବ୍ରାଞ୍ଚର ଏସ୍ଟିଏଫ୍ ଟିମ୍ ଗିରଫ କରିଛି । ମଙ୍ଗଳବାର ଭୋର୍ ବେଳେ ଭୁବନେଶ୍ୱର ରସୁଲଗଡ଼ ଲେବେଲ କ୍ରସିଂ ନିକଟରୁ ଏମାନଙ୍କୁ ଗିରଫ କରାଯାଇଛି । ଏହାସହ ସେମାନଙ୍କ ଠାରୁ ୧କିଲୋ ୨୫ଗ୍ରାମ ବ୍ରାଉନସୁଗର ଜବତ ହୋଇଛି । ଯାହାର ବଜାର ମୂଲ୍ୟ ୧କୋଟିରୁ ଊର୍ଦ୍ଧ୍ୱ ଟଙ୍କା ହେବ ।
ଗିରଫ ଅଭିଯୁକ୍ତଦ୍ୱୟ ହେଲେ ପଶ୍ଟିମବଙ୍ଗ ଦକ୍ଷିଣ ୨୪ ପ୍ରାଗଣା ଜିଲା ଜିବନ୍ତୋଲା ଥାନା ଅଞ୍ଚଳର ରକିବୁଲ୍ ଲସ୍କର(୩୦) ଓ କୁଲତୋଲି ଥାନା ଅଞ୍ଚଳର ସୁଧାନ୍ୟ ଗାୟେନ୍(୪୪) । ଏନେଇ ଏସ୍ଟିଏଫ୍ ପୁଲିସ କେସ ନଂ ୩୨/୨୧ରେ ଏକ ମାମଲା ରୁଜୁ କରି ମଙ୍ଗଳବାର ଅଭିଯୁକ୍ତଦ୍ୱୟଙ୍କୁ କୋର୍ଟ ଚାଲାଣ କରିଛି । ତେବେ ଏମାନେ କେତେଦିନ ହେଲା ଏହି କାରବାରରେ କରୁଛନ୍ତି, ଏଥିରେ ଅନ୍ୟ କେଉଁମାନେ ସମ୍ପୃକ୍ତ ଅଛନ୍ତି, ଏଭଳି ବିଭିନ୍ନ ଦିଗକୁ ନେଇ ଏସ୍ଟିଏଫ୍ ଅନୁସନ୍ଧାନ ଜାରି ରଖିଛି ।
ଏହାସହ ଆବଶ୍ୟକସ୍ଥଳେ ଅଭିଯୁକ୍ତଦ୍ୱୟଙ୍କୁ ରିମାଣ୍ଡରେ ଆଣି ଜେରା କରାଯିବ । ଏହି ମାମଲାରେ ଅଧିକ ତଦନ୍ତ ପାଇଁ ପଶ୍ଚିମବଙ୍ଗକୁ ଏକ ଟିମ୍ ଯାଇ ତନାଘନା କରିବ ବୋଲି ଏସ୍ଟିଏଫ୍ ଏସ୍ପି ତେଜରାଜ ପଟେଲ ସୂଚନା ଦେଇଛନ୍ତି । ସୂଚନା ଅନୁଯାୟୀ, ଗିରଫ ଅଭିଯୁକ୍ତଦ୍ୱୟ ପଶ୍ଚିମବଙ୍ଗର ହୋଇଥିବାବେଳେ ଓଡ଼ିଶାରେ ବେପାର କରିବା ସହ ବସ୍ତି ଅଞ୍ଚଳରେ ରୁହନ୍ତି । ବଡ଼ ପରିମାଣର ବ୍ରାଉନସୁଗର ଅର୍ଡର ଆସିଲେ ପଶ୍ଚିମବଙ୍ଗ ଯାଇ ଆଣିଥାନ୍ତି । ଏହାପରେ ମାଲ୍କୁ ଗ୍ରାହକଙ୍କ ହସ୍ତାନ୍ତର କରନ୍ତି ।
ଏଭଳି ଭାବେ କିଛିଦିନ ହେବ ଏହି ବେପାର ଚାଲିଆସୁଥିଲା । ମଙ୍ଗଳବାର ଭୋରୁ ଏଭଳି ଏକ ଡିଲ୍ ରସୁଲଗଡ଼ ଅଞ୍ଚଳରେ ହେବାକୁ ଥିବା ଏସ୍ଟିଏଫ୍ ଖବର ପାଇଥିଲା । ରସୁଲଗଡ଼ ଲେବେଲ୍ କ୍ରସିଂ ନିକଟରେ ବ୍ରାଉନସୁଗର ବିକ୍ରି ନେଇ ଅଭିଯୁକ୍ତଦ୍ୱୟ ଗ୍ରାହକଙ୍କୁ ଅପେକ୍ଷା କରିଥିବାବେଳେ ଏସ୍ଟିଏଫ୍ ଟିମ୍ ମାଡ଼ିବସିଥିଲା । ପରେ ସେମାନଙ୍କୁ କାବୁ କରି ଏସ୍ଟିଏଫ୍ କାର୍ଯ୍ୟାଳୟ ନିଆଯାଇଥିଲା । ସେଠାରେ ଜେରା କରିବାରୁ ବ୍ରାଉନସୁଗର ବିକ୍ରି କରୁଥିବା ସ୍ୱୀକାର କରିଛନ୍ତି । ଏହାପରେ ପୁଲିସ ସେମାନଙ୍କୁ ଗିରଫ କରିବା ସହ ବ୍ରାଉନସୁଗର ଜବତ କରିଛି ।
