ପ୍ୟାରିସ୍‌ରେ ପ୍ରଶଂସିତ ହେଲା ‘ରାଇମାଳି’ ଏସ୍‌ଏଚ୍‌ଜି

ସତ୍ୟଶିଖା( ପୋଲସରା  )୦୩.୧୧.୨୦୨୨: ଓଡ଼ିଶା ମିଲେଟ୍ ମିସନ୍ ଆନୁକୂଲ୍ୟରେ ରାଜ୍ୟ ସରକାର ମାଣ୍ଡିଆ ଚାଷ ପାଇଁ ପ୍ରୋତ୍ସାହିତ ଯୋଗାଇଆସୁଛନ୍ତି। ସରକାରଙ୍କ ଏହି ପ୍ରୟାସକୁ ବିଶ୍ବ ଖାଦ୍ୟ ସଂଗଠନ ମଧ୍ୟ ପ୍ରଶଂସା କରିଛନ୍ତି। ଆଉ ଏହି ସଫଳତାରେ ଆଉ ଏକ ଫର୍ଦ୍ଦ ଯୋଡ଼ି ହୋଇଛି। ପ୍ୟାରିସ୍‌ରେ ଅନୁଷ୍ଠିତ ଅନ୍ତର୍ଜାତୀୟ ଖାଦ୍ୟମେଳାରେ ଗଞ୍ଜାମ ଜିଲ୍ଲାର ଏକମାତ୍ର ମହିଳା ଏସ୍‌ଏଚ୍‌ଜି ଭାବେ ପୋଲସରା ବ୍ଲକ୍ ଚିରିକିପଡ଼ା ଗ୍ରାମର ରାଇମାଳି ମହିଳା ସ୍ବୟଂ ସହାୟକ ଗୋଷ୍ଠୀ ଭାଗ ନେଇ ଜିଲ୍ଲା ପାଇଁ ଗୌରବ ଆଣିଛି। ଉକ୍ତ ମହିଳା ଏସ୍‌ଏଚ୍‌ଜି ଦ୍ବାରା ପ୍ରସ୍ତୁତ ବିଭିନ୍ନ ମାଣ୍ଡିଆଜାତ ଖାଦ୍ୟ ଏହି ମେଳାରେ ପ୍ରଦର୍ଶିତ ‌ହୋଇଥିବା ବେଳେ ଏଥିରେ ସଭାନେତ୍ରୀ ଚନ୍ଦ୍ରମା ସାହୁ ଅଂଶଗ୍ରହଣ କରିଥିଲେ।

ଏହି ଅବସରରେ ଆମ ସହ ଆଲୋଚନା ବେଳେ ଚନ୍ଦ୍ରମା କହିଛନ୍ତି, ‘ନାରୀ ଏବେ ସମାଜରେ ଅବଳା କି ଦୁର୍ବଳା ନୁହେଁ। ନିଜ ଦୃଢ଼ ମନୋବଳ ଓ ଅଧ୍ୟବସାୟ ବଳରେ ସେ ନିଜେ ଏକ ସ୍ବତନ୍ତ୍ର ପରିଚୟ ତିଆରି କରିପାରିଛି’। ପୋଲସରା ବ୍ଲକ୍ ଚିରିକିପଡ଼ାଶାସନରେ ୨୦୦୮ ମସିହା ନଭେମ୍ବର ୩ ତାରିଖରେ ମାତ୍ର ୧୨ ଜଣ ମହିଳାଙ୍କୁ ନେଇ ମିନତି ନାୟକଙ୍କ ପ୍ରଚେଷ୍ଟାରେ ଉକ୍ତ ସ୍ବୟଂ ସହାୟିକା ଗୋଷ୍ଠୀ ଗଠିତ ହୋଇଥିଲା। ବର୍ତ୍ତମାନ ଚନ୍ଦ୍ରମା ସାହୁ (୩୬) ସଭାନେତ୍ରୀ ଭାବେ ଏହାର ମଙ୍ଗ ଧରିଛନ୍ତି। ୧୦୦ ଟଙ୍କା ଲେଖାଏଁ ସଞ୍ଚୟ କରି ସଦସ୍ୟାମ‌ାନେ ଏହି ଗୋଷ୍ଠୀ ଆରମ୍ଭ କରିଥିବା ବେଳେ ବର୍ତ୍ତମାନ ଏହା ରାଜ୍ୟ ଓ ଜାତୀୟସ୍ତରରେ ନିଜର ଏକ ସ୍ବତନ୍ତ୍ର ପରିଚୟ ତିଆରି କରିପାରିଛି।