ସତ୍ୟଶିଖା(ଭୁବନେଶ୍ୱର) ୦୭ .୧୨.୨୦୨୧: ବଙ୍ଗୋପ ସାଗରରେ ସୃଷ୍ଟ ବାତ୍ୟା ଜୱାଦ କ୍ରମଶଃ ଦୁର୍ବଳ ହେବା ସହ ସୋମବାର ଲଘୁଚାପରେ ପରିଣତ ହୋଇଛି । ଏହା ଉତ୍ତର ପୂର୍ବ ବଙ୍ଗୋପସାଗର ତଥା ପଶ୍ଚିମବଙ୍ଗ ଓ ବାଂଲାଦେଶ ଉପକୂଳରେ କେନ୍ଦ୍ରୀଭୂତ ରହିଛି । ପ୍ରଭାବରେ ପଶ୍ଚିମବଙ୍ଗ ଉପକୂଳରେ ହାଲୁକାରୁ ମଧ୍ୟମ ଧରଣର ବର୍ଷା ଲାଗି ରହିଛି । ଅଧିକାଂଶ ଜିଲ୍ଲାରେ ପାଗ କୋହଲା ରହିବାରୁ ସର୍ବନିମ୍ନ ପାରଦ ସ୍ୱାଭାବିକ ରହିଛି । ଅବପାତଟି ସୋମବାର ବଙ୍ଗୋପସାଗରରେ ସକ୍ରିୟ ଥିବାରୁ ରାଜ୍ୟର କିଛି ଜିଲ୍ଲାରେ ଗତ ୨୪ ଘଣ୍ଟା ମଧ୍ୟରେ ବର୍ଷା ରେକର୍ଡ ହୋଇଛି ।
ବିଶେଷକରି ଉତ୍ତର ଉପକୂଳରେ ଏହାର କୋପ ନଜରକୁ ଆସିଛି । ଜଗତସିଂହପୁର ଏରସମାରେ ସର୍ବାଧିକ ୨୩୮ ମିମି ବର୍ଷା ହୋଇଥିବାବେଳେ ପାରଦ୍ୱୀପରେ ୨୦୦ ମିମି, ବାଲିକୁଦାରେ ୧୫୪, କୁଜଙ୍ଗରେ ୧୪୦ ମିମି, ତିର୍ତ୍ତୋଲରେ ୧୧୫ ମିମି ବର୍ଷା ହୋଇଥିବାବେଳେ କେନ୍ଦ୍ରାପଡ଼ା ଜିଲ୍ଲା ମାର୍ଶାଘାଇ ଓ ଗରଦପୁରରେ ୧୨୮ ମିମି ବର୍ଷା ହୋଇଛି । ସେହିପରି ପୁରୀ ଜିଲ୍ଲା ଅସ୍ତରଙ୍ଗରେ ୧୦୯ ମିମି ବର୍ଷା ହୋଇଥିବାବେଳେ କଟକ ନିଆଳି ଅଞ୍ଚଳରେ ୯୬ ମିମି ବର୍ଷା ହୋଇଛି ।
ଗତ ୨୪ ଘଣ୍ଟାରେ ଉତ୍ତର ଉପକୂଳ ତଥା ତତ୍ସଂଲଗ୍ନ ଜିଲ୍ଲାରେ ବର୍ଷା ପରିମାଣ ୧୦୦ ମିମିରୁ ଊର୍ଦ୍ଧ୍ୱ ଥିବା ଆଞ୍ଚଳିକ ପାଣିପାଗ କେନ୍ଦ୍ର ତଥ୍ୟ ପ୍ରକାଶ କରିଛି । ଅସନ୍ତାକାଲିଠାରୁ ରାଜ୍ୟରେ ପାଗ ପୁର୍ବ ପରି ଶୁଖିଲା ରହିବ । ଆସନ୍ତାକାଲିଠାରୁ ରାଜ୍ୟରେ ଶୀତ ଲେଉଟିବା ନେଇ ସୂଚନା ମିଳିଛି । ଆସନ୍ତା ୨ ଦିନ ମଧ୍ୟରେ ଉପାନ୍ତଠୁ ଉପକୂଳ ସବୁଠି ପାରଦ ନିମ୍ନଗାମୀ ହେବା ସହ ପାହାଡ଼ିଆ ଓ ଆଭ୍ୟନ୍ତରୀଣ ଅଞ୍ଚଳରେ ହାଡ଼ଭଙ୍ଗା ଜାଡ଼ ଅନୁଭୂତ ହେବ ବୋଲି ଆଞ୍ଚଳିକ ପାଣିପାଗ କେନ୍ଦ୍ର ନିର୍ଦ୍ଦେଶକ ଏଚ୍ ଆର୍ ବିଶ୍ୱାସ କହିଛନ୍ତି ।
ଅଧା ଓଡ଼ିଶା (ଆଭ୍ୟନ୍ତରୀଣ)ରେ ରାତି ପାରଦ ସ୍ୱାଭାବିକଠାରୁ ୩ରୁ ୫ ଡିଗ୍ରୀ ପର୍ଯ୍ୟନ୍ତ କମିବା ନେଇ ପୂର୍ବାନୁମାନ କରାଯାଉଥିବାବେଳେ ଉପକୂଳ ତଥା ତତ୍ସଂଲଗ୍ନ ଜିଲ୍ଲାରେ ପାରଦ ୨ରୁ ୩ ଡିଗ୍ରୀ ଯାଏ ଖସିବ । ୩ ଦିନ ଧରି ବାତ୍ୟା ଜୱାଦ ପ୍ରଭାବରେ ଲଗାଣ ବର୍ଷା ଯୋଗୁଁ ଚାଷୀକୂଳ ମୁଣ୍ଡରେ ଚଡ଼କ ପକାଇଛି । ବାତ୍ୟା ଜୱାଦ୍ ଚାଷୀ ମୁହଁରୁ ହସ ଆଉ ଦାନା ଛଡ଼ାଇ ନେଇଛି । ପ୍ର୍ରଭାବିତ ଜିଲ୍ଲାର ଜିଲ୍ଲାପାଳଙ୍କୁ ବାତ୍ୟା କ୍ଷୟକ୍ଷତି ରିପୋର୍ଟ ଦେବାକୁ ନିର୍ଦ୍ଦେଶ ମିଳିଛି । ଯଥାଶୀଘ୍ର ଚାଷୀଙ୍କୁ ତାଙ୍କ କ୍ଷତିପୂରଣ ମିଳିବ ବୋଲି ରାଜସ୍ୱ ମନ୍ତ୍ରୀ ସୁଦାମ ମାର୍ଣ୍ଡି କହିଛନ୍ତି ।
