ଅତିରିକ୍ତ କରୋନା କଟକଣା ହଟାଅ

ସତ୍ୟଶିଖା( ଭୁବନେଶ୍ୱର )୧୭.୦୨.୨୦୨୨ : ଦେଶରେ କରୋନା ସଂକ୍ରମଣ ହ୍ରାସ ପାଉଥିବାବେଳେ ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳ ସରକାରଙ୍କ ପକ୍ଷରୁ ଲାଗୁ କରାଯାଇଥିବା ଅତିରିକ୍ତ କଟକଣାକୁ ହଟାଇବା ଲାଗି କୁହାଯାଇଛି। ବୁଧବାର କେନ୍ଦ୍ର ସ୍ବାସ୍ଥ୍ୟ ସଚିବ ରାଜେଶ ଭୂଷଣ ସମସ୍ତ ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳ ସରକାରଙ୍କ ମୁଖ୍ୟ ସଚିବଙ୍କ ନିକଟକୁ ଲେଖିଥିବା ପତ୍ରରେ ଅତିରିକ୍ତ କରୋନା କଟକଣାକୁ ସମୀକ୍ଷା ଓ ସଂଶୋଧନ ପୂର୍ବକ ହଟାଇବା ଲାଗି ନିର୍ଦେଶ ଦେଇଛନ୍ତି। କରୋନା କଟକଣା ହଟାଇବା ସମୟରେ ସମ୍ପୃକ୍ତ ଅଞ୍ଚଳରେ ନୂଆ ସଂକ୍ରମଣ ମାମଲା ଓ ସଂକ୍ରମଣ ହାରକୁ ବିଚାର କରିବାକୁ କୁହାଯାଇଛି। କେନ୍ଦ୍ର ସ୍ବାସ୍ଥ୍ୟ ସଚିବ କହିଛନ୍ତି ଯେ ଜନତାଙ୍କ ସ୍ବାସ୍ଥ୍ୟ ସମସ୍ୟାକୁ ଉପଯୁକ୍ତ ପରିଚାଳନା ସହିତ ଅର୍ଥନୈତିକ କାର୍ଯ୍ୟକଳାପକୁ ସ୍ବାଭାବିକ କରିବା ଜରୁରୀ। ଏହା ସହିତ ରାଜ୍ୟ-ରାଜ୍ୟ ମଧ୍ୟରେ ସାଧାରଣ ଯାତାୟାତ ପ୍ରଭାବ ମୁକ୍ତ ହେବା ଦରକାର। ଚଳିତ ସପ୍ତାହରେ ଦେଶରେ ଦୈନିକ ସଂକ୍ରମଣ ୫୦ହଜାର ତଳକୁ ରହିଛି। ଦେଶ ଓ ବିଶ୍ବରେ କରୋନାର ନୂଆ ପ୍ରଜାତି ଭୂତାଣୁ ସଂକ୍ରମଣକୁ ନିୟନ୍ତ୍ରଣ ପାଇଁ ସରକାର ନୂଆ ନୂଆ ମାର୍ଗଦର୍ଶିକା ଜାରି କରୁଆସୁଛନ୍ତି। ସଂକ୍ରମଣ ହ୍ରାସ ପରେ ଏହି ସବୁ ମାର୍ଗଦର୍ଶିକାର ସମୀକ୍ଷା ଓ ସଂଶୋଧନ କରାଯିବା ମଧ୍ୟ ଜରୁରୀ।