ସଂକ୍ରମଣ ଭୟରେ ସୁନ୍ଦରଗଡରେ ମୃତଦେହକୁ ଛୁଇଁଲେନି ସମ୍ପର୍କୀୟ

ସତ୍ୟଶିଖା(ସୁନ୍ଦରଗଡ଼) ୧୩ .୦୫.୨୦୨୧: ସଂକ୍ରମଣ ଭୟରେ କରୋନା ମୃତକଙ୍କ ଶବକୁ କାନ୍ଧ ଦେଲେନି ଗାଁ ଲୋକେ । ଦୀର୍ଘ ସମୟ ଧରି ଶବ ପଡ଼ି ରହିବା ପରେ ଶେଷରେ ୫୦ କିଲୋମିଟର ଯାଇ ଶବ ସତ୍କାର କଲେ ଶ୍ମଶାନ ବନ୍ଧୁ । ଏଭଳି ଏକ ଘଟଣା ଦେଖିବାକୁ ମିଳିଛି ସୁନ୍ଦରଗଡ଼ ଜିଲ୍ଲା ସବଡ଼େଗା ବ୍ଲକ ଦେଓଗାଁରେ । ମୃତକ ଜଣକ ଖୀଷ୍ଟିଆନ ଧର୍ମର ହୋଇଥିବା ବେଳେ କଫିନ୍ ତିଆରି କରି ଧର୍ମିୟ ରୀତିନୀତିରେ ଶବକୁ ସତ୍କାର କରିଥିଲେ ଶ୍ମଶାନ ବନ୍ଧୁ ।

ସୂଚନା ଅନୁସାରେ, ଅନୁଗୁଳ-ରେଙ୍ଗାଲି ଓଡ଼ିଶା ହାଇଡ୍ରୋ ପ୍ରୋଜେକ୍ଟର ଯନ୍ତ୍ରୀ ଭାବେ କାର୍ଯ୍ୟ କରୁଥିବା ସବଡେଗା ବ୍ଲକ ଦେଓଗାଁର ଯୋଶ କୁଜୁର ଦୁଇଦିନ ତଳେ ପରୀକ୍ଷା ପରେ କରୋନା ସଂକ୍ରମିତ ଜଣାପଡ଼ିଥିଲେ। ତାଙ୍କର ବିଶେଷ କୌଣସି ଲକ୍ଷଣ ନଥିବାରୁ ରେଙ୍ଗାଲିସ୍ଥିତ ବାସଭବନରେ ସେ ସଂଗରୋଧରେ ଥିଲେ। କିନ୍ତୁ ମଙ୍ଗଳବାର ଅପରାହ୍ନରେ ତାଙ୍କ ସ୍ବାସ୍ଥ୍ୟ ହଠାତ ବିଗିଡ଼ି ଯାଇଥିଲା। ଅକ୍ସିଜେନ୍‌ ସ୍ତର କମିଯିବାରୁ ତାଙ୍କୁ ଅନୁଗୁଳ କୋଭିଡ୍‌କେନ୍ଦ୍ରକୁ ନିଆଯାଉଥିଲା। କିନ୍ତୁ ବାଟରେ ତାଙ୍କ ମୃତ୍ୟୁ ହୋଇଯାଇଥିଲା।