ସତ୍ୟଶିଖା ( ଭୁବନେଶ୍ୱର )୦୬ /୧୧ /୨୦୨୧: ପେଟ୍ରୋଲ, ଡିଜେଲ ଦର କମିବା ପରେ କମିଛି ବସ ଭଡା । ଅର୍ଡିନାରୀ ଓ ଏକ୍ସପ୍ରେସ୍ ବସ ଭଡା କିଲୋମିଟର ପିଛା ୫ ପଇସା ହ୍ରାସ ପାଇଛି । ତା ସହିତ ଡିଲକ୍ସ ଓ ଏସି ଡିଲକ୍ସ ବସ ଭଡା କିଲୋମିଟର ପିଛା ୧୦ ପଇସା ହ୍ରାସ ପାଇଛି । ରାଜ୍ୟର ଘରୋଇ ବସ ମାଲିକ ସଂଘର ସମ୍ପାଦକ ଏନେଇ ଶନିବାର ଗଣମାଧ୍ୟମକୁ ସୂଚନା ଦେଇଛନ୍ତି । ବହୁ ଦିନର ବ୍ୟବଧାନ ପରେ ଯାତ୍ରୀଙ୍କ ପାଇଁ ଏପରି ଏକ ଖୁସି ଖବର ଆସିଛି । ତେବେ ଏହା ପୂର୍ବରୁ ଅଧିକାଂଶ ଥର ପେଟ୍ରୋଲ ଓ ଡିଜେଲ ଦର ବୃଦ୍ଧି କାରଣରୁ ବସ ଭଡା ବଢିଚାଲିଥିଲା । ହେଲେ ଏବେ କେନ୍ଦ୍ର ସରକାର ଓ ରାଜ୍ୟ ସରକାର ପେଟ୍ରୋଲ ଓ ଡିଜେଲ ଉପରୁ ନିଜର ଶୁଳ୍କ ହ୍ରାସ କରିବା ପରେ ଏବେ ବସ ଭଡା ହ୍ରାସ ପାଇଛି ।
ପେଟ୍ରୋଲ ଓ ଡିଜେଲ ଦର ହୁହୁ ବଢ଼ିବା ପରେ ଜନସାଧାରଣଙ୍କ ଉପରେ ଅତିରିକ୍ତ ବୋଝ ପଡ଼ିଥିଲା। ବଦ୍ଧିର୍ତ ତେଲ ଦର ନେଇ ଦେଶର ଚାରିଆଡେ ବିରୋଧର ସ୍ବର ଉଠିଥିଲା। ଗତ ବୁଧବାର କେନ୍ଦ୍ର ସରକାର ପେଟ୍ରୋଲ ଓ ଡିଜେଲ ଉପରେ ଏକ୍ସସାଇଜ୍ ଡ୍ୟୁଟି ହ୍ରାସ କରିଥିଲେ। ସେହିପରି ରାଜ୍ୟ ସରକାର ମଧ୍ୟ ୪ଟଙ୍କା ଭାଟ୍ କମ କରିଥିଲେ। ଫଳେ ଘରୋଇ ବସ୍ ମାଲିକ ସଂଘ ଯାତ୍ରୀମାନଙ୍କ ଠାରୁ ପୂର୍ବାପେକ୍ଷା ବସ୍ ଭଡ଼ା କମ୍ ଆଦାୟ କରିବାକୁ ନିଷ୍ପତ୍ତି ନେଇଛି।
