ସତ୍ୟଶିଖା (ପୁରୀ) ୨୭/୧୧/୨୦୨୦ : ମହାପ୍ରଭୁଙ୍କୁ ଦୁର୍ଲ୍ଲଭ ନାଗାର୍ଜୁନ ବେଶ ସମ୍ପନ୍ନ ହୋଇଛି । ବେଶ ସମ୍ପନ୍ନ ହୋଇଥିବା ନେଇ ପୁରୀ ଜିଲ୍ଲାପାଳ ସୂଚନା ଦେଇଛନ୍ତି । ନିର୍ଦ୍ଧାରିତ ସମୟ ଠାରୁ ବିଳମ୍ବରେ ଶେଷ ହେଲା ବେଶ । ମହାପ୍ରଭୁଙ୍କ ନାଗାର୍ଜୁନ ବେଶରେ ଝଲସୁଛି ରତ୍ନ ସିଂହାସନ । ଦୁର୍ଲ୍ଲଭ ବେଶରେ ଜଗାବଳିଆ ସଜ୍ଜିତ ହୋଇଛନ୍ତି । ମହାପ୍ରଭୁ ଜଗନ୍ନାଥ ଓ ବଳଭଦ୍ର ସଜେଇ ହୋଇଛନ୍ତି ବୀର ବେଶରେ । ୧୬ ପ୍ରକାରର ପାରମ୍ପରିକ ଯୁଦ୍ଧାସ୍ତ୍ରରେ ସଜ୍ଜିତ ମଉଡ଼ମଣୀ । ଦୁଇ ଠାକୁରଙ୍କ ମସ୍ତକରେ ଶୋଭିତ ହେଉଛି ହାଣ୍ଡିଆ । ଢେଣୁ, ଶିଙ୍ଗା, ତୁଣୀର, ବାଘନଖ ଓ ଖଣ୍ଡା ଆଦି ମହାପ୍ରଭୁ ଧାରଣ କରିଛନ୍ତି । ସେବାୟତଙ୍କ ସଂଖ୍ୟା ଓ ସୁନା ମଣତି ନେଇ ବିଳମ୍ବ ହୋଇଥିଲା ମହାପ୍ରଭୁଙ୍କ ବେଶ । ଆଲୋଚନା ପରେ ସାମାନ୍ୟ ବିଳମ୍ବରେ ଶେଷ ହୋଇଛି ମହାପ୍ରଭୁଙ୍କ ବେଶ । ସହଯୋଗ ପାଇଁ ସମସ୍ତଙ୍କୁ ହୃଦୟରୁ ଜିଲ୍ଲାପାଳ କୃତଜ୍ଞତା ଜଣାଇଛନ୍ତି ।
ମାତ୍ର ଚଳିତ ବର୍ଷ ଏହି ଦୁର୍ଲ୍ଲଭ ବେଶ ଦର୍ଶନରୁ ଭକ୍ତ ବଞ୍ଚିତ ହୋଇଛନ୍ତି । କରୋନା କଟକଣା ଯୋଗୁଁ ଭକ୍ତଙ୍କୁ ଦର୍ଶନ ପାଇଁ ବାରଣ କରାଯାଇଛି । ଶ୍ରଦ୍ଧାଳୁଙ୍କ ଆଖିରେ ଭରି ଯାଇଛି ଅଶ୍ରୁ । କେବଳ ହୃଦୟରୁ ମହାପ୍ରଭୁଙ୍କୁ ଦର୍ଶନ କରିବା ସହ ସମସ୍ତ ଦୁଃଖ ଦୂର ପାଇଁ ସଭିଏଁ କାମନା କରୁଛନ୍ତି ।
