ସତ୍ୟଶିଖା ( ମୁମ୍ବାଇ ) ୧୨ .୦୯.୨୦୨୦ : ମୁମ୍ବାଇର ସମତା ନଗରରେ ନୌସେନାର ପୂର୍ବତନ ଅଧିକାରୀ ମଦନ ଶର୍ମାଙ୍କୁ ଶିବସେନାର କର୍ମୀ ମାଡ ମାରିବା ବିବାଦ ବଢିବାରେ ଲାଗିଛି । ତେବେ ଶିବସେନାର କର୍ମୀ ମାଡରେ ସେ ଗୁରୁତର ହୋଇ ହସ୍ପିଟାଲରେ ଭର୍ତ୍ତି ହୋଇଛନ୍ତି । ଏହି ପ୍ରସଙ୍ଗ ଏବେ ଦିଲ୍ଲୀ ପର୍ଯ୍ୟନ୍ତ ପହଞ୍ଚିଛି । ଗୋଟିଏ ପଟେ ପୂର୍ବତନ ମୁଖ୍ୟମନ୍ତ୍ରୀ ଦେବେନ୍ଦ୍ର ଫଡଣବିସ ଘଟଣାକୁ ନେଇ ଉଦ୍ଧବ ସରକାରଙ୍କ ଉପରେ ବର୍ଷିଥିବାବେଳେ ଏପଟେ ପ୍ରତିରକ୍ଷା ମନ୍ତ୍ରୀ ରାଜନାଥ ସିଂହ ଶନିବାର ପୂର୍ବତନ ନୌସେନା ଅଧିକାରୀ ମଦନ ଶର୍ମାଙ୍କୁ ଫୋନ୍ କରି ତାଙ୍କ ସ୍ୱାସ୍ଥ୍ୟବସ୍ଥା ବୁଝିଛନ୍ତି । ତେବେ ଏହି ପରିପ୍ରେକ୍ଷିରେ ପ୍ରତିରକ୍ଷା ମନ୍ତ୍ରୀ କହିଛନ୍ତି ପୂର୍ବତନ ସୈନିକଙ୍କ ଉପରେ ଏହି ଧରଣର ଆକ୍ରମଣ ଘୋର ନିନ୍ଦନୀୟ ଏବଂ ଅମାନବୀୟ ।
ରାଜନାଥ ସିଂହ କହିଛନ୍ତି ଅବସରପ୍ରାପ୍ତ ନୌସେନା ଅଧିକାରୀ ମଦନ ଶର୍ମାଙ୍କ ସହ କଥା ହୋଇ ତାଙ୍କ ସ୍ଵାସ୍ଥ୍ୟ ବିଷୟରେ ପଚାରି ବୁଝିଲି । ପୂର୍ବତନ ସୈନିକଙ୍କ ଉପରେ ଏହି ଧରଣର ଆକ୍ରମଣ ଅତ୍ୟନ୍ତ ନିନ୍ଦନୀୟ ଓ ଅପମାନଜନକ । ସେ ମଦନ ଶର୍ମାଙ୍କ ଶୀଘ୍ର ସୁସ୍ଥ ହେବାର କାମନା କରିଛନ୍ତି । ଅନ୍ୟପଟେ ପୂର୍ବତନ ମୁଖ୍ୟମନ୍ତ୍ରୀ ଦେବେନ୍ଦ୍ର ଫଡଣବିସ କହିଛନ୍ତି ଏହା ବହୁତ ଭୁଲ୍ ଏବଂ ରାଜ୍ୟ ପ୍ରାୟୋଜିତ ଆତଙ୍କର ସ୍ଥିତି । ଏହି ଘଟଣାରେ ୧୦ ମିନିଟ୍ରେ ୬ ଜଣ ଅଭିଯୁକ୍ତଙ୍କୁ ଛାଡି ଦିଆଗଲା ।
ସୂଚନାନୁଯାୟୀ, ମହାରାଷ୍ଟ୍ର ମୁଖ୍ୟମନ୍ତ୍ରୀ ଉଦ୍ଧବ ଠାକରେଙ୍କ ଉପରେ ଏକ କାର୍ଟୁନ ଫୋଟକୁ ହ୍ବାଟ୍ସଆପରେ ମଦନ ଶର୍ମା ଶେୟାର କରିଥିଲେ । ଏହାପରେ ଶିବସେନା କର୍ମୀ ଫୋନ କରି ଧମକ ଦେଇଥିଲେ । ପରେ ମଦନ ଶର୍ମାଙ୍କ ଘରକୁ ଆସି ତାଙ୍କୁ ୮ ଜଣ ଶିବସେନା କର୍ମୀମାନେ ସାଂଙ୍ଘାତିକ ଆକ୍ରମଣ କରିଥିଲେ । ଏଥିରେ ସେ ଗୁରୁତର ଆହତ ହୋଇଥିଲେ । ଏହା ପରେ ପୋଲିସ ଏହି ମାମଲାରେ ଅଭିଯୁକ୍ତଙ୍କୁ ଗିରଫ କରିଥିଲା, କିନ୍ତୁ ଶନିବାର ଦିନ ଅଭିଯୁକ୍ତଙ୍କୁ ଜାମିନ ମିଳିଛି । ଅଭିଯୁକ୍ତଙ୍କୁ ଜାମିନ ମିଳିବା ପରେ ପୂର୍ବତନ ସୌସେନା ଅଧିକାରୀଙ୍କ ଝିଅ ବିଜେପି ନେତାଙ୍କ ସହ ମୁମ୍ବାଇ ଅତିରିକ୍ତ ପୋଲିସ କମିଶନରଙ୍କ କାର୍ଯ୍ୟାଳୟ ବାହାରେ ଏକ ବିକ୍ଷୋଭ ପ୍ରଦର୍ଶନ କରିଥିଲେ । ଏହି ସମୟରେ ବିକ୍ଷୋଭକାରୀମାନେ ଜାମିନହୀନ ଅପରାଧ ପାଇଁ ଅଭିଯୁକ୍ତଙ୍କ ବିରୋଧରେ ମାମଲା ରୁଜୁ କରିବାକୁ ଦାବି କରିଛନ୍ତି ।
-
-
-
-
-
-
-
-
-
-
