ସତ୍ୟଶିଖା(ଭୁବନେଶ୍ୱର) ୩୦ .୧୧.୨୦୨୧: ରାଜ୍ୟରେ ପ୍ରତିଦିନ ଶିଶୁମାନେ ଶୋଷଣର ଶିକାର ହେଉଛନ୍ତି । ଶିଶୁଙ୍କୁ ନ୍ୟାୟ ଦେବା ପାଇଁ ଶିଶୁ ଆୟୋଗ ରହିଥିଲେ ହିଁ ସେତେଟା ଫଳ ମିଳୁନାହିଁ । ରିପୋର୍ଟ କହୁଛି ଓଡ଼ିଶାରେ ଶିଶୁ ଅଧିକାର ସୁରକ୍ଷା ଆୟୋଗ ଗଠନ ହେବା ଦିନଠାରୁ ଆଜି ପର୍ଯ୍ୟନ୍ତ ମାତ୍ର ୨୩୦ଟି ମାମଲା ସମାଧାନ ହୋଇଛି । ୭୫୦ରୁ ଅଧିକ ଶିଶୁ ହିଂସା ସମ୍ପର୍କିତ ସମ୍ବେଦନଶୀଳ ମାମଲା ଆୟୋଗ ନିକଟରେ ଗଡୁଥିବାବେଳେ ବିଭିନ୍ନ ଥାନାରେ ପଡ଼ିଛି ମାଳମାଳ ମାମଲା । ରାଜ୍ୟ ଶିଶୁ ଅଧିକାର ସୁରକ୍ଷା ଆୟୋଗ ଅଧ୍ୟକ୍ଷା ସୁଶ୍ରୀ ସନ୍ଧ୍ୟାବତୀ ପ୍ରଧାନଙ୍କ କହିଛନ୍ତି, ୨୦୧୧ରୁ ୨୦୨୧ ସେପ୍ଟେମ୍ବର ମଧ୍ୟରେ ଶିଶୁ ନିର୍ଯାତନା ଓ ଶିଶୁ ହିଂସା ନେଇ ୯୮୦ଟି ମାମଲା ଆସିଥିଲା ।
ହେଲେ ସେଥିରୁ ମାତ୍ର ୨୩୦ଟି ମାମଲାର ସମାଧାନ ହୋଇଛି । ବାକି ମାମଲାର ବିଚାର ହୋଇନଥିବା ବେଳେ ଅନ୍ୟପଟେ ଆୟୋଗ ପାଖକୁ ୧୭ଟି ବାଲ୍ୟ ବିବାହ ସମସ୍ୟା ଆସିଥିଲା । ସେଥିରୁ ଚାରୋଟି ମାମଲାର ସମାଧାନ ହୋଇଛି । ତେବେ ବିଡ଼ମ୍ବନାର ବିଷୟ ହେଉଛି ୯୯ଟି ଅଭିଯୋଗ ହୋଇଥିବା ବେଳେ ସେଥିରୁ ୪ଟି ମାମଲାର ସମାଧାନ ହୋଇଛି । ୩୦ଟି ଜିଲ୍ଲାରେ ଶିଶୁ ଯୌନ ନିର୍ଯାତନା ଓ ଶିଶୁ ହିଂସାର ମାତ୍ର ଦେଖିଲେ ସ୍ଥିତି ପୂରା ସାଂଘାତିକ । ୨୦୧୧ରୁ ୨୦୨୧ ସେପ୍ଟେମ୍ବର ମଧ୍ୟରେ ୫,୩୦୦ଟି ଘଟଣା ଘଟିଥିଲା । ସେଥିରୁ ସର୍ବାଧିକ ଘଟଣା ଘଟିଛି ପୁରୀ ଜିଲ୍ଲାରେ । ଏଠାରେ ମୋଟ ୬୩୫ଟି ଘଟଣା ଘଟିଛି । ଦ୍ୱିତୀୟ ସ୍ଥାନରେ ରହିଛି ଅନୁଗୁଳ । ଏହି ଜିଲ୍ଲାରେ ୬୧୦ଟି ମାମଲା ରହିଛି । କେନ୍ଦ୍ରାପଡ଼ା ଜିଲ୍ଲାରେ ୫୩୦ଟି ମାମଲା ରୁଜୁ ହୋଇ ତୃତୀୟ ସ୍ଥାନରେ ରହିଛି ।
ଶିଶୁ ଚାଲାଣ ଉପରେ ଏନ୍ସିଆର୍ବି ରିପୋର୍ଟ କହୁଛି, ୩,୭୦୦ ଜଣ ଶିଶୁଙ୍କ ପତ୍ତା ମିଳୁନାହିଁ । ଶିଶୁ ଅପହରଣ ସମୟରେ ଥାନାରେ ଏତଲା ହୋଇଛି ହେଲେ ପୁଲିସ ମାମଲା ରୁଜୁ କରିଥିଲେ ସୁଦ୍ଧା ସମ୍ପୃକ୍ତ ଶିଶୁଙ୍କ ବିଷୟରେ ତଥ୍ୟ ପ୍ରମାଣ ମିଳୁନାହିଁ, ଯାହା ଦ୍ୱାରା ନିଖୋଜ ତାଲିକା ଗଡ଼ି ଗଡ଼ି ଚାଲିଛି ବୋଲି କହିଛନ୍ତି ଶିଶୁ ଅଧିକାର ବିଶେଷଜ୍ଞ ତଥା ପ୍ରାକ୍ତନ ଶିଶୁ କଲ୍ୟାଣ କମିଟି ଅଧ୍ୟକ୍ଷ ସିଦ୍ଧାର୍ଥ ରାୟ । ସେହିପରି ସିଡବ୍ଲ୍ୟୁସି ସଦସ୍ୟ ରମାଶଙ୍କର ପାତ୍ର କହିଛନ୍ତି, ଶିଶୁଙ୍କ ପ୍ରତି ଘଟୁଥିବା ଅପରାଧକୁ ନଜରରେ ରଖି ୨୦୧୦ ସେପ୍ଟେମ୍ବର ମାସରେ ଓଡ଼ିଶାରେ ଶିଶୁ ଅଧିକାର ସୁରକ୍ଷା ଆୟୋଗ ଗଠନ ହୋଇଥିଲା । ୨୦୨୧ ପରଠୁ ଜିଲ୍ଲାଗୁଡ଼ିକରେ ଘଟୁଥିବା ସମ୍ବେଦନଶୀଳ ଘଟଣାଗୁଡ଼ିକ ଆୟୋଗ ନିକଟରେ ଅଭିଯୋଗ ହୋଇଥିଲା । ହେଲେ ସେତେ ମାତ୍ରାରେ ସଫଳତା ମିଳିଲା ନାହିଁ ।
ଶିଶୁ ଅଧିକାର ଓ ସୁରକ୍ଷା ପାଇଁ ଅନେକ ସଚେତନତା କରାଯାଉଛି । ତୃଣମୂଳ ସ୍ତରରେ ସଚେତନତା କରିବା ପାଇଁ ଅନେକ ପଦକ୍ଷେପ ଗ୍ରହଣ କରୁଛନ୍ତି ରାଜ୍ୟ ସରକାର । ତେବେ ଶିଶୁ ଯୌନ ନିର୍ଯାତନା ଓ ଶିଶୁ ହିଂସାରେ ପୁରୀ ପ୍ରଥମ ରହିଥିବା ତଥ୍ୟକୁ ନେଇ ପ୍ରଶ୍ନ ଉଠାଇଛନ୍ତି ଜିଲ୍ଲା ଶିଶୁ ସୁରକ୍ଷା ଅଧିକାରୀ । କିଭଳି ଓ କେଉଁଠୁ ଏହି ତଥ୍ୟ ଦିଆଗଲା ତାର ଅନୁସନ୍ଧାନ କରାଯିବ । ଶିଶୁଙ୍କ ପାଇଁ ପ୍ରତିଟି ସ୍ତରରେ କାର୍ଯ୍ୟ କରାଯାଉଛି ଓ ଶିଶୁ ହିଂସାରେ ଅନେକ ପଦକ୍ଷେପ ଗ୍ରହଣ କରାଯାଇଛି ବୋଲି କହିଛନ୍ତି ଜିଲ୍ଲା ଶିଶୁ ସୁରକ୍ଷା ଅଧିକାରୀ ମନୋଜ ତ୍ରିପାଠୀ । ଅନ୍ଲାଇନ୍ରେ ଶିଶୁ ଯୌନ ଶୋଷଣ ମାମଲାରେ ଓଡ଼ିଶା କଥା ପଦାକୁ ଆସିବା ପରେ ଶିଶୁ ସୁରକ୍ଷା ଆୟୋଗର ପାରିବାପଣିଆକୁ ନେଇ ଉଠିଛି ପ୍ରଶ୍ନ । ଏଥି ସମ୍ପର୍କିତ ସିବିଆଇ ମାମଲା ପଦାକୁ ଆସିବା ପରେ ଏବେ ସଚେତନ ହେଉଛି ଶିଶୁ ସୁରକ୍ଷା ଆୟୋଗ । ତେବେ ଶିଶୁ ସୁରକ୍ଷା ଦିଗରେ ହେଉଥିବା ସଚେତନତା ବା କାର୍ଯ୍ୟ କେବଳ କାଗଜକଲମରେ ସୀମିତ ବୋଲି ଏହି ଆକଳନରୁ ହିଁ ସ୍ପଷ୍ଟ ହେଉଛି ।
