ସତ୍ୟଶିଖା (ଭୁବନେଶ୍ୱର) ୨୩/୧୧/୨୦୨୦ : ଭୁବନେଶ୍ୱର ଜମୁଛି ଅନୈତିକ କାର୍ଯ୍ୟ । ଚାହିଦା ଦେଖି ସପ୍ଲାଏ କରୁଛନ୍ତି ଦଲାଲ୍ମାନେ। ସହରକୁ ଆଜି ଯିଏ ରୂପଜୀବୀ ହୋଇ ଆସୁଛି କିଛିଦିନ ପରେ ସେ ରାଣୀ ମହୁମାଛି ହୋଇଯାଉଛି । ନିଜେ ଯୁବତୀଙ୍କୁ ରଖି ଆରମ୍ଭ କରିଦେଉଛନ୍ତି ବେପାର । ଗ୍ରାହକଙ୍କୁ ଅଳ୍ପ ଟଙ୍କା ଓ ପୂର୍ଣ୍ଣ ସୁରକ୍ଷାର ସହ ସନ୍ତୁଷ୍ଟ କରିବାକୁ ସମ୍ପୂର୍ଣ୍ଣ ଉଦ୍ୟମ କରୁଛନ୍ତି । ସହରର ଏମିତି କେଉଁ ଅଞ୍ଚଳ ନାହିଁ ଯେଉଁଠି ରୂପଜୀବୀମାନେ ବେପାର କରୁନାହାନ୍ତି । ପୋଲିସ୍ର ଢିଲା ଓ ଖାମଖିଆଲି ଗୁଣ ପାଇଁ ସହରର କୋଣ ଅନୁକୋଣରେ ଏବେ ଅନୈତିକ କାର୍ଯ୍ୟ ବଢି ଚାଲିଛି ।
ରାଜ୍ୟ ବାହାରୁ ଭୁବନେଶ୍ୱରକୁ ମାଳମାଳ ରୂପଜୀବୀ ଆସି ଏଠାରେ ଦେହ ବ୍ୟବସାୟ କରୁଛନ୍ତି। ଦଲାଲମାନେ ଟୁରିଷ୍ଟ ଭିସାରେ ଥାଇଲାଣ୍ଡ, ତାସ୍କେଣ୍ଟ, ନେପାଳ ଓ ବାଂଲାଦେଶରୁ ଯୁବତୀଙ୍କୁ ଆଣି ବିଭିନ୍ନ ମସାଜ୍ ପାର୍ଲରରେ ରଖି ଅନୈତିକ କାର୍ଯ୍ୟରେ ଲିପ୍ତ କରାନ୍ତି । କିନ୍ତୁ ପୋଲିସ୍ ଭୟରେ ଏ ସବୁ କାମ ଲୁଚା ଛପାରେ ଚାଲେ । ସେଥିପାଇଁ ଦାମ୍ ମଧ୍ୟ ଅଧିକ ରହୁଥିଲା । ଗ୍ରାହକ ପିଛା ୫ ହଜାରରୁ ୨୫ ହଜାର ଟଙ୍କା ପର୍ଯ୍ୟନ୍ତ ରହୁଥିଲା ଦାମ୍ । କିନ୍ତୁ ୨୦୧୯ ଅଗଷ୍ଟ ମାସ ଠାରୁ ପୋଲିସ୍ ଏ ସବୁ ଅନୈତିକ କାର୍ଯ୍ୟ ଉପରୁ ନଜର ହଟାଇ ଦେଇଛି। ପାର୍ଲରରେ ଆଉ ଚଢଉ ହେଉନି କି ଆଗଭଳି ଆଉ ଗିରଫଦାରୀ କରାଯାଉ ନାହିଁ । ଯାହାର ଫାଇଦା ଉଠାଇଛନ୍ତି ଦେହ ବ୍ୟବସାୟୀ ଓ ଯୌନକର୍ମୀ । ପୂର୍ବ ଅପେକ୍ଷା ଦେହ ବେପାରରେ ଅନେକ ପରିବର୍ତ୍ତନ ଆସିଛି । ବାଂଲାଦେଶ ଓ ପଶ୍ଚିମବଙ୍ଗରୁ ଆସୁଥିବା ରୂପଜୀବୀ ୧୦ରୁ ୧୫ ଦିନ କାମ କରିବା ପରେ ଏଟାରେ ପାଲଟି ଯାଉଛନ୍ତି ରାଣୀ ମହୁମାଛି ।
ଏହି ମହୁମାଛିମାନେ ନିଜ ଅଧିନରେ ୫ରୁ ୧୦ ରୂପଜୀବୀଙ୍କୁ ରଖି ବେପାର କରୁଛନ୍ତି । ଗ୍ରାହକଙ୍କୁ ଆକୃଷ୍ଟ କରିବାକୁ ମାତ୍ର ୧ ହଜାର ଓ ୨ ହଜାର ଟଙ୍କାରେ ସେବା ଦେଉଛନ୍ତି । ରାଜଧାନୀର ବିଭିନ୍ନ ଅଞ୍ଚଳରେ ଘର ଭଡା ନେଇ ଏମାନେ ରହୁଛନ୍ତି । ଗ୍ରାହକ ଯୋଗାଡ ପାଇଁ ନିଆଯାଉଚି ସୋସିଆଲ ମିଡିଆର ସାହାଯ୍ୟ । ଅନ୍ଲାଇନ୍ରେ ହୋଟେଲ୍ ରୁମ୍ ନେଇ ସେଠାରେ ଧନ୍ଦା ଚାଲୁଛି । ପୂର୍ବାପେକ୍ଷା ଦାମ୍ କମ୍ ଥିବାରୁ ଗ୍ରାହକମାନଙ୍କ ଭିଡ଼ ବି ଲାଗୁଛି ।
ନିୟମ ଅନୁସାରେ, ବିଦେଶରୁ ଆସୁଥିବା ପ୍ରତ୍ୟେକ ବ୍ୟକ୍ତିଙ୍କ ତଥ୍ୟ ପୋଲିସ୍ ପାଖରେ ରହିବା କଥା । ବିଦେଶୀ ନାଗରିକ କେଉଁ ଭିସାରେ ଏଠାକୁ ଆସିଛନ୍ତି । ଏଠାରେ କ’ଣ କରୁଛନ୍ତି ? କେଉଁଠି ରହୁଛନ୍ତି? ଯେଉଁ କାର୍ଯ୍ୟ କରିବାକୁ ଆସିଛନ୍ତି ଆଉ କ’ଣ କରୁଛନ୍ତି? ମାତ୍ର କେବଳ ଛାତ୍ରଛାତ୍ରୀମାନଙ୍କୁ ଛାଡି ଦେଲେ ବାକି କାହା ବିଷୟରେ ପୋଲିସ୍ ପାଖରେ କିଛି ଖୋଜ୍ ଖବର ନାହିଁ ।
ଗତ ଫେବ୍ରୁଆରୀରେ ଥାଇଲାଣ୍ଡରୁ ୨୨ ଜଣ ଯୁବତୀ ଟୁରିଷ୍ଟ ଭିସାରେ ଭୁବନେଶ୍ୱର ଆସିଥିଲେ । ଏବେ ଏମାନେ ବିଭିନ୍ନ ମସାଜ୍ ସେଣ୍ଟରରେ କାମ କରୁଥିବା ସୂଚନା ମିଳିଛି । ମାତ୍ର ଏମାନଙ୍କ ବିଷୟରେ ପୋଲିସ୍ ପାଖରେ କୌଣସି ଖବର ନାହିଁ । ତା ଉପରେ ଲକ୍ଡାଉନ୍, ସଟଡାଉନ୍ ଓ କୋଭିଡ୍ କଟକଣା ଏମାନଙ୍କ ପାଇଁ କଙ୍କଡାକୁ ଗୋଳିପାଳି ସୁହାଇଲା ଭଳି ସୁଯୋଗ ଦେଇଛି ।
ରାଜ୍ୟରେ ୧୦ ହଜାରରୁ ଅଧିକ ଯୌନକର୍ମୀ
ସରକାରଙ୍କ ପାଖରେ ଏମାନଙ୍କ ସଂପର୍କରେ ସମ୍ପୂର୍ଣ୍ଣ ତଥ୍ୟ ନାହିଁ । ସରକାରୀ ରିପୋର୍ଟ କହୁଛି ମାତ୍ର ୨୨ ଟି ଜିଲ୍ଳାରେ ୧୦ହଜାର ୨୧୦ ଜଣ ଯୌନକର୍ମୀ ଅଛନ୍ତି । ଏହି ୨୨ ଟି ଜିଲ୍ଳା ମଧ୍ୟରୁ ବାଲେଶ୍ୱରରେ ଜିଲ୍ଲାରେ ସର୍ବାଧିକ ୧ ହଜାର ୫୦ ଜଣ ଯୌନକର୍ମୀ କାର୍ଯ୍ୟ କରୁଛନ୍ତି । କଟକରେ ୨୫୦ ଓ ଖୋର୍ଦ୍ଧାରେ ୬୧୦ ଜଣ, ଯାଜପୁରରେ ୭ ଶହ, ପୁରୀରେ ୨୫୦ ଜଣ ଯୌନକର୍ମୀ ଅଛନ୍ତି ବୋଲି ସରକାର କହୁଛନ୍ତି । ପୋଲିସ୍ର ରିପୋର୍ଟ ଅନୁସାରେ, କେବେଳ ମାଳିସାହିରେ ଅଛନ୍ତି ୫ ଶହରୁ ଅଧିକ ଯୌନକର୍ମୀ । ସେହିପରି ୨୦୧୫ରୁ ୨୦୧୮ ମଧ୍ୟରେ କମିଶନରେଟ୍ ପୁଲିସ୍ ୨ ହଜାର ଯୌନ କର୍ମଚୀଙ୍କୁ ବିଭିନ୍ନ ସ୍ଥାନରୁ ଉଦ୍ଧାର କରି ସେମାନଙ୍କ ଘରକୁ ପଠାଇବାକୁ ବ୍ୟବସ୍ଥା କରିଛି ।
