ସତ୍ୟଶିଖା( ନୂଆଦିଲ୍ଲୀ )୦୫.୦୫.୨୦୨୨ : 3 ଦିନିଆ ୟୁରୋପୀୟ ଦେଶ ଗସ୍ତରୁ ଫେରିଲେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି । ଦିଲ୍ଲୀରେ ପହଞ୍ଚିବାର ପରେ ଆଜି 7 ରୁ 8 ଟି ବୈଠକ କରିବେ । ଆଗାମୀ ମୌସୁମୀ ଏବଂ ହିଟ୍ ୱେଭ୍ ନେଇ ମଧ୍ୟ ଗୁରୁତ୍ୱପୂର୍ଣ୍ଣ ସମୀକ୍ଷା ବୈଠକ କରିବେ ପ୍ରଧାନମନ୍ତ୍ରୀ । ବଙ୍ଗୋପସାଗରରେ ସୃଷ୍ଟି ହେବାକୁ ଯାଉଥିବା ସମ୍ଭାବ୍ୟ ଲଘୁଚାପ ଏବଂ ବାତ୍ୟା ନେଇ ମଧ୍ୟ ଆଲୋଚନା କରି ପାରନ୍ତି ପ୍ରଧାନମନ୍ତ୍ରୀ ।
ତିନି ଦେଶ ଇଉରୋପୀୟ ଗସ୍ତ ସମୟରେ ପ୍ରଧାନମନ୍ତ୍ରୀ ନବ ନିର୍ବାଚିତ ଫ୍ରାନ୍ସର ରାଷ୍ଟ୍ରପତି ଇମାନୁଏଲ୍ ମାକ୍ରୋନଙ୍କ ସହ ଆଲୋଚନା କରିଥିଲେ । ପ୍ରତିରକ୍ଷା, ମହାକାଶ, ନାଗରିକ ଆଣବିକ ସହଯୋଗ ଏବଂ ଲୋକ-ଲୋକଙ୍କ ସମ୍ପର୍କ ସହିତ ବିଭିନ୍ନ ଦ୍ୱିପାକ୍ଷିକ ପ୍ରସଙ୍ଗ ଉପରେ ଦୁଇ ନେତା ଆଲୋଚନା କରିଥିଲେ । ଏହାସହ ଆଞ୍ଚଳିକ ଏବଂ ବିଶ୍ୱସ୍ତରୀୟ ପ୍ରସଙ୍ଗଗୁଡିକ ବିଷୟରେ ମଧ୍ୟ ଆଲୋଚନା ହୋଇଥିଲା ।
ତେବେ ସେଠାରୁ ବାହାରିବାର କିଛି କ୍ଷଣ ପୂର୍ବରୁ ପ୍ରଧାନମନ୍ତ୍ରୀ ଟ୍ୱିଟ୍ କରି କହିଥିଲେ ଯେ, “ମୋ ଫ୍ରାନ୍ସ ଗସ୍ତ ଛୋଟ ଥିଲା କିନ୍ତୁ ବହୁତ ଫଳପ୍ରଦ ଥିଲା । ରାଷ୍ଟ୍ରପତି ଇମାନୁଏଲ୍ ମାକ୍ରୋନ୍ ଏବଂ ମୁଁ ବିଭିନ୍ନ ବିଷୟ ଉପରେ ଆଲୋଚନା କରିବାର ସୁଯୋଗ ପାଇଥିଲୁ । ମୁଁ ତାଙ୍କୁ ଏବଂ ଫ୍ରାନ୍ସ ସରକାରଙ୍କୁ ଆତିଥ୍ୟ ପାଇଁ ଧନ୍ୟବାଦ ଜଣାଉଛି । ”
ପ୍ରଧାନମନ୍ତ୍ରୀ ମୋଦି ତାଙ୍କ ଗସ୍ତ ସମୟରେ ଜର୍ମାନୀ, ଡେନମାର୍କ ଏବଂ ଫ୍ରାନ୍ସର ନେତୃତ୍ତ୍ୱ ସହିତ ଅନେକ ଉଚ୍ଚସ୍ତରୀୟ ବୈଠକ କରିଥିଲେ । ଏହାସହ ଏହି ତିନୋଟି ଦେଶରେ ଭାରତୀୟ ଡ଼ିଆପୋରା ସହିତ ମଧ୍ୟ କଥାବାର୍ତ୍ତା କରିଥିଲେ । ପ୍ରଧାନମନ୍ତ୍ରୀ ତାଙ୍କ ଗସ୍ତ ସମୟରେ ଜର୍ମାନୀ ଏବଂ ଡେନମାର୍କର ବ୍ୟବସାୟିକ ନେତାଙ୍କ ସହ କଥାବାର୍ତ୍ତା ମଧ୍ୟ କରିଥିଲେ ।
