ଜମ୍ମୁ ଓ କଶ୍ମୀର ପାଇଁ ‘ସେହତ୍‌’ ସ୍ୱାସ୍ଥ୍ୟସେବା ଯୋଜନାର ଶୁଭାରମ୍ଭ କଲେ ପ୍ରଧାନମନ୍ତ୍ରୀ ମୋଦୀ

ସତ୍ୟଶିଖା (ନୂଆଦିଲ୍ଲୀ) ୨୬/୧୨/୨୦୨୦ : ଶନିବାର ଦିନ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଜମ୍ମୁ ଓ କଶ୍ମୀର ବାସିନ୍ଦାଙ୍କ ନିମନ୍ତେ ‘ଆୟୁଷ୍ମାନ ଭାରତ ପ୍ରଧାନମନ୍ତ୍ରୀ ଜନ ଆରୋଗ୍ୟ ଯୋଜନା’ (ଏବି-ପିଏମ୍‌ଜେଏଓ୍ଵାଇ) ଅନ୍ତର୍ଗତ ‘ସେହତ୍‌’ ଯୋଜନାର ଶୁଭାରମ୍ଭ କରିଛନ୍ତି । ‘ସୋସିଓ-ଇକୋନୋମିକ୍‌ ଆଣ୍ଡ୍‌ କାଷ୍ଟ୍‍ ସେନ୍‌ସସ୍‌’ (ଏସ୍‌ଇସିସି)୨୦୧୧ ଆଧାରରେ ଏହାଦ୍ୱାରା ୨୧ ଲକ୍ଷ ହିତାଧିକାରୀ ଉପକୃତ ହେବେ । ସେମାନଙ୍କୁ ମାଗଣାରେ ୫ ଲକ୍ଷ ଟଙ୍କା ପର୍ଯ୍ୟନ୍ତ ଡାକ୍ତରୀ ଚିକିତ୍ସା ଖର୍ଚ୍ଚ ମିଳିବ । ପ୍ରଧାନମନ୍ତ୍ରୀଙ୍କ ନେତୃତ୍ୱକୁ ପ୍ରଶଂସା କରି ଉପରାଜ୍ୟପାଳ ମନୋଜ ସିହ୍ନା କହିଛନ୍ତି, ପ୍ରଧାନମନ୍ତ୍ରୀ କିଷାନ ସମ୍ମାନ ନିଧି ଯୋଜନାରେ ୧୦ ଲକ୍ଷ ୭୦ ହଜାର କୃଷକ ଉପକୃତ ହୋଇଛନ୍ତି । ଗତବର୍ଷ ଅଗଷ୍ଟ ମାସରୁ ଜମ୍ମୁ ଓ କଶ୍ମୀରରେ ବିକାଶର ନୂତନ ତରଙ୍ଗ ସୃଷ୍ଟି ହୋଇଛି । ଏଥିସହ ଉପରାଜ୍ୟପାଳ କେନ୍ଦ୍ରଶାସିତ ଅଞ୍ଚଳ ଜମ୍ମୁ ଓ କଶ୍ମୀର ବିକାଶ ନିମନ୍ତେ ହୋଇଥିବା ଯୋଜନା ସମ୍ପର୍କରେ ସୂଚନା ଦେଇଥିଲେ ।କୋଭିଡ୍‌-୧୯ ଟିକା ନିମନ୍ତେ ଜମ୍ମୁ ଓ କଶ୍ମୀରରେ ସମସ୍ତ ପ୍ରସ୍ତୁତି ହୋଇଥିବା କଥା ମଧ୍ୟ ସିହ୍ନା କହିଛନ୍ତି । ଏହି କାର୍ଯ୍ୟକ୍ରମରେ ଯୋଗ ଦେଇ କେନ୍ଦ୍ର ଗୃହମନ୍ତ୍ରୀ ଅମିତ ଶାହ କହିଛନ୍ତି, ଜମ୍ମୁ ଓ କଶ୍ମୀର ପାଇଁ ଆଜିର ଦିନଟି ଖୁବ୍‌ ତାତ୍ପର୍ଯ୍ୟପୂର୍ଣ୍ଣ । ଅଟଳବିହାରୀ ବାଜପେୟୀଙ୍କ ଜନ୍ମବାର୍ଷିକୀର ଦିନକ ପରେ ଏହି ଯୋଜନାର ଶୁଭାରମ୍ଭ ହେଉଛି । କଶ୍ମୀର ନିମନ୍ତେ ବାଜପେୟୀଙ୍କ ଭାବାବେଗ ସମ୍ପର୍କରେ ସମସ୍ତେ ଜାଣନ୍ତି । ଏହି ଯୋଜନା ସବୁଆଡ଼େ ଲାଗୁ ହୋଇଛି। ସବୁଆଡ଼େ ଏହି ଯୋଜନା କେବଳ ଗରିବମାନଙ୍କ ନିମନ୍ତେ ଉଦ୍ଦିଷ୍ଟ । କିନ୍ତୁ, ଜମ୍ମୁ ଓ କଶ୍ମୀରର ସମସ୍ତ ବ୍ୟକ୍ତି ଏହି ଯୋଜନାରୁ ସୁଫଳ ପାଇବେ ।