ସତ୍ୟଶିଖା(ଭୁବନେଶ୍ୱର) ୦୫.୦୮ .୨୦୨୧: ଏସିଏଫ୍ ସୌମ୍ୟରଞ୍ଜନ ମହାପାତ୍ରଙ୍କ ସନ୍ଦେହଜନକ ମୃତ୍ୟୁକୁ ମାସେ ବିତିବାକୁ ଥିବାବେଳେ ରହସ୍ୟ ଜଣାପଡ଼ିନାହିଁ । ସୌମ୍ୟଙ୍କ ମୃତ୍ୟୁକୁ ନେଇ କୌଣସି ଠୋସ୍ ପ୍ରମାଣ ପୁଲିସକୁ ମିଳିନଥିବାରୁ ପରିବାରଲୋକଙ୍କ ମଧ୍ୟରେ ଅସନ୍ତୋଷ ବଢ଼ିବାରେ ଲାଗିଛି । ଏ ନେଇ ସୌମ୍ୟଙ୍କ ଭାଇ ପ୍ରିୟବ୍ରତ ପଣ୍ଡା ମୁଖ୍ୟମନ୍ତ୍ରୀଙ୍କ ଅଭିଯୋଗ ପ୍ରକୋଷ୍ଠରେ ଅଭିଯୋଗ କରିଛନ୍ତି । ଏହାସହ କମିଶନରେଟ୍ ପୁଲିସ କାର୍ଯ୍ୟାଳୟରେ ଥିବା ଡିଜିପି କ୍ୟାମ୍ପ ଅଫିସ୍ରେ ମଧ୍ୟ ଅଭିଯୋଗପତ୍ର ଦେଇଛନ୍ତି । ଘଟଣାର ନିରପେକ୍ଷ ତଦନ୍ତ ପାଇଁ ସିବିଆଇକୁ ତଦନ୍ତ ଦାୟିତ୍ୱ କିମ୍ବା ଏସ୍ଆଇଟି ଗଠନ କରାଯାଉ ବୋଲି ଏତଲାରେ ଉଲ୍ଲେଖ କରିଛନ୍ତି । ଏହି ସମୟରେ ସୌମ୍ୟଙ୍କ ଭାଇ ପ୍ରିୟବ୍ରତଙ୍କ ସହ ତାଙ୍କ ସମ୍ପର୍କୀୟ, ମାନବାଧିକାରକର୍ମୀ ରାଜ୍ୟ ସଭାପତି ଶିବସୁନ୍ଦର ସ୍ୱାଇଁ, ଖୋର୍ଦ୍ଧା ସଭାପତି ନାରାୟଣ ସାହୁ ଓ ରାଜ୍ୟ ଯୁଗ୍ମ ସମ୍ପାଦକ ଶଶାଙ୍କ ଶେଖର ପଣ୍ଡା ଉପସ୍ଥିତ ଥିଲେ ।
ଅଭିଯୋଗପତ୍ରରେ ତଦନ୍ତ ପ୍ରକ୍ରିୟାକୁ ନେଇ ବିଭିନ୍ନ ପ୍ରଶ୍ନ ଉଠାଯାଇଥିବାବେଳେ ସୌମ୍ୟଙ୍କ ପତ୍ନୀ ବିଦ୍ୟାଭାରତୀଙ୍କ ଜାତକକୁ ନେଇ ଚାଞ୍ଚଲ୍ୟକର ତଥ୍ୟ ରହିଛି । ମୟୂରଭଞ୍ଜ ଜିଲ୍ଲାର ଅକ୍ଷୟ ପ୍ରହରାଜ ନାମକ ଜଣେ ଯୁବକଙ୍କୁ ବିଦ୍ୟାଭାରତୀ ବିବାହ କରିବାକୁ ଯାଉଥିବାବେଳେ ଏଥିରେ ବିଦ୍ୟାଙ୍କ ଜାତକ ବାଧକ ସାଜିଥିଲା । ବିବାହ ପରେ ବିଦ୍ୟାଭାରତୀ ବିଧବା ହେବାର ଯୋଗ ରହିଥିବା ଜାତକରେ ଲେଖାଯାଇଥିଲା । ତେଣୁ ସେ ଅକ୍ଷୟଙ୍କ ପରିବର୍ତ୍ତେ ସୌମ୍ୟଙ୍କୁ ବିବାହ କରିଥିଲେ । ସୌମ୍ୟଙ୍କ ମୃତ୍ୟୁ ପରେ ସେ ଅକ୍ଷୟଙ୍କୁ ବିବାହ କରିବାକୁ ଯୋଜନା କରୁଥିôବା ଅଭିଯୋଗପତ୍ରରେ ଉଲ୍ଲେଖ ହୋଇଛି । ତେବେ ବର୍ତ୍ତମାନ ସୁଦ୍ଧା ଅକ୍ଷୟ ଚରିତ୍ରକୁ ଅନାବୃତ୍ତ କରାନଯିବା ସନ୍ଦେହଜନକ ବୋଲି କୁହାଯାଉଛି । ତେବେ ଏହି ୪ପୃଷ୍ଠା ବିଶିଷ୍ଟ ଅଭିଯୋଗ ପତ୍ରରେ ତିନୋଟି କଥା ଉଲ୍ଲେଖ କରାଯାଇଥିବା ଜଣାପଡିଛି । ଘଟଣା ନିରପେକ୍ଷ ଭାବରେ ତଦନ୍ତ କରାଯାଇ ତୁରନ୍ତ ସୌମ୍ୟଙ୍କ ପରିବାରକୁ ନ୍ୟାୟ ପ୍ରଦାନ କରାଯାଉ ।
ନଚେତ୍ ଏସ୍ଆଇଟି ଗଠନ କରି ତଦନ୍ତ ଭାର ତାଙ୍କୁ ପ୍ରଦାନ କରାଯାଉ, ନହେଲେ ମାମଲା ସିବିଆଇକୁ ହସ୍ତାନ୍ତର କରାଯାଉ ବୋଲି ଅଭିଯୋଗପତ୍ରରେ ଉଲ୍ଲେଖ ରହିଛି । ଅନ୍ୟପଟେ ଘଟଣାର ପ୍ରତ୍ୟକ୍ଷ ସାକ୍ଷ୍ୟ ଓ ପ୍ରମାଣ ନଷ୍ଟ କରାଯିବାର ଆଶଙ୍କା ରହିଥିଲେ ମଧ୍ୟ ଏନେଇ କୌଣସି ପଦକ୍ଷେପ ଗ୍ରହଣ କରାଯାଇନଥିବା କୁହାଯାଇଛି । ସେହିପରି ଘଟଣାର ତଦନ୍ତ ପ୍ରକ୍ରିୟା ସମାପ୍ତ ହୋଇନଥିବାବେଳେ ଡିଏଫ୍ଓ ସଂଗ୍ରାମ କେଶରୀ ବେହେରାଙ୍କୁ ଗଜପତି ଏସ୍ପି କ୍ଲିନ୍ଚିଟ୍ ପ୍ରଦାନ କରିବା ଏବଂ କ୍ରାଇମ୍ ସିନ୍ ରି-କ୍ରିଏଟ୍ କରିବା ପୂର୍ବରୁ ସନ୍ଦେହଘେରରେ ଥିବା ରୋଷେୟାଙ୍କୁ ନିର୍ଦ୍ଦୋଷ ଭାବେ ଏସ୍ପି ଅଭିହିତ କରିବାର ଯଥାର୍ଥତା କେଉଁଠି ରହିଛି ବୋଲି ଏଥିରେ ପ୍ରଶ୍ନ କରାଯାଇଛି । ଉଲ୍ଲେଖଯୋଗ୍ୟ, ଗତ ୧୯ ତାରିଖରେ ସୌମ୍ୟଙ୍କ ଭାଇ ମୁଖ୍ୟମନ୍ତ୍ରୀଙ୍କ ଅଭିଯୋଗ ପ୍ରକୋଷ୍ଠକୁ ଆସିଥିଲେ । ଏହାସତ୍ତ୍ୱେ ତଦନ୍ତ ପ୍ରକ୍ରିୟାରେ ଅଗ୍ରଗତି ଘଟିନଥିବାରୁ ବୁଧବାର ପୁଣିଥରେ ସେ ଦ୍ୱିତୀୟଥର ପାଇଁ ମୁଖ୍ୟମନ୍ତ୍ରୀଙ୍କ ଅଭିଯୋଗ ପ୍ରକୋଷ୍ଠର ଦ୍ୱାରସ୍ଥ ହୋଇଛନ୍ତି ।
