ସତ୍ୟଶିଖା(ଭୁବନେଶ୍ୱର) ୨୧.୦୭.୨୦୨୧: ରାଜଧାନୀ ଭୁବନେଶ୍ୱରର ସମସ୍ତ ସରକାରୀ ସ୍ୱାସ୍ଥ୍ୟ କେନ୍ଦ୍ରରେ ଆସନ୍ତାକାଲିଠୁ ଗର୍ଭବତୀ ମହିଳାଙ୍କ ପାଇଁ କୋଭିଡ୍ ଟିକା ଉପଲବ୍ଧ ହେବ। ସ୍ୱାସ୍ଥ୍ୟ ବିଭାଗ ପକ୍ଷରୁ ଏନେଇ ଟ୍ୱିଟ୍ ମାଧ୍ୟମରେ ଦିଆଯାଇଥିବା ସୂଚନା ଅନୁସାରେ, ଆସନ୍ତାକାଲିଠୁ ପ୍ରତ୍ୟେକ ବୁଧବାର ଓ ଶନିବାର ଦିନ ୧୧ଟାରୁ ୧ଟା ମଧ୍ୟରେ କ୍ୟାପିଟାଲ ହସ୍ପିଟାଲ ସମେତ ଭୁବନେଶ୍ୱରର ସମସ୍ତ ସରକାରୀ ସହରାଂଚଳ ସ୍ୱାସ୍ଥ୍ୟ କେନ୍ଦ୍ରରେ ଗର୍ଭବତୀ ମହିଳାଙ୍କ ପାଇଁ କୋଭାକ୍ସିନ୍ ଟିକା ଉପଲବ୍ଧ ହେବ। ଗର୍ଭବତୀ ମହିଳାମାନେ ନିଜର ବୈଧ ପରିଚୟ ପତ୍ର(ଆଧାର ଅବା ପ୍ୟାନ୍ କାର୍ଡ) ଓ ଏମସିପି କାର୍ଡ ଆଣି ଏହି ଟିକା ନେଇପାରିବେ। ଏହି ଟିକା ନେବା ସମୟରେ କୋଭିଡ୍ ଗାଇଡଲାଇନ ପାଳନ କରିବାକୁ ସ୍ୱାସ୍ଥ୍ୟ ବିଭାଗ ପକ୍ଷରୁ ପରାମର୍ଶ ଦିଆଯାଇଛି।
