ସତ୍ୟଶିଖା(ଭୁବନେଶ୍ୱର) ୧୧.୧୨.୨୦୨୧: ଲୋୟର ପିଏମଜିରେ ଛାତ୍ର କଂଗ୍ରେସ କର୍ମୀଙ୍କ ଉପରେ ପୋଲିସର ବର୍ବରତା ଘଟଣା । ପ୍ରେସମିଟ୍ କରି ବର୍ଷିଲା କଂଗ୍ରେସ । ପୋଲିସର ଦୁର୍ବ୍ୟବହାରକୁ ନିନ୍ଦା କରିଛନ୍ତି ନରସିଂହ ମିଶ୍ର । ସେ କହିଛନ୍ତି, କେଉଁ ଆଇନରେ ଅଛି ଆମ ପାର୍ଟି ଅଫିସରେ ପଶିକି ବାଡେଇବ ପୋଲିସ । କାହା ଅନୁମତି ନେଇ ପୋଲିସ କାର୍ଯ୍ୟାଳୟ ଭିତରେ ପଶିଲା । ବାଡ଼ି ଧରି ନିର୍ମମ ଭାବେ ପିଟିବା ଠିକ ହୋଇନାହିଁ । ଯେଉଁ କଂଗ୍ରେସ ଦଳ ଇଂରେଜଙ୍କ ବନ୍ଧୁକକୁ ଡରି ନଥିଲା, ସେ ୟେ ମାଡରେ ଡରିଯିବ ନାହିଁ ଆନ୍ଦୋଳନ ଜାରି ରହିବ କହିଛନ୍ତି ନରସିଂହ ମିଶ୍ର ।
ପଶୁଙ୍କୁ ମାରିଲା ଭଳି ପୋଲିସ କଂଗ୍ରେସ କର୍ମୀଙ୍କୁ ମାରି ଚାଲିଥିଲା । ଦାୟିତ୍ୱରେ ଥିବା ପୋଲିସ ଅଫିସର ବୋଧେ ସିଆରପିସି ସହ ଆଇନ ପଢିନାହାନ୍ତି । ସରକାରଙ୍କ ଚାପରେ ବେଆଇନ କାମ କରିଛନ୍ତି । ଘଟଣାରେ ବିଚାର ବିଭାଗ ତଦନ୍ତ କରାଯାଉ ବୋଲି ଦାବି କରିଛି କଂଗ୍ରେସ । କମିଶନର କହୁଛନ୍ତି ସେ ଘଟଣା ବିଷୟରେ ଜାଣିନାହାନ୍ତି, ତାହେଲେ କରୁଛନ୍ତି କ’ଣ ? ପୋଲିସ ବିରୋଧରେ 307 ଦଫାରେ ତଦନ୍ତ ହେଉ । ଆମ ଆହତ କର୍ମୀଙ୍କୁ ପୋଲିସ କ୍ଷତିପୂରଣ ଦେଉ ।
