ସତ୍ୟଶିଖା(ନୂଆଦିଲ୍ଲୀ )୦୯.୦୨.୨୦୨୨ : ଦେଶରେ ବଢିବାରେ ଲାଗିଛି ପୋଲିସ ଏନକାଉଣ୍ଟର । ଗତ ୫ ବର୍ଷରେ ପୋଲିସ ଏନକାଉଣ୍ଟରରେ ୬୫୫ ଜଣ ପ୍ରାଣ ହରାଇଛନ୍ତି । ଛତିଶଗଡରେ ସର୍ବାଧିକ ୧୯୧ ଜଣ ପ୍ରାଣ ହରାଇଛନ୍ତି । ସେହିପରି ଦ୍ୱିତୀୟ ସ୍ଥାନରେ ରହିଛି ଉତ୍ତର ପ୍ରଦେଶ । ସେଠାରେ ୧୧୭ଟି ଏନକାଉଣ୍ଟର ହୋଇଛି ।
ସେହିପରି ଆସାମରେ ୫୦ଟି, ଝାଡଖଣ୍ଡରେ ୪୯ଟି, ଜାମ୍ମୁ ଓ କାଶ୍ମୀରରେ ୩୫ଟି ଏନକାଉଣ୍ଟର ଘଟିଛି । ଗତ ୫ ବର୍ଷରେ ଉତ୍ତର ପ୍ରଦେଶରେ ଏନକାଉଣ୍ଟର ହୋଇଥିବା ବିଜେପି ସାଂସଦ ବରୁଣ ଗାନ୍ଧିଙ୍କ ଏକ ପ୍ରଶ୍ନର ଉତ୍ତର ଦେଇ ଏହି ତଥ୍ୟ ରଖିଛନ୍ତି ଗୃହ ରାଷ୍ଟ୍ରମନ୍ତ୍ରୀ ନିତ୍ୟାନନ୍ଦ ରାୟ ।
ଗତ ୨୦୧୭ ଜାନୁଆରୀ ୧ରୁ ୨୦୨୨ ଜାନୁଆରୀ ୩୧ ତାରିଖ ମଧ୍ୟରେ ଘଟିଥିବା ଏନକାଉଣ୍ଟର ତଥ୍ୟକୁ ଆଧାର କରି ସଂସଦରେ ଲିଖିତ ଉତ୍ତର ରଖିଛନ୍ତି ମନ୍ତ୍ରୀ । ବିହାରରେ ୨୨ଟି, ହରିଆଣାରେ ୧୫ଟି, ତାମିଲନାଡୁରେ ୧୪ଟି, ତେଲେଙ୍ଗାନା, ମଧ୍ୟପ୍ରଦେଶ ଓ ଅରୁଣାଚଳ ପ୍ରଦେଶରେ ୧୩ଟି ଲେଖାଏଁ, ରାଜସ୍ଥାନ ଓ ଦିଲ୍ଲୀରେ ୧୮ଟି ଲେଖାଏଁ ଏନକାଉଣ୍ଟର ଘଟିଛି ।
