ସତ୍ୟଶିଖା ( ଭୁବନେଶ୍ୱର )୦୬ /୧୧ /୨୦୨୧: କନ୍ଧମାଳ ଜିଲ୍ଲାରେ ପ୍ରତିବର୍ଷ ଗଞ୍ଜେଇ ଗଛ କଟା ହେଉଛି । ଅବକାରୀ ବିଭାଗ ବିଭିନ୍ନ ସ୍ଥାନରେ ଚଢାଉ କରି ଗଞ୍ଜେଇ ଗଛକୁ କାଟି ନଷ୍ଟ କରି ଦେଉଛି । କିନ୍ତୁ ଜିଲ୍ଲାରେ କେବେ କମୁନି ଗଞ୍ଜେଇ ଚାଷ । ପ୍ରଶାସନ କାଟୁଛି ଲୋକେ ଲଗାଉଛନ୍ତି । ଆଉ ବେଆଇନ୍ ଗଞ୍ଜେଇ ଚାଲାଣ ମଧ୍ୟ ଜାରିରହିଛି । ଅନେକ ସମୟରେ ଗଞ୍ଜେଇ ଚାଲାଣ ବେଳେ ଗାଡି ଧରାପଡୁଛି ।
ଦକ୍ଷିଣ ଓଡିଶାର ଜିଲ୍ଲାଗୁଡିକ ଯଥା, କନ୍ଧମାଳ, କୋରାପୁଟ ଓ ମାଲକାନଗିରି ଜିଲ୍ଲାରେ ଗଞ୍ଜେଇ ଚାଷ ହେଉଛି । ଆଦିବାସୀ ଅଞ୍ଚଳର ପାହାଡ ଉପରେ ଲୁଚା ଛପାରେ ଗଞ୍ଜେଇ ଚାଷ କରୁଛନ୍ତି ଚାଷୀ । ଆଉ ପ୍ରତିବର୍ଷ ଭଳି ଚଳିତ ବର୍ଷ ମଧ୍ୟ ଗଞ୍ଜେଇ ଚାଷ ନଷ୍ଟ କରିଛି ଅବକାରୀ ବିଭାଗ । କନ୍ଧମାଳ ଜିଲ୍ଲାର ପୁଲିସ ଓ ଅବକାରୀ ବିଭାଗର ମିଳିତ ଟିମ୍ ସଦର ଥାନା ଅନ୍ତର୍ଗତ କର୍ଣ୍ଣଡ, ମଗମୁଣ୍ଡା ଏବଂ କାଙ୍ଗାନାଡା ଗାଁ ନିକଟସ୍ଥ ଜଙ୍ଗଲରେ ଚଢାଉ କରିଥିଲେ । ପାହାଡ ଉପରେ ଜଙ୍ଗଲ ଭିତରେ ହୋଇଥିବା କୋଟି କୋଟି ଟଙ୍କାର ବେଆଇନ ଗଞ୍ଜେଇ ଗଛକୁ କାଟି ନଷ୍ଟ କରିଛନ୍ତି । କନ୍ଧମାଳ ଜିଲ୍ଲାର ୧୦୫ ଏକର ଜମିରୁ ଗଞ୍ଜେଇ ଗଛ ଗୁଡିକୁ କାଟିଦିଆଯାଇଛି । ଯାହାର ଆନୁମାନିକ ମୂଲ୍ୟ ପ୍ରାୟ ୧୦ କୋଟି ୫୦ ଲକ୍ଷ ଟଙ୍କା ହେବ ବୋଲି କନ୍ଧମାଳ ଜିଲ୍ଲା ପୋଲିସ ପକ୍ଷରୁ ସୂଚନା ମିଳିଛି ।
