ସତ୍ୟଶିଖା (ନୂଆଦିଲ୍ଲୀ) ୦୫/୦୨/୨୦୨୧ : ବୋଲ ମାନୁନି ତୈଳ ଦର । ଲଗାତର ଭାବେ ବଢିବାରେ ଲାଗିଛି । ଶୁକ୍ରବାର ପୁଣି ପେଟ୍ରୋଲ ଓ ଡିଜେଲ ଦାମରେ ପରିବର୍ତ୍ତନ ହୋଇଛି । ଲିଟର ପିଛା ୩୦ ପଇସା ବଢିଛି ଦର । ପୂର୍ବଦିନ ମଧ୍ୟ ପେଟ୍ରୋଲ ୩୦ ପଇସା ଓ ଡିଜେଲ ୩୫ ପଇସା ବୃଦ୍ଧି ପାଇଥିଲା । ନୂଆ ଦର ସହ ଦିଲ୍ଲୀରେ ପେଟ୍ରୋଲ ଦାମ୍ ୮୬.୯୫ ଓ ଡିଜେଲ ୭୭.୧୩ରେ ପହଁଚିଛି । ସେହିପରି ରାଜସ୍ଥାନର ଶ୍ରୀଗଙ୍ଗାନଗରରେ ପେଟ୍ରୋଲ ଏବେ ୧୦୦ ନିକଟତର ହୋଇଛି । ଇନ୍ଦୋରରେ ମଧ୍ୟ ପେଟ୍ରୋଲ ୯୫ ଟଙ୍କାରୁ ୭ ପଇସା ଦୂରରେ ରହିଛି ।
ମୁମ୍ବାଇରେ ପେଟ୍ରୋଲ ଦାମ୍ ୯୩.୪୪ ଥିବା ବେଳେ ଡିଜେଲ୍ ୮୩.୯୯, କୋଲକାତାରେ ପେଟ୍ରୋଲ ୮୮.୦୧, ନୋଏଡାରେ ୮୬.୧୪ ଟଙ୍କା, ରାଞ୍ଚୀରେ ୮୫.୩୦ ଟଙ୍କା, ବେଙ୍ଗାଲୁରୁରେ ୮୬.୮୫ ଟଙ୍କା, ପାଟନାରେ ୮୯.୪ ପଇସା, ଚଣ୍ଡିଗଡରେ ୮୩.୬୮ ଟଙ୍କା ରହିଛି । ତେବେ ଶ୍ରୀଗଙ୍ଗାନଗରରେ ପେଟ୍ରୋଲ ଦାମ୍ ୯୭.୩୮ ଟଙ୍କା ଥିବା ବେଳେ ଜୟପୁରରେ ୯୩.୨୬ ଓ ଇନ୍ଦୋରରେ ୯୪. ୯୩ ଟଙ୍କା ରହିଛି ।
ତେଲ ଦର ଅହେତୁକ ବୃଦ୍ଧିକୁ ନେଇ ନିକଟରେ କେନ୍ଦ୍ର ପେଟ୍ରୋଲିୟମ ମନ୍ତ୍ରୀ ଧର୍ମେନ୍ଦ୍ର ପ୍ରଧାନ କହିଥିଲେ ଯେ, ଅଶୋଧିତ ତୈଳର ପ୍ରାୟ ୮୦ ପ୍ରତିଶତ ବାହାର ଦେଶରୁ ଭାରତ ଆମଦାନୀ କରୁଥିବା କହିଥିଲେ । କରୋନା ମହାମାରୀ କାରଣରୁ ଅନେକ ଦେଶରେ ତେଲ ଉତ୍ପାଦନ କମିଛି ଏବଂ ଅନେକ କମ୍ପାନୀ ତେଲ ଆମଦାନୀ ମଧ୍ୟ ବନ୍ଦ କରିଦେଇଛନ୍ତି । ଚାହିଦା ଏବଂ ଯୋଗାଣରେ ଅସନ୍ତୁଳନ ହେତୁ ଇନ୍ଧନ ମୂଲ୍ୟ ଉପରେ ଚାପ ପଡୁଥିବା ସେ କହିଥିଲେ । ତେଣୁ ତୈଳ ବଜାରରେ ଦାମ୍ ବୃଦ୍ଧି ହେଉଛି । ସୂଚନାଯୋଗ୍ୟ, ଗତ ୧୦ ମାସ ମଧ୍ୟରେ ପେଟ୍ରୋଲ ଦର ୧୬ ଟଙ୍କା ଓ ଡିଜେଲ ଦାମ ଲିଟର୍ ପିଛା ୧୪ ଟଙ୍କା ବୃଦ୍ଧି ପାଇଛି । କିଛିଦିନ ତଳେ ରାଜସ୍ଥାନ ସରକାର ପେଟ୍ରୋଲ ଓ ଡିଜେଲ ଉପରେ ଲାଗୁ ଥିବା ଭାଟରେ ୨ ଟଙ୍କା ହ୍ରାସ କରିଥିଲେ ।
