ସତ୍ୟଶିଖା (ନୂଆଦିଲ୍ଲୀ) ୨୯/୧୨/୨୦୨୦ : କେନ୍ଦ୍ର ସରକାରଙ୍କ ତରଫରୁ ଜିଏସ୍ଟି କ୍ଷତିପୂରଣର ନବମ କିସ୍ତି ଜାରି କରାଯାଇଛି । ଏଥର ଓଡ଼ିଶାକୁ ୨୦୮.୦୮ କୋଟି ଟଙ୍କା ମିଳିଛି । ନଅ ଥରରେ ରାଜ୍ୟକୁ ସମୁଦାୟ ୨୧୬୨.୨୯ କୋଟି ଟଙ୍କା ମିଳିଛି । ଏହା ପୂର୍ବରୁ ଅଷ୍ଟମ କିସ୍ତିରେ ମଧ୍ୟ ରାଜ୍ୟକୁ ୨୦୮.୦୮କୋଟି ଟଙ୍କା ମିଳିଥିଲା । କେନ୍ଦ୍ର ସରକାର ନଅଟି କିସ୍ତିରେ ରାଜ୍ୟଗୁଡ଼ିକୁ ମୋଟ ୫୪ ହଜାର କୋଟି ଟଙ୍କାର କ୍ଷତିପୂରଣ ରାଶି ପ୍ରଦାନ କରିଛନ୍ତି । ପ୍ରତି କିସ୍ତିରେ ୬୦୦୦ ଟଙ୍କା ଲେଖାଏଁ ଦିଆଯାଉଛି ।
ଯେଉଁ ରାଜ୍ୟଗୁଡ଼ିକ ଋଣ ଜରିଆରେ ୧୧.୦ ଲକ୍ଷ କୋଟି ଟଙ୍କାର ଜିଏସ୍ଟି କ୍ଷତିପୂରଣ ରାଶି ବିକଳ୍ପକୁ ଚୟନ କରିଛନ୍ତି ସେମାନଙ୍କୁ ମୋଟ ଘରୋଇ ଉତ୍ପାଦର ୦.୫% ଅତିରିକ୍ତ ଋଣ ନେବା ଲାଗି ଅନୁମତି ଦିଆଯାଇଛି । ସେହି ଅନୁସାରେ ଓଡ଼ିଶା ପାଇଁ ୨୮୫୮ କୋଟି ଟଙ୍କା ଋଣ କରିବାର ସୁଯୋଗ ରହିଛି । ଜିଏସ୍ଟି କ୍ଷତିପୂରଣକୁ ନେଇ କେନ୍ଦ୍ର ଓ ରାଜ୍ୟଗୁଡ଼ିକ ଭିତରେ ମୁଲଚାଲ ଚାଲିଥିବା ବେଳେ ଯେଉଁ ରାଜ୍ୟ ପ୍ରଥମ ପ୍ରସ୍ତାବ (୧.୧୦ ଲକ୍ଷ କୋଟି ଟଙ୍କାର ଋଣ) ଗ୍ରହଣ କରିବେ ସେମାନଙ୍କୁ ଜିଡିପିର ଅତିରିକ୍ତ ୦.୫% ଋଣ କରିବାର ଅନୁମତି ଦିଆଯିବ ବୋଲି ସରକାର ପ୍ରତିଶ୍ରୁତି ଦେଇଥିଲେ ।
