ସତ୍ୟଶିଖା(ନୂଆଦିଲ୍ଲୀ) ୦୭/୧୨/୨୦୨୦ : ଖୁବ ଶୀଘ୍ର ଦେଶର କିଛି ବଡ ବଡ ରେଳ ଷ୍ଟେସନରେ ଯାତ୍ରୀଙ୍କୁ ଅଧିକ ଭଡା ଦେବାକୁ ପଡିପାରେ । ଭାରତୀୟ ରେଲୱେ ଅନେକ ଷ୍ଟେସନରେ ପୁନଃ ବିକାଶ କାର୍ଯ୍ୟ ଆରମ୍ଭ କରିବାକୁ ଯାଉଛି । ଏଥିପାଇଁ ଯାତ୍ରୀଙ୍କ ଠାରୁ ସର୍ଭିସ ଚାର୍ଜ ନିଆଯାଇପାରେ । ବର୍ତ୍ତମାନ ୧୦୦ ରୁ ଅଧିକ ଷ୍ଟେସନ ଉପରେ ସରକାରଙ୍କ ନଜର ରହିଛି । ଏଇସବୁ ଷ୍ଟେସନରେ କାମ ଆରମ୍ଭ ହୋଇପାରେ । ଟାଇମ୍ସ ଅଫ୍ ଇଣ୍ଡିଆ ଖବର ଅନୁସାରେ, କ୍ୟାବିନେଟ୍ ଏହା ଉପରେ ନିଷ୍ପତ୍ତି ଗ୍ରହଣ କରିପାରେ ଯେ ଯାତ୍ରୀଙ୍କ ଠାରୁ ୟୁଜର୍ସ ଚାର୍ଜ କେତେ ଟଙ୍କା ସଂଗ୍ରହ କରାଯିବ । ତାଛଡା ଏହି ଚାର୍ଜ କେଉଁ କେଉଁ ଷ୍ଟେସନରେ ଲାଗୁ କରାଯିବ ସେନେଇ ମଧ୍ୟ ନିଷ୍ପତ୍ତି ନିଆଯିବ । ରେଳ ମନ୍ତ୍ରାଳୟ ଖୁବ ଶୀଘ୍ର ଏନେଇ ନିଷ୍ପତ୍ତି ନେଇପାରେ । ଯାତ୍ରୀଙ୍କ ଠାରୁ ୧୦ ରୁ ୫୦ ଟଙ୍କା ମଧ୍ୟରେ ଚାର୍ଜ ନିଆଯାଇପାରେ ବୋଲି କୁହାଯାଉଛି ।
ଅଲଗା ଅଲଗା କ୍ଲାସରେ ଯାତ୍ରା କରୁଥିବା ଯାତ୍ରୀଙ୍କ ପାଇଁ ଅଲଗା ଅଲଗା ଚାର୍ଜ ରହିବ । ଭାରତୀୟ ରେଳ ଆରମ୍ଭରେ ୧୨୦ ଷ୍ଟେସନରେ ୟୁଜର୍ସ ଚାର୍ଜ ଲାଗୁ କରିପାରେ ବୋଲି କୁହାଯାଉଛି । ଏହି ଷ୍ଟେସନ୍ ତାଲିକାରେ ଦିଲ୍ଲୀ, ମୁମ୍ବାଇ, ନାଗପୁର, ତିରୁପତି, ଚଣ୍ଡୀଗଡ଼, ଗ୍ୱାଲିୟର ଭଳି ଅନେକ ଷ୍ଟେସନର ନାଁ ସାମିଲ ଅଛି ।ସୂଚନାଯୋଗ୍ୟ ଯେ, ପୁନଃ ବିକାଶ କାର୍ଯ୍ୟ ପାଇଁ ରେଲୱେ ବର୍ତ୍ତମାନ ପ୍ରାଇଭେଟ୍ ନିବେଶକଙ୍କୁ ମଉକା ଦେବାକୁ ବିଚାର କରୁଛି । ୟୁଜର୍ସଙ୍କ ଠାରୁ ଅସୁଲ୍ ହୋଇଥିବା ଚାର୍ଜ ସିଧାସଳଖ ନିବେଶକଙ୍କ ପାଖକୁ ଯିବ । ଯାହାଫଳରେ ସେମାନଙ୍କର ଏକ ସ୍ଥିର ଆୟ ହୋଇପାରିବ ।
ସୂତ୍ର ଅନୁଯାୟୀ, ଏହାର ପ୍ରଭାବ ପ୍ଲାଟଫର୍ମ ଟିକେଟ ଉପରେ ମଧ୍ୟ ପଡିପାରେ । ଅର୍ଥାତ ପ୍ଲାଟଫର୍ମ ଟିକେଟ୍ ପାଇଁ ମଧ୍ୟ ଅଧିକ ଚାର୍ଜ ଦେବାକୁ ପଡିପାରେ । ଯାତ୍ରୀଙ୍କ ମାମଲାରେ ଏହି ଚାର୍ଜ ଭଡାରେ ସାମିଲ କରିଦିଆଯିବ । କିନ୍ତୁ ଅନରିଜର୍ଭ ବା ଅସଂରକ୍ଷିତ ବର୍ଗରେ ଏହି ଚାର୍ଜ ସାମିଲ କରାଯିବ ନା ନାହିଁ ସେନେଇ କୌଣସି ସହମତି ମିଳିନାହିଁ ।
