‌ଫେସ୍‌ବୁକ୍, ଟ୍ବିଟର୍‌କୁ ସଂସଦୀୟ କମିଟିର ସମନ

ସତ୍ୟଶିଖା (ନୂଆଦିଲ୍ଲୀ) ୧୮/୦୧/୨୦୨୧ : ନାଗରିକମାନଙ୍କ ଅଧିକାରର ସୁରକ୍ଷା, ସୋସିଆଲ୍ ମିଡିଆର ଅପବ୍ୟବହାର ଓ ଡିଜିଟାଲ୍ ଜଗତରେ ମହିଳାଙ୍କ ସୁରକ୍ଷା ଆଦି ପ୍ରସଙ୍ଗରେ ଆଲୋଚନା କରିବା ଲାଗି ଫେସ୍‌ବୁକ୍ ଓ ଟ୍ବିଟର୍‌ର ଅଧିକାରୀଙ୍କୁ ସୂଚନା ପ୍ରଯୁକ୍ତିକୁ ନେଇ ଗଠିତ ସଂସଦୀୟ କମିଟି ସମନ ଜାରି କରିଛି । ସେମାନଙ୍କ ସହିତ ଚଳିତ ମାସ ୨୧ରେ ବୈଠକ ହେବ । ହ୍ବାଟସ୍‌ଆପ୍‌ର ଗୋପନୀୟତା ନୀତିକୁ ନେଇ ସାରା ଦେଶରେ ଚର୍ଚ୍ଚା ଜାରି ରହିଥିବା ଭଳି ଏକ ଗୁରୁତ୍ବପୂର୍ଣ୍ଣ ସମୟରେ ଏହି ଦୁଇ ପ୍ରମୁଖ ସୋସିଆଲ୍‌ ମିଡିଆ କଂପାନିର ଅଧିକାରୀଙ୍କୁ ସମନ ଜାରି କରାଯାଇଛି । ସମାଜର ବିଭିନ୍ନ ବର୍ଗ ହ୍ବାଟସ୍‌ଆପ୍‌ ନୀତିକୁ ସମାଲୋଚନା କରିବା ପରେ କଂପାନି ଏହାର କାର୍ଯ୍ୟକାରିତାକୁ ତିନି ମାସ ଘୁଞ୍ଚାଇ ଦେଇଛି ।ଏହି ନୀତିକୁ ଫେବ୍ରୁ୍ଆରି ୮ରୁ ଲାଗୁ କରାଯିବ ବୋଲି କଂପାନି ଘୋଷଣା କରିଥିଲା । ଏବେ ସେହି ସମୟ ସୀମା ମେ’ ୧୫କୁ ଘୁଞ୍ଚାଇ ଦିଆଯାଇଛି । ବ୍ୟବସାୟ ଜଗତ ମଧ୍ୟ ହ୍ବାଟସ୍‌ଆପ୍‌ ନୀତିକୁ ନେଇ ଚିନ୍ତା ପ୍ରକଟ କରିଛି । ଅନେକ ଲୋକ ହ୍ବାଟସ୍‌ଆପ୍ ଛାଡ଼ି ଟେଲିଗ୍ରାମ୍ ଓ ସିଗ୍ନାଲ୍ ଭଳି ଆପ୍‌ ବ୍ୟବହାର କରିବା ଆରମ୍ଭ କରିଛନ୍ତି । ହ୍ବାଟସ୍‌ଆପ୍‌ ବିରୋଧରେ କୋର୍ଟରେ ମାମଲା ରୁଜୁ ହୋଇଛି । ହ୍ବାଟସ୍‌ଆପ୍‌ର ନୀତି ଜାତୀୟ ସୁରକ୍ଷା ପ୍ରତି ବିପଦ ଥିବା ଆବେଦନରେ ଦର୍ଶାଯାଇଛି । ଗତ ଅକ୍ଟୋବରରେ ଏକ ଯୁଗ୍ମ ସଂସଦୀୟ କମିଟି ଉଭୟ ଫେସବୁକ୍ ଓ ଟ୍ବିଟର୍‌ର ଅଧିକାରୀଙ୍କୁ ଡକାଇ ସେମାନଙ୍କ ସହ ବ୍ୟବହାରକାରୀଙ୍କ ତଥ୍ୟ ଓ ଗୋପନୀୟତାର ସୁରକ୍ଷା ପ୍ରସଙ୍ଗ ଉପରେ ଆଲୋଚନା କରିଥିଲା ।