ଦଶମଶ୍ରେଣୀ ଛାତ୍ରୀ ତମନ୍ନାଙ୍କ ଉତ୍ତର ଶୁଣି ଚକିତ ହେଲେ ପାଣ୍ଡିଆନ

ସତ୍ୟଶିଖା ନବରଙ୍ଗପୁର) ୧୧.୧୨.୨୦୨୧: ନବରଙ୍ଗପୁର ଜିଲ୍ଲା ତେନ୍ତୁଳିଖୁଣ୍ଟି ସରକାରୀ ନୋଡାଲ ବାପୁଜୀ ଉଚ୍ଚବିଦ୍ୟାଳୟର ଦଶମ ଶ୍ରେଣୀ ଛାତ୍ରୀ ତମନ୍ନା ରାଣୀ ସିଂହ ୫-ଟି ସଚିବ ଭି.କେ ପାଣ୍ଡିଆନଙ୍କ ମନ ଜିଣିଛନ୍ତି । ସଚିବଙ୍କ ପ୍ରଶ୍ନର ଉତ୍ତର ଦେବାକୁ ଯାଇ ଭବିଷ୍ୟତରେ ଦକ୍ଷିଣ କୋରିଆ ଯାଇ କେ-ପପ ଆଇଡଲ ହେବା ଲକ୍ଷ୍ୟ ରଖିଥିବା କହିଥିଲେ ତମନ୍ନା । ଏଭଳି ଉତ୍ତରରେ ଶ୍ରୀ ପାଣ୍ଡିଆନ ସନ୍ତୋଷ ପ୍ରକାଶ କରିଥିବା ବେଳେ ଗତକାଲି ୫-ଟିର ଏକ ଚାରି ଜଣିଆ ପ୍ରତିନିଧି ଦଳ ତେନ୍ତୁଳିଖୁଣ୍ଟିରେ ପହଞ୍ଚି ତମନ୍ନାଙ୍କ ସହ ଆଲୋଚନା କରିଛନ୍ତି । ଏହା ପରେ ତମନ୍ନାଙ୍କ ପାଇଁ ନୂତନ ଆଶା ସଂଚାର ହୋଇଛି । ୫-ଟି ଅଧୀନରେ ବିଭିନ୍ନ ସରକାରୀ ଉଚ୍ଚ ବିଦ୍ୟାଳୟର ରୂପାନ୍ତରୀକରଣର କାର୍ଯ୍ୟର ସମୀକ୍ଷା ନିମନ୍ତେ ଚଳିତ ମାସ ୮ରେ ତେନ୍ତୁଳିଖୁଣ୍ଟି ପଞ୍ଚାୟତ ସମିତି କାର୍ଯ୍ୟାଳୟ ପରିସରସ୍ଥ ରାଜୀବ ଗାନ୍ଧୀ ସେବା କେନ୍ଦ୍ରରେ ଭର୍ଚୁଆଲ ମୋଡରେ ଏକ ବୈଠକ ଅନୁଷ୍ଠିତ ହୋଇଥିଲା । ଅନ୍ୟ ବରିଷ୍ଠ ଅଧିକାରୀଙ୍କ ସହ ୫-ଟି ସଚିବ ଶ୍ରୀ ପାଣ୍ଡିଆନ ଏଥିରେ ଯୋଗ ଦେଇଥିଲେ । ବୈଠକରେ ଉପସ୍ଥିତ ଥିବା ତମନ୍ନାଙ୍କୁ ୫-ଟି ସଚିବ ଶ୍ରୀ ପାଣ୍ଡିଆନ ତାଙ୍କ ଲକ୍ଷ୍ୟ ବିଷୟରେ ପଚାରିଥିଲେ । କେ-ପପ ଆଇଡଲ ହେବା ନିଜର ଲକ୍ଷ୍ୟ ବୋଲି ତମନ୍ନା ଉତ୍ତର ରଖିଥିଲେ । ଏଭଳି ଉତ୍ତର ଶୁଣି ସଚିବ ସାମାନ୍ୟ ଚକିତ ହୋଇପଡ଼ିଥିଲେ । ଏହା କଣ ବୋଲି ପୁଣି ଥରେ ସଚିବ ପ୍ରଶ୍ନ କରିବାରୁ ଏହା ଦକ୍ଷିଣ କୋରିଆର ଏକ ପ୍ରସିଦ୍ଧ ଡ୍ୟାନସ । ଏହାକୁ କୋରିଆର ପପ୍ ଆଇଡଲ ବୋଲି କୁହାଯାଉଥିବା ବେଳେ ଦକ୍ଷିଣ କୋରିଆ ଯିବାର ଇଚ୍ଛା ରଖିଥିବା ତମନ୍ନା ପ୍ରକାଶ କରିଥିଲେ । ଗତକାଲି ଶ୍ରୀ ପାଣ୍ଡିଆନଙ୍କ ନିଦେ୍ର୍ଧଶକ୍ରମେ ଭୁବନେଶ୍ୱରରୁ ୫-ଟିର ଏକ ଚାରି ଜଣିଆ ପ୍ରତିନିଧି ଦଳ ତେନ୍ତୁଳିଖୁଣ୍ଟିରେ ପହଞ୍ଚି ତମନ୍ନାଙ୍କ ସହ ଆଲୋଚନା କରିଥିଲେ । ପ୍ରତିନିଧି ଦଳ ଏବଂ ତମନ୍ନାଙ୍କ ସହିତ ହୋଇଥିବା ଆଲୋଚନାର ଭିଡିଓ ପ୍ରସ୍ତୁତ କରି ପ୍ରତିନିଧି ଦଳ ନେଇଥିବା ଜଣାପଡ଼ିଛି । ଭବିଷ୍ୟତରେ ତମନ୍ନାଙ୍କ ଲକ୍ଷ୍ୟ ପୂରଣ ହେବ ବୋଲି ବିଡିଓ ଦୁର୍ଯେ୍ୟାଧନ ଭୋଇ, ତହସିଲଦାର ପ୍ରଦୀପ କୁମାର କର ଓ ବିଦ୍ୟାଳୟର ପ୍ରଧାନଶିକ୍ଷକ ଉମରସିଂ ନାୟକ ଆଶା ରଖିଛନ୍ତି ।