ରାଜଧାନୀରେ ଓମିକ୍ରନ ଭୟ : ଶିକ୍ଷାନୁଷ୍ଠାନରେ ଚେକିଂ ଆରମ୍ଭ

ସତ୍ୟଶିଖା(ଭୁବନେଶ୍ୱର) ୦୯ .୧୨.୨୦୨୧:ବିଶ୍ୱବାସୀଙ୍କ ଚିନ୍ତା ବଢ଼ାଇଛି କରୋନାର ନୂଆ ଉପପ୍ରଜାତି ‘ଓମିକ୍ରନ’ । ଓମିକ୍ରମ ଭୟରେ ହଜାରେରୁ ଊର୍ଦ୍ଧ୍ୱ ନାଗରିକ ବିଦେଶରୁ ଓଡ଼ିଶା ଫେରିଛନ୍ତି । ରାଜଧାନୀ ଭୁବନେଶ୍ୱର ରାଜ୍ୟର ମୁଖ୍ୟ ପ୍ରବେଶ ଦ୍ୱାର ହୋଇଥିବାବେଳେ ଏବେଠୁ ଭୁବନେଶ୍ୱର ମହାନଗର ନିଗମ (ବିଏମ୍‌ସି)ଙ୍କୁ ଓମିକ୍ରମ ଭୟ ଘାରିଛି । କରୋନାର ପ୍ରଥମ ଲହରରେ ବିଦେଶ ଫେରନ୍ତା, ଦ୍ୱିତୀୟ ଲହରରେ ବାହାର ରାଜ୍ୟରୁ ଆସିଥିବା ଶିକ୍ଷାର୍ଥୀ ସଂକ୍ରମଣର ବାହକ ସାଜିଛନ୍ତି । ଏହାକୁ ଦୃଷ୍ଟିରେ ରଖି ରାଜଧାନୀ ଶିକ୍ଷାନୁଷ୍ଠାନଗୁଡ଼ିକରେ କରୋନା ଟେଷ୍ଟିଂକୁ କଡ଼ାକଡ଼ି କରାଯାଇଛି । ଓମିକ୍ରମ ବିଏମ୍‌ସି କମିଶନର ସଞ୍ଜୟ ସିଂହଙ୍କ ନିର୍ଦ୍ଦେଶକ୍ରମେ ବିଏମ୍‌ସି କର୍ତ୍ତୃପକ୍ଷ ଏହି ଚେକିଂ ଆରମ୍ଭ କରିଛନ୍ତି ।

ଶିକ୍ଷାର୍ଥୀଙ୍କ ସ୍ୱାସ୍ଥ୍ୟବସ୍ଥା ଓ ସୁରକ୍ଷା ପାଇଁ ବିଏମ୍‌ସି ସଦାସର୍ବଦା ପ୍ରାଥମିକତା ଦେଇଛି । ଏହି କ୍ରମରେ ଉଭୟ ଶିକ୍ଷାର୍ଥୀ ଓ କର୍ତ୍ତୃପକ୍ଷଙ୍କ ନମୁନା ପରୀକ୍ଷଣ ଜାରି ରହିଛି । କମିଶନରଙ୍କ ନିଦ୍ଦେଶ ପରେ ବିଏମ୍‌ସି ଜୋନାଲ ଡେପୁଟି କମିଶନର ପୁରନ୍ଦର ନନ୍ଦ, ମହେନ୍ଦ୍ର କୁମାର ବଢ଼ାଇ ଓ ରବିନାରାୟଣ ଜେଠୀ ନିଜ ନିଜ ଜୋନ୍‌ରେ ଥିବା ଶିକ୍ଷାନୁଷ୍ଠାନରେ ନମୁନା ପରିକ୍ଷଣ ଜାରି ରଖିଛନ୍ତି । ବିଭିନ୍ନ ଶିକ୍ଷାନୁଷ୍ଠାନରେ ସ୍ୱତନ୍ତ୍ର ଶିବିର କରାଯାଉଥିବାବେଳେ ଏଯାବତ୍ ପ୍ରତ୍ୟେକ ଜୋନରେ ପ୍ରାୟ ୧୫୦୦ ଲେଖା ନମୁନା ପରିକ୍ଷଣ ହୋଇସାରିଥିବା ଜଣାପଡ଼ିଛି । ରାଜ୍ୟର ପ୍ରଥମ ମହାନଗର ନିଗମ ଭାବେ ବିଏମ୍‌ସି ଏପରି ପଦକ୍ଷେପ ନେଇଛି । ଯାହାକୁ ସାଧାରଣରେ ସ୍ୱାଗତ କରାଯାଇଛି ।

ଯଦି କୌଣସି ଶିକ୍ଷାନୁଷ୍ଠାନର ଛାତ୍ରଛାତ୍ରୀଙ୍କ ମଧ୍ୟରେ ନମୁନା ପଜିଟିଭ୍ ଚିହ୍ନଟ ହେଉଛି ସେମାନଙ୍କୁ ପୃଥକବାସରେ ରହିବାକୁ ପରାମର୍ଶ ଦିଆଯିବା ସହ ସେମାନଙ୍କ ସ୍ୱାସ୍ଥ୍ୟାବସ୍ଥାକୁ କ୍ରମାଗତ ଭାବେ ଯାଞ୍ଚ କରାଯାଉଛି । ସହରରେ ୬୮ ଆର୍‌ଆର୍‌ଟି ଟିମ୍ କାର୍ଯ୍ୟକାରୀ ଥିବାବେଳେ ସ୍ୱାସ୍ଥ୍ୟକର୍ମୀମାନେ ଏଥିରେ ସହଯୋଗ କରୁଛନ୍ତି । ସୂଚନାଯୋଗ୍ୟ, ବିଏମ୍‌ସି ପକ୍ଷରୁ ଓମିକ୍ରମ ପ୍ରତିହତ କରିବାକୁ ବିଭିନ୍ନ ପଦକ୍ଷେପ ନିଆଯାଇଛି । ବିମାନବନ୍ଦରରେ ସ୍ୱତନ୍ତ୍ର ନମୁନା ସଂଗ୍ରହଣ ଶିବିର ଆରମ୍ଭ କରାଯାଇଥିବାବେଳେ ସହରରେ ଚେକିଂ ବ୍ଲକିଂକୁ ବ୍ୟାପକ କରାଯାଉଛି ।