ସତ୍ୟଶିଖା (ଭୁବନେଶ୍ୱର) ୨୨.୦୨.୨୦୨୨: ଟ୍ରାଫିକ୍ ନିୟମ ଉଲଂଘନ କରୁଥିଲେ ସାବଧାନ! ସିଧା ମୋବାଇଲରୁ ଯିବ ଚାଲାଣ । ବଡ କଥା ହେଲା ଘଣ୍ଟାପ୍ରତି ୫୦ କିମିରୁ ଅଧିକ ବେଗରେ ଗାଡି ଯାଉଥିଲେ ୭ହଜାର ଟଙ୍କା ଜରିମାନା କରାଯିବ । ଲାଇସେନ୍ସ ମଧ୍ୟ ବାତିଲ କରାଯିବ ।ଯଦି ତିନି ଥର ବାତିଲ ହୁଏ ତା’ହେଲେ ସବୁଦିନ ପାଇଁ ରଦ୍ଧ କରାଯିବ । ଏଭଳି କଡା ଆଭିମୁଖ୍ୟ ଗ୍ରହଣ କରିଛି ଟ୍ରାଫିକ୍ ପୁଲିସ୍ । ସ୍ମାର୍ଟ ସିଟି କର୍ତ୍ତୃପକ୍ଷ ୧୩ଟି ସ୍ଥାନରେ କ୍ୟାମେରା ଲଗାଇଥିବା ବେଳେ ଆଇନ ଉଲଂଘନକାରୀ ଆଉ ବର୍ତ୍ତି ପାରିବେନି ।
ମିଳିଥିବା ସୂଚନା ଅନୁସାରେ, ଦ୍ରୁତ ଗତି ଓ ମୋବାଇଲ ଫୋନରେ କଥାବାର୍ତ୍ତା ସମୟରେ ଗାଡି ଚାଳନା ପାଇଁ ଦୁର୍ଘଟଣା ବଢୁଛି । ଏହା ଗାଡି ଚାଳକଙ୍କ ପାଇଁ ବିପଦ ସୃଷ୍ଟି କରୁଛି । ତେଣୁ ନିୟମ ଉଲଂଘନକାରୀଙ୍କ ପାଇଁ କଠୋର ଆଭିମୁଖ୍ୟ ଗ୍ରହଣ କରାଯାଇଛି । ୧୩ଟି ଛକରେ ଅତ୍ୟାଧୁନିକ ଏଏନପିଆର/ଟିଭିଡିଏସ୍ ସିସିଟିଭି କ୍ୟାମେରା ଖଞ୍ଜା ଯାଇଛି ।
କ୍ୟାମେରା ଖଞ୍ଜା ଯାଇଥିବା ଟ୍ରାଫିକ୍ ପୋଷ୍ଟ ଗୁଡିକ ହେଲା ପଟିଆ , ପାୱାର ହାଉସ୍, କଳିଙ୍ଗ ଷ୍ଟାଡିୟମ୍, କ୍ୟାପିଟାଲ ହସ୍ପିଟାଲ, କିଟ୍ ଛକ, କିଟ୍ କ୍ୟାମ୍ପସ ନମ୍ବର-୩, ଶିଶୁଭବନ ଛକ, ବାଣୀବିହାରଠାରୁ ଶିଶୁଭବନ ଛକ, କ୍ୟାପିଟାଲ ଛକ, ଶାସ୍ତ୍ରୀନଗର ଛକ, ରାଜମହଲ ଛକ, ଟ୍ରାଇଡେଣ୍ଟ ହୋଟେଲ, ନାକାଗେଟ୍ ।
ସେହି ସବୁ ଛକରେ ଯଦି ଗାଡିର ବେଗ ୫୦କିମିରୁ ଅଧିକ ହୁଏ, ତା’ହେଲେ ସିସିଟିଭି କ୍ୟାମେରା ଜରିଆରେ ସଂମ୍ପୃକ୍ତ ଗାଡି ଚାଳକଙ୍କ ମୋବାଇଲରୁ ଏସଏମଏସ ଯୋଗେ ଚାଲାଣ ପଠାଯିବ । ଜରିମାନା ବାବଦରେ ୭ହଜାର ଟଙ୍କା ରଖାଯାଇଛି । ଯଦି ସଂପୃକ୍ତ ଗାଡି ଚାଳକ ତାଙ୍କର ଡ୍ରାଇଭିଂ ଲାଇସେନ୍ସ ଦେଖାଇବେ ତେବେ ଜରିମାନା ରାଶି ୨ହଜାର ଟଙ୍କାକୁ କମାଇ ଦିଆଯିବ । କିନ୍ତୁ ଡ୍ରାଇଭିଂ ଲାଇସେନ୍ସ ୩ମାସ ପାଇଁ ବାତିଲ କରାଯିବ।
