ସତ୍ୟଶିଖା( ଭୁବନେଶ୍ୱର)୨୦.୦୪.୨୦୨୨: ଭବାନୀପାଟଣା: କଳାହାଣ୍ଡି ଜିଲ୍ଲା କେସିଙ୍ଗା ପୁଲିସ୍ ଗଞ୍ଜେଇ ଚୋରା ଚାଲାଣ ଅଭିଯୋଗରେ ଦୁଇ ଯୁବକଙ୍କୁ ଗିରଫ କରି କୋର୍ଟଚାଲାଣ କରିଛି । ସେମାନଙ୍କ ଠାରୁ ୧୫୫.୫୪୩ କେଜି ଗଞ୍ଜଇ ସମେତ ୪ ବାଇକ୍, ୨ ମୋବାଇଲ୍ ଫୋନ୍ ଏବଂ କିଛି ଅର୍ଥରାଶି ଜବତ କରାଯାଇଛି । ଗିରଫ ଯୁବକମାନେ ହେଲେ ନୂଆପଡ଼ା ଜିଲ୍ଲା କୋମନା ଥାନା ଜେଠୁପଲ୍ଲୀର ଶୋଭା ତାଣ୍ଡିଙ୍କ ପୁଅ କ୍ଷୀରୋଦ ତାଣ୍ଡି (୨୨) ଏବଂ କଳାହାଣ୍ଡି ଜିଲ୍ଲା ଖରିଆର ଥାନା ଅଞ୍ଚଳର ଭୋଇଗି ତାଣ୍ଡିଙ୍କ ପୁଅ ରୋହନ ତାଣ୍ଡି (୨୩) । ଗତ ସୋମବାର ବିଳମ୍ବିତ ରାତି ତଥା ପ୍ରାୟ ୨.୩୦ ମିନିଟ୍ ସମୟରେ କେସିଙ୍ଗା ପୁଲିସ୍ ପାଟ୍ରୋଲିଂ କରୁଥିବା ବେଳେ ବିଶ୍ୱସ୍ଥ ସୂତ୍ରରୁ ଗଞ୍ଜେଇ ଚୋରାଚାଲାଣ ହେଉଥିବା ନେଇ ଖବର ପାଇଥିଲା । ପରେ ପୁଲିସ୍ କଳାହାଣ୍ଡି ମୋହନଗିରି ଏବଂ ନୂଆପଡ଼ା କୋମନା ରାସ୍ତାରେ ଚଢ଼ଉ କରି ସମ୍ପୃକ୍ତ ଦୁଇଜଣଙ୍କୁ କାବୁ କରିଥିଲା । ଦୁଇ ଯୁବକ ବାଇକ୍ ଯୋଗେ ୮ଟି ଜରିବସ୍ତାରେ ଗଞ୍ଜେଇ ପ୍ୟାକ୍ କରି ମୋହନଗିରିରୁ କୋମନା ସ୍ଥାନାନ୍ତର କରୁଥିବା ବେଳେ ଏମାନଙ୍କୁ କାବୁ କରାଯାଇଥିବା ପୁଲିସ୍ ସୂଚନା ଦେଇଛି । ପରେ ଏନ୍ଡିପିଏସ୍ ଆକ୍ଟରେ କେସ୍ ନଂ ୧୭୦/୨୨ରେ ଏକ ମାମଲା ରୁଜୁ କରି ଏମାନଙ୍କୁ କୋର୍ଟଚାଲାଣ କରାଯାଇଛି ।
