ସତ୍ୟଶିଖା(ଭୁବନେଶ୍ୱର ) ୨୨.୧୨.୨୦୨୧: ସାରା ରାଜ୍ୟରେ ହାଡ଼ଭଙ୍ଗା ଶୀତ ଜାରି ରହିଛି । ଶୀତର ପ୍ରଭାବରେ ଜନଜୀବନ ଅସ୍ତବ୍ୟସ୍ତ ହୋଇପଡ଼ିଥିବାବେଳେ ସକାଳ ଓ ସନ୍ଧ୍ୟାରେ ଲୋକେ ଘରୁ ବାହାରିବାକୁ ଉଚିତ ମଣୁନାହାନ୍ତି । ବିଶେଷ କରି କନ୍ଧମାଳ, ଦାରିଙ୍ଗବାଡି, କୋରାପୁଟ ଆଦି ପାହାଡ଼ି ଜିଲ୍ଲାରେ ହାଡ଼ଭଙ୍ଗା ଶୀତରେ ଲୋକେ ନାହିଁ ନଥିବା ଅସୁବିଧାର ସମ୍ମୁଖିନ ହେଉଛନ୍ତି । ଦାରିଙ୍ଗବାଡିକୁ ରାଜ୍ୟର ସବୁଠାରୁ ଥଣ୍ଡା ସହର ଭାବେ ରେକର୍ଡ କରାଯାଇଥିବାବେଳେ ଗତ ୨୪ ଘଣ୍ଟାରେ ଏଠାରେ ପାରଦ ୩.୫ ଡିଗ୍ରୀ ରେକର୍ଡ ହୋଇଛି । ମୋଟ ୧୯ଟି ସ୍ଥାନରେ ତାପମାତ୍ରା ୧୦ ଡିଗ୍ରୀ ତଳେ ଥିବାବେଳେ ୭ ସହରରେ ପାରଦ ୭ ଡିଗ୍ରୀ ତଳେ ରହିଛି ।
କୌଣସି ସହରରେ ପାରଦ ୧୫ ଡିଗ୍ରୀ ଉପରେ ନଥିବାବେଳେ ଆସନ୍ତା ୨ରୁ ୩ ଦିନ ରାଜ୍ୟରେ ଆହୁରି ଥଣ୍ଡା ଅନୁଭୂତ ହେବ ବୋଲି ଆଞ୍ଚଳିକ ପାଣିପାଗ କେନ୍ଦ୍ର ସତର୍କ କରାଇଛି । ଗତ ୨୪ ଘଣ୍ଟାରେ ଦାରିଙ୍ଗବାଡ଼ିରେ ୩.୫ ଡିଗ୍ରୀ, ଫୁଲବାଣୀରେ ୪, ଭବାନୀପାଟଣାରେ ୬, କେନ୍ଦୁଝରରେ ୬.୨, ଝାରସୁଗୁଡାରେ ୬.୪, ସୁନ୍ଦରଗଡରେ ୬.୫, ଟିଟିଲାଗଡରେ ୬.୮, ବୌଦ୍ଧରେ ୭.୦, ବଲାଙ୍ଗିରରେ ୭.୮, ସୋନପୁରରେ ୮.୫, କୋରାପୁଟରେ ୮.୫, ସମ୍ବଲପୁରରେ ୮.୫, ବାରିପଦାରେ ୮.୫, ଅନୁଗୋଳରେ ୮.୬, ହୀରାକୁଦରେ ୮.୬, ନୟାଗଡରେ ୯.୦, ତାଳଚେରରେ ୯.୦, ଚାନ୍ଦବାଲିରେ ୯.୨, ବାଲେଶ୍ୱରରେ ୯.୮ ଡିଗ୍ରୀ ତାପମାତ୍ରା ରେକର୍ଡ କରାଯାଇଛି ।
ଅନୁରୂପ ଭାବେ ଭୁବନେଶ୍ୱରରେ ୧୦, କଟକରେ ୧୦.୧, ମାଲକାନଗିରିରେ ୧୧.୫, ଗୋପାଳପୁରରେ ୧୧.୮, ପାରାଦୀପରେ ୧୨.୮ ଓ ପୁରୀରେ ୧୩.୬ ଡିଗ୍ରୀ ତାପମାତ୍ରା ରେକର୍ଡ କରାଯାଇଛି । ଆସନ୍ତାକାଲି ଶୀତ ଲହରି ନେଇ ମୋଟ ୧୯ ଜିଲ୍ଲାକୁ ୟେଲୋ ୱାର୍ଣ୍ଣିଂ ଜାରି ହୋଇଛି । ଜିଲ୍ଲାଗୁଡ଼ିକ ମଧ୍ୟରେ ବାଲେଶ୍ୱର, ଭଦ୍ରକ, କେନ୍ଦ୍ରାପଡ଼ା, ଜଗତସିଂହପୁର, ପୁରୀ, ଖୋର୍ଦ୍ଧା, କଟକ, ଗଞ୍ଜାମ, ନୟାଗଡ଼, ଯାଜପୁର, ଢେଙ୍କାନାଳ, କେନ୍ଦୁଝର, ଅନୁଗୁଳ, ଦେବଗଡ଼, ସମ୍ବଲପୁର, ବରଗଡ଼, ନୂଆପଡ଼ା, କନ୍ଧମାଳ ଓ ନବରଙ୍ଗପୁର ରହିଛି ।
ଆଗାମୀ ୫ ଦିନ ଯାଏ ରାଜ୍ୟରେ ପାଗ ମୁଖ୍ୟତଃ ଶୁଖିଲା ରହିବ । କିନ୍ତୁ ଶୀତର ପ୍ରକୋପ ଜାରି ରହିବ । ବିଗତ ୩ ରୁ୪ ଦିନ ହେବ କ୍ରମାଗତ ଭାବେ ରାଜ୍ୟକୁ ବାୟୁ ମଣ୍ଡଳର ତଳ ଭାଗରୁ ଉତ୍ତରପଶ୍ଚିମ ତଥା ଉତ୍ତର ଦିଗରୁ ଥଣ୍ଡା ଏବଂ ଶୁଷ୍କ ବାୟୁ ପ୍ରବେଶ କରୁଛି । ଏହା ଆହୁରି ୪୮ ଘଣ୍ଟା ଯାଏ ରହିବା ନେଇ ପୂର୍ବାକଳନ କରାଯାଇଥିବାବେଳେ କିଛି ଜିଲ୍ଲାରେ ଶୀତ ଲହରୀ, ତୀବ୍ର ଶୀତ ଲହରୀ ତଥା ଥଣ୍ଡା ଦିନ ଅନୁଭୂତ ହେବା ସମ୍ଭାବନା ରହିଛି ।
