ମୁମ୍ବାଇ: ବଲିଉଡର ଏଭରଗ୍ରୀନ ଷ୍ଟାର ଋଷି କପୁର ଓରଫ ଚିଣ୍ଟୁ ଆମ ସମସ୍ତଙ୍କୁ ଛାଡ଼ି ଚାଲି ଯାଇଛନ୍ତି। କ୍ୟାନସରରେ ଲଢ଼େଇ କରି ଶେଷରତ ଆଜି ଋଷି ମୁମ୍ବାଇରେ ଏକ ହସ୍ପିଟାଲରେ ଆଖି ବୁଜିଛନ୍ତି। ଦେଶରେ କରୋନା ପାଇଁ ଲକଡାଉନ ଜାରି ହୋଇଥିବାରୁ ହାତ ଗଣତି ବନ୍ଧୁ ଓ ପରିବାରବର୍ଗଙ୍କ ଉପସ୍ଥିତିରେ ମୁମ୍ବାଇର ଚନ୍ଦନୱାଡି ସ୍ଥିତି ଶଶ୍ମାନରେ ତାଙ୍କର ଶେଷ କୃତ୍ୟ ଶେଷ ହୋଇଛି।
ପୁଅ ରଣବୀର କପୁର ପିତାଙ୍କ ଅନ୍ତିମ ସଂସ୍କାର କରିଛନ୍ତି। ଋଷି କପୁର ଜଣେ ସୁପରଷ୍ଟାର ହୋଇଥିଲେ ହେଁ ତାଙ୍କ ଅନ୍ତିମ ସଂସ୍କାରରେ ମାତ୍ର ୨୦ ଜଣ ଲୋକ ସାମିଲ ହୋଇଥିଲେ। ମାରିନ ଲାଇନ୍ସରେ ଥିବା ଚନ୍ଦନୱାଡି ଶଶ୍ମାନକୁ କେବଳ କିଛି ଲୋକଙ୍କୁ ଯିବାକୁ ଅନୁମତି ମିଳିଥିଲା। ଗଣମାଧ୍ୟମ ପ୍ରତିନିଧି ମଧ୍ୟ ଶଶ୍ମାନ ଘାଟକୁ ଯାଇ ପାରି ନଥିଲେ।
କେବଳ କପୁର ପରିବାର ଓ ବନ୍ଧ ବର୍ଗ ଋଷିଙ୍କୁ ବେଶ ନୀରବତାର ସହ ଅନ୍ତିମ ବିଦାୟ ଦେଇଛନ୍ତି। ଦିଲ୍ଲୀରେ ରହୁଥିବା ଋଷିଙ୍କ ଝିଅ ରିଧିମା ମୁମ୍ବାଇ ଆସିବା ପାଇଁ ପାସ ପାଇଥିଲେ। ହେଲେ ୧୪ ଶହ କିମି ରାସ୍ତା ଅତିକ୍ରମ କରି ଆସିବା ପୂର୍ବରୁ ହିଁ ଋଷିଙ୍କ ଶେଷକୃତ୍ୟ ସମ୍ପନ ହୋଇଛି। ଆସନ୍ତାକାଲି ସେ ମୁମ୍ବାଇରେ ଆସି ପହଞ୍ଚିବେ।
ଆହୁରି ପଢ଼ନ୍ତୁ
ଅନ୍ତିମ ବିଦାୟ ଜଣାଇବା ବେଳେ ଋଷିଙ୍କ ପତ୍ନୀ ନିତୁ, ଭଉଣୀ ରିମା ଜୈନ, ମନୋଜ ଜୈନ, ଅରମାନ ଜୈନ, ଆଦର ଜୈନ, ଅନିଶା ଜୈନ, ରାଜୀବ କପୁର, କୃନାଲ କପୁର, ରଣଧୀର କୁପର, ସୈଫ ଅଲୀ ଖାନ, କରିନା କପୁର, ଅଭିଷେକ ବଚ୍ଚନ, ଆଲିଆ ଭଟ୍ଟ, ଆୟନ ମୁଖାର୍ଜୀ, ଜୟ ରାମ, ରୋହିତ ଧାୱନ ଓ ରାହୁଲ ରାୱଲି ପ୍ରମୁଖ ଉପସ୍ଥିତ ଥିଲେ।
ମୁମ୍ବାଇର ଏଚଏନ ରିଲାଏନ୍ସ ହସ୍ପିଟାଲରୁ ସ୍ୱତନ୍ତ୍ର ଆମ୍ବୁଲାନ୍ସ ଯୋଗେ ରଣବୀର କପୁର ବାପା ଋଷି କପୁରଙ୍କ ମୃତଦେହ ଧରି ଚନ୍ଦନୱାଡି ଶଶ୍ମାନରେ ପହଞ୍ଚିଥିଲେ। ଏହି ସମୟରେ ତାଙ୍କ ଗାର୍ଲଫ୍ରେଣ୍ଡ ଆଲିଆ ନିଜ କାରରେ ତାଙ୍କୁ ଅନୁସରଣ କରି ପଛପଛେ ଯାଇଥିଲେ।
ଋଷିଙ୍କ ଅନ୍ତିମ ଯାତ୍ରାରେ ସାମିଲ ହୋଇଥିବା ସମସ୍ତ ସଦସ୍ୟଙ୍କୁ ପୁଲିସ୍ ଜଗି ରହିଥିଲା। ସେହିପରି ସମସ୍ତ ସଦସ୍ୟ ମୁହଁରେ ମାସ୍କ ଲଗାଇବା ସହ କରୋନା ପାଇଁ ଲାଗୁ ହୋଇଥିବା ସାମାଜିକ ଦୂରତାକୁ ମଧ୍ୟ ପାଳନ କରିଥିଲେ।
